Prepará Bon pa Siña Hende
1. Ora nos ta dirigí un estudio, pakiko nos mester hasi esfuerso pa yuda e studiante kapta loke e ta siña for di Beibel i haña apresio pa esaki?
1 Ora nos ta dirigí un estudio di Beibel, nos mester ta bon prepará si nos ke motivá e studiante pa sirbi Yehova. Pa nos esfuersonan duna fruta, nos mester yuda e studiante kapta loke e ta siña for di Beibel i haña apresio pa esaki. I e apresio akí lo motiv’é pa sirbi Yehova. (Deu. 6:5; Pro. 4:23; 1 Kor. 9:26) Pero kon eksaktamente nos por hasi esaki?
2. Kon orashon por yuda nos prepará bon pa un estudio?
2 Hasi Orashon Komo Parti di Bo Preparashon: Esun ku ta pone e simia di e bèrdat krese den kurason di e studiante ta Yehova. P’esei ta bon pa nos kuminsá prepará pa e estudio hasiendo orashon spesífikamente pa e studiante, ku su nesesidatnan partikular na mente. (1 Kor. 3:6; Sant. 1:5) Tal orashon por yuda nos determiná tambe kon nos por sigui gui’é pa su kurason yena “ku e konosementu” di Yehova su boluntat.—Kol. 1:9, 10.
3. Kon nos por prepará ku e studiante na mente?
3 Pensa Riba e Studiante: Hesus tabata sa ku pa su siñansa duna resultado, e mester a tene kuenta ku su oyentenan. Na por lo ménos dos okashon, hende a hasi Hesus e mesun pregunta: “Kiko mi mester hasi pa heredá bida eterno?” Hesus a kontestá kada un na un manera diferente. (Luk. 10:25-28; 18:18-20) Ora nos ta prepará, nos mester pensa riba e studiante. Kua di e tekstonan menshoná nos lo lesa kuné? Kuantu informashon nos lo purba abarká? Ki puntonan den e lès e studiante lo por tin difikultat pa komprondé òf pa aseptá? Si nos por antisipá algun di e preguntanan ku e studiante lo por hasi nos, nos lo ta mihó prepará pa kontestá nan na un manera satisfaktorio.
4. Kiko bon preparashon ta enserá?
4 Repasá e Informashon: Maske kuantu biaha nos a studia e informashon den pasado, lo ta promé biaha ku nos ta trat’é ku e studiante en partikular. Pa nos alkansá su kurason, ta importante pa nos prepará bon pa kada estudio. Esei ta nifiká hasi loke nos ta animá nos studiante pa hasi. Repasá e informashon, inkluso e tekstonan menshoná, ku e studiante na mente. Kisas ta bon tambe pa hala strepi bou di e puntonan klave.—Rom. 2:21, 22.
5. Kon nos por imitá Yehova?
5 Yehova ta sumamente interesá den e progreso di kada studiante di Beibel. (2 Ped. 3:9) Ora nos ta tuma tempu pa prepará pa kada estudio di Beibel, nos ta demostrá e mesun interes amoroso ei.