Kaha Di pregunta

◼ Si un publikadó femenino ta kondusí un estudio na porta den kompania di un publikadó maskulino, e tin ku tapa su kabes?

Ora un publikadó femenino ta kondusí un estudio di Beibel riba un base regular i un publikadó maskulino ta presente, e tin ku tapa su kabes. (1 Kor. 11:3-10) E Toren di Vigilansia di 15 di yüli 2002, página 27, ta bisa lo siguiente: “Esaki ta un areglo hasí di antemano pa duna siñansa kaminda esun ku ta kondusí e estudio en realidat ta [esun ku ta dirigí]. Den e kaso akí e areglonan di kongregashon ta konta pa e estudio. Si un Testigu femenino ta kondusí e estudio ei miéntras tin un Testigu maskulino batisá presente, ta korekto p’e ruman muhé tapa su kabes.” E mester hasi esaki sea ku e estudio di Beibel ta na un kas, na porta òf na kualke otro lugá.

Di otro banda, si no por papia ainda di un estudio regular di Beibel na porta, un ruman muhé no tin nodi di tapa su kabes ora un publikadó maskulino ta presente. Esaki ta konta asta si e ruman muhé ta hasi un rebishita pa mustra un doño di kas kon nos ta kondusí un estudio di Beibel òf ta analisá algun informashon for di un di nos publikashonnan di estudio. Komo ku lo tin ku rebishitá un doño di kas vários biaha promé ku por papia di un estudio di Beibel na porta, publikadónan tin ku usa sano huisio pa determiná na ki momento un ruman muhé mester kuminsá tapa su kabes.