Bo Ta Usa e Foyeto Rekerí pa Kuminsá Studio?
1 Bo tabata sa ku si bo ta konsiderá e Beibel regularmente i sistemátikamente ku un persona interesá—ounke ta brevemente—i bo ta trata e informashon ku tin den un di e publikashonnan rekomendá, bo ta kondusiendo un studio di Beibel? Sí, esaki ta e kaso asta si e studio ta tuma lugá na porta òf via telefòn. Pakiko no hasi un intento spesial durante mei ku yüni pa kuminsá un studio asina usando e foyeto Rekerí?
2 Prepará pa Bo Tin Éksito: Ora bo ta ofresé e foyeto Rekerí, tene bon kla na mente kiko bo kier papia di dje. Si bo ta bai hasi un rebishita, pensa riba e kòmbersashon ku bo tabatin durante e promé bishita. Puntra bo mes: ‘Kua paragrafnan den e foyeto mi por duna atenshon spesial pa sigui amplia e kòmbersashon ei i habri un studio di Beibel?’ Si bo ta bayendo di kas pa kas, pensa riba ki tópiko lo interesá un tiner, un hende di edat, un hende hòmber òf un hende muhé. Repasá e tópikonan prinsipal di e foyeto i selektá un tema ku hende lo ta interesá aden. Despues ku bo skohe un introdukshon, praktik’é vários biaha. Esaki ta un di e maneranan pa logra éksito.
3 E suplemento di Nos Ministerio di Reino di yanüari 2002 a duna ocho ‘Sugerensia pa Presentá e Foyeto Rekerí.’ E kuadro “E Método Direkto” ta mustra kon pa usa e foyeto pa kuminsá studio. Lo bo por adaptá e promé sugerensia na e siguiente manera:
◼ “Bo tabata sa ku dor di tuma djis un par di minüt, bo por haña kontesta riba un pregunta importante di Beibel? Por ehèmpel, dikon tin asina tantu religion ku ta bisa di ta kristian? Bo a yega di puntra bo mes esei?” Despues ku e persona kontestá, bai na lès 13 i trata e promé dos paragrafnan. Si tin tempu, lesa i trata un òf dos teksto bíbliko. Kaba lesa e último pregunta na kabes di e página, i bisa: “E restu di e lès ta hala atenshon na sinku punto ku ta identifiká e religion berdadero. Gustosamente lo mi bolbe bèk i konsiderá esakinan ku bo.”
4 Sea Pèrsistente: Probechá di tur oportunidat pa demostrá kon ta studia Beibel ku e foyeto Rekerí. Pidi Yehova su bendishon. (Mat. 21:22) Dor di sigui hasi esfuerso, lo bo por sinti e goso di yuda un hende reakshoná faborabel riba e bon nobo!