Warda Esaki

Kon pa Kondusí Estudio di Beibel Progresivo

E suplemento aki ta un kompilashon di puntonan klave for di e seri di artíkulo ku a sali den Nos Ministerio di Reino tokante kon pa kondusí estudio di Beibel progresivo. Ta bon pa tur hende warda e suplemento aki i konsult’é ora nan ta kondusí estudio di Beibel. Ademas, por hala atenshon na puntonan for di e suplemento aki durante reunionnan pa sirbishi di vèlt. Anto superintendentenan di sirbishi por us’é komo e base pa diskursonan ku nan ta duna ora nan ta bishitá gruponan di estudio di buki.

Parti 1: Kiko Ta un Estudio di Beibel?

Bo ta kondusí un estudio di Beibel ora ku riba un base regular i na un manera sistemátiko bo ta tene konsiderashonnan bíbliko, maske nan ta breve, usando Beibel huntu ku un di e publikashonnan rekomendá. Bo por raportá e estudio ora ku bo a kondusié dos biaha despues di a demostrá e areglo di estudio i si tin indikashon ku e estudio lo sigui.—km-PA 7/04 pág. 1.

Publikashonnan Rekomendá

◼ Kico Dios Ta Rekerí di Nos?

◼ Conocimentu cu Ta Hiba na Bida Eterno

◼ Adorá e Úniko Dios Berdadero

◼ Por usa Bo Por Ta Amigu di Dios! pa studia ku hende ku no a haña hopi edukashon òf ku no ta lesa bon.

Parti 2: Prepará pa Kondusí e Estudio

Nos mester presentá e informashon na un manera ku ta motivá kurason di e studiante. Pa logra esaki, nos tin ku prepará kuidadosamente ku e studiante na mente.—km-PA 8/04 pág. 1.

Kon pa Prepará

◼ Analisá e tema, suptemanan i plachi- òf ilustrashonnan ku tin den e lès.

◼ Buska e kontestanan pa e preguntanan imprimí, i marka solamente e palabra- i frasenan klave.

◼ Disidí kua di e tekstonan menshoná bo ta bai lesa durante e estudio. Hasi algun anotashon breve den márgen di e publikashon di estudio.

◼ Prepará un repaso breve di e puntonan prinsipal.

Adaptá e Lès na e Persona

◼ Hasi orashon tokante e studiante i su nesesidatnan.

◼ Antisipá e puntonan ku e studiante lo tin difikultat pa komprondé òf aseptá.

◼ Puntra bo mes: Kiko e tin ku komprondé òf traha riba dje p’e por progresá spiritualmente? Kon mi por alkansá su kurason?

◼ Segun ta nesesario, prepará un ilustrashon, un splikashon òf un seri di pregunta pa yuda e studiante kapta e nifikashon di un sierto punto òf teksto bíbliko.

Parti 3: Usa e Skritura na un Manera Efektivo

Nos ta kondusí estudio di Beibel ku e propósito di ‘hasi disipel’ dor di yuda hende komprondé i aseptá e siñansanan di e Palabra di Dios i apliká nan den nan bida. (Mat. 28:19, 20; 1 Tes. 2:13) Pa e motibu ei, e estudio mester konsentrá riba e Skritura.—km-PA 11/04 pág. 8.

Siña for di e Palabra di Dios

◼ Mustra e studiante kon e por haña e tekstonan den su mes Beibel.

◼ Buska i konsiderá e tekstonan bíbliko ku ta mustra e base bíbliko di loke nos ta kere.

◼ Usa pregunta. En bes di splika e tekstonan na e studiante, laga é splika bo nan.

◼ Keda simpel. Evitá di splika tur aspekto di un teksto. Inkluí solamente loke ta nesesario pa klarifiká e punto.

◼ Hasi aplikashon práktiko. Yuda e studiante mira kon e tekstonan di Beibel ta apliká na dje personalmente.

Parti 4: Siña Studiantenan Prepará

Hopi bes un studiante ku ta lesa e lès di antemano, ta marka e kontestanan i ta pensa kon pa ekspresá nan ku su mes palabra ta hasi progreso spiritual mas lihé. P’esei, unabes ku un persona ta studia regularmente, prepará un lès huntu kuné pa e haña un idea ta kon e por hasi esei. Den mayoria kaso lo ta benefisioso pa prepará henter un kapítulo òf lès huntu kuné.—km-PA 12/04 pág. 1.

Marka i Anotashon

◼ Splika kon pa haña kontesta direkto pa e preguntanan di e paragraf.

◼ Mustra e studiante bo propio publikashon di estudio den kua bo a marka solamente e palabranan òf frasenan klave.

◼ Yud’é mira ku kada teksto menshoná ta apoyá un punto den e paragraf. Mustr’é kon pa hasi anotashon kòrtiku den márgen di su publikashon di estudio.

Bista General i Repaso

◼ Mustra e studiante kon pa eksaminá e título di e kapítulo, suptemanan i plachinan promé ku e kuminsá ku su preparashon detayá.

◼ Animá e studiante pa na final di su preparashon, e repasá e puntonan prinsipal.

Parti 5: Determiná Kuantu Informashon pa Trata

E kantidat di informashon ku por trata durante un estudio ta dependé di e kapasidat i sirkunstansia di tantu e maestro komo e studiante.—km-PA 1/05 pág. 1.

Edifiká un Fe Firme

◼ Ta mas importante pa nos yuda e studiante haña un bon komprondementu di e Palabra di Dios ku pasa rápidamente dor di hopi informashon.

◼ Tuma e kantidat di tempu ku ta nesesario pa yuda e studiante komprondé i aseptá loke e ta siñando.

◼ Sòru pa bo tin sufisiente tempu pa konsiderá tekstonan klave ku ta proveé e base pa e siñansanan.

Evitá di Desviá for di e Tema

◼ Si un studiante ta inkliná na papia hopi riba asuntunan personal, kisas nos lo tin ku hasi areglo pa papia riba eseinan ora nos kaba di studia.

◼ No papia di mas durante e estudio. No bin ku muchu punto adishonal òf eksperensia pa nan no stroba e studiante di haña un konosementu eksakto di e siñansanan básiko di Beibel.

Parti 6: Ora un Studiante Hasi un Pregunta

Unabes un estudio di Beibel ta bon establesí, por lo general ta mihó pa konsiderá siñansanan di Beibel den un manera ordená en bes di bula di un tópiko pa otro. Esaki ta yuda e studiante edifiká un fundeshi di konosementu eksakto i progresá spiritualmente.—km-PA 2/05 pág. 6.

Usa Disernimentu

◼ Por lo general bo por kontestá preguntanan ku tin keber ku e informashon ku boso ta studiando asina ku nan presentá.

◼ Si ta preguntanan ku no tin keber ku e informashon òf ku bo tin ku hasi investigashon pa kontestá nan, bo por konsiderá nan na un otro okashon. Lo ta bon pa skirbi e preguntanan ei.

◼ Si e studiante tin difikultat pa aseptá un sierto siñansa, konsiderá mas informashon ku ta splika e tópiko ei en detaye.

◼ Si ainda e studiante no ta konvensí, laga e tópiko ei para te un otro biaha i sigui ku su estudio.

Sea Modesto

◼ Si bo no sa e kontesta riba un pregunta, no duna bo opinion personal.

◼ Siña e studiante progresivamente kon pa hasi investigashon.

Parti 7: Hasi Orashon na Estudio

Pa studiantenan di Beibel por progresá spiritualmente, Yehova su bendishon ta esensial. P’esei ta na su lugá pa un estudio ku ya ta establesí kuminsá i kaba ku orashon.—km-PA 3/05 pág. 6.

Kon pa Introdusí Orashon

◼ Ku personanan religioso, hopi bes bo por hasi orashon for di e promé estudio.

◼ Den kaso di otro studiantenan, nos tin ku diserní ki ora ta apropiá pa introdusí orashon.

◼ Por usa Salmo 25:4, 5 i 1 Juan 5:14 pa splika dikon nos ta hasi orashon.

◼ Por usa Juan 15:16 pa mustra ku nos mester hasi orashon na Yehova den nòmber di Hesukristu.

Loke Por Pidi den Orashon

◼ Ta na su lugá pa duna alabansa na Yehova komo e Fuente di instrukshon.

◼ Ekspresá interes sinsero den e studiante.

◼ Ekspresá apresio pa e organisashon ku Yehova ta usando.

◼ Pidi Yehova bendishoná e studiante su esfuersonan pa apliká loke e ta siñando.

Parti 8: Dirigí Studiantenan na e Organisashon

E meta ku nos ke logra studiando Beibel ku otro hende no ta solamente pa duna e studiantenan informashon enkuanto doktrina sino tambe pa yuda nan bira parti di e kongregashon kristian. Tuma un par di minüt tur siman na e estudio pa kompartí un punto tokante Yehova su organisashon.—km-PA 4/05 pág. 8.

Reunionnan di Kongregashon

◼ Deskribí kada reunion di kongregashon. Invitá nan na reunion for di e promé bes ku bo studia ku nan.

◼ Kompartí puntonan sobresaliente ku a bin padilanti na e reunionnan.

◼ Lanta entusiasmo pa Memorial, asambleanan i e bishita di superintendente di sirkuito.

◼ Usa plachinan den nos publikashonnan pa yuda nan visualisá loke ta tuma lugá.

◼ Animá nan pa lesa e foyeto Testigonan di Jehova—Ken Nan Ta? Kico Ta Nan Creencianan?

Usa e Vidionan pa Edifiká Apresio

◼ Testigonan di Jehova—E Organisacion Tras dje Nomber

◼ Henter Nos Asosiashon di Ruman

◼ Uní pa Medio di Siñansa Divino

◼ Te na e Finnan di Tera

Parti 9: Prepará Studiantenan pa Duna Testimonio Informal

Ora studiantenan di Beibel kuminsá ehersé fe den loke nan ta siñando, nan ta sinti nan impulsá pa papia tokante esei.—km-PA 5/05 pág. 1.

Animá Nan pa Duna Testimonio

◼ Tin amigu i famia ku nan lo por invitá pa djòin nan ora di studia?

◼ Nan tin kolega di trabou, kompañero di skol òf otro konosínan ku a mustra interes?

Siña Nan Kompartí Nan Kreensianan

◼ Na sierto puntonan durante e estudio, puntra e studiante: “Kon lo bo usa Beibel pa splika e bèrdat aki na bo famia?”

◼ Yuda e studiante mira ku nos mester mustra rèspèt i amabilidat ora nos ta papia ku otro hende tokante Dios i su propósitonan.

◼ E studiantenan por usa e foyeto Testigonan di Jehova—Ken Nan Ta? Kico Ta Nan Creencianan? pa yuda famia i amigunan komprondé nos kreensia- i aktividatnan ku ta basá riba Beibel.

Parti 10: Train Studiantenan den e Ministerio di Kas pa Kas

Ora e ansianonan determiná ku un studiante di Beibel ta kualifiká komo un publikadó no-batisá, e por kuminsá sali huntu ku e kongregashon den e predikashon.—km-PA 6/05 pág. 1.

Prepará Huntu

◼ Mustra e publikadó nobo na unda e por haña presentashonnan sugerí.

◼ Yud’é skohe un introdukshon simpel ku ta práktiko pa boso teritorio.

◼ Anim’é pa usa e Beibel den su ministerio.

◼ Train un presentashon huntu. Mustr’é kon e por trata ku e diferente reakshonnan ku ta komun, sin ofendé hende.

Prediká Huntu

◼ Laga e studiante opservá kon bo ta duna e presentashon ku boso dos a prepará huntu.

◼ Tene kuenta ku e personalidat i abilidat di e studiante. Den algun kaso, kisas ta mihó pa lag’é hasi solamente un parti di e presentashon.

◼ Yuda e publikadó nobo establesé un programa pa partisipá den sirbishi riba un base regular.

Parti 11: Yuda Publikadónan Nobo Hasi Rebishita

Preparashon pa un rebishita ta kuminsá for di e promé bishita. Animá e studiante pa mustra interes sinsero den e personanan ku e papia kuné. Na un manera progresivo, train e pa animá e doñonan di kas pa ekspresá nan mes, p’e skucha loke nan ta bisa i tuma nota di loke ta preokupá nan.—km-PA 7/05 pág. 1.

Prepará pa Bai Bèk

◼ Repasá e promé kòmbersashon, i mustra e studiante kon pa selektá un tópiko ku lo atraé e doño di kas.

◼ Prepará huntu kuné un presentashon breve den kua tin un teksto di Beibel i un paragraf for di un publikashon.

◼ Formulá un pregunta ku e por hasi na final di e kòmbersashon.

Sea Diligente den Hasi Rebishita

◼ Animá e studiante pa bolbe bèk lihé serka tur hende ku mustra interes.

◼ Yuda e studiante mira ku ta nesesario pa persistí den purba haña kontakto ku e hendenan ku ta difísil pa haña na kas.

◼ Siña e studiante kon pa traha afsprak pa hasi rebishita i yud’é komprondé ku e tin ku bolbe manera el a primintí.

Parti 12: Yuda Studiantenan Kuminsá i Kondusí Estudio di Beibel

Ta masha importante pa bo imitá Hesus dor di pone un bon ehèmpel den bo propio sirbishi. Segun ku bo studiante ta opservá bo ehèmpel den e ministerio, lo e komprondé ku e meta di hasi rebishita ta pa kuminsá estudio di Beibel.—km-PA 8/05 pág. 1.

Kon pa Ofresé un Estudio di Beibel

◼ Splika e studiante ku generalmente no ta nesesario pa deskribí e areglo di estudio en detaye.

◼ Hopi bes ta mihó pa simplemente demostrá e estudio dor di usa un òf kisas dos paragraf for di un publikashon di estudio.

◼ Repasá i train un di e sugerensianan kon pa kuminsá estudio di Beibel.—km-PA 8/05 pág. 8; km-PA 1/02 pág. 6.

Train Studiantenan pa Ta Maestro

◼ Animá studiantenan pa inskribí den e Skol di Ministerio Teokrátiko.

◼ Hasi areglo pa publikadónan nobo bai otro estudionan di Beibel kaminda nan lo por tin un parti chikitu den siña otro hende.