Parti 12: Kon pa Kondusí Estudio di Beibel Progresivo
Yuda Studiantenan Kuminsá i Kondusí Estudio di Beibel
1 Ora nos studiantenan di Beibel kuminsá partisipá den sirbishi di vèlt, kisas e pensamentu ku nan mes tin ku kuminsá i kondusí estudio di Beibel lo por spanta nan. Kon nos por yuda nan kultivá un aktitut positivo enkuanto e aspekto importante aki di nos ministerio?—Mat. 24:14; 28:19, 20.
2 Unabes un studiante di Beibel ta kualifiká komo un publikadó no-batisá, probablemente lo e ta partisipando kaba den e Skol di Ministerio Teokrátiko. E entrenamentu ku e ta risibí dor di prepará i presentá su partinan lo yud’é desaroyá e abilidatnan pa siña otro hende ku ta nesesario pa “un trahadó ku no tin motibu pa tin bèrgwensa, ku ta parti e palabra di bèrdat na un manera korekto.”—2 Tim. 2:15.
3 Siña Nan ku Bo Ehèmpel: Hesus a train su disipelnan dor di duna nan instrukshon kla i pone un bon ehèmpel pa nan. El a bisa: “Tur hende, despues di a kaba di siña tur kos [òf, “ku ta bon instruí,” BPK], lo ta meskos ku su maestro.” (Luk. 6:40) Ta masha importante pa bo imitá Hesus dor di pone un bon ehèmpel den bo propio sirbishi. Segun ku bo studiante ta opservá bo ehèmpel den e ministerio, lo e komprondé ku e meta di hasi rebishita ta pa kuminsá estudio di Beibel.
4 Splika e studiante ku ora nos ofresé un persona un estudio di Beibel, generalmente no ta nesesario pa deskribí e areglo di estudio en detaye. Hopi bes ta mihó pa simplemente demostrá e estudio dor di usa un òf kisas dos paragraf for di un publikashon pa studia Beibel. Nos por haña sugerensianan práktiko kon pa hasi esaki den e edishon aki di Nos Ministerio di Reino na página 8, i den e edishon di yanüari 2002, página 6.
5 Ora ta apropiá, invitá e studiante pa kompañá abo òf un otro publikadó ku eksperensia pa bai otro estudio di Beibel. Podisé e por partisipá dor duna komentario riba un paragraf òf un teksto klave. Asina e studiante por opservá i siña hopi tokante kon pa kondusí estudionan di Beibel progresivo. (Pro. 27:17; 2 Tim. 2:2) Elogi’é, i mustr’é kon e por mehorá.
6 Dor di train publikadónan nobo pa nan ta maestronan di e Palabra di Dios, nos lo prepará nan pa e “bon obra” di kuminsá i kondusí nan propio estudionan. (2 Tim. 3:17) Ta un gran satisfakshon di por traha huntu ku nan pa ekstendé e invitashon amoroso: “Laga esun ku kier, tuma e awa di bida pòrnada.”—Rev. 22:17.