Proclamá e Bon Nobo di Reino cu Foyetonan
1 Ta ki un goso pa conocé e berdad i pa ta entre esnan cu celosamente ta proclamando e bon nobo! Hende cu ta pafó di Dios su organisacion urgentemente tin cu tende e bon nobo di Reino. E berdad tocante e Reino ta ser splicá den un manera simpel den e foyetonan Disfruta di bida riba tera pa semper!, “Mira! mi ta traha tur cos nobo” i E gobierno cu lo restorá paradijs. E foyetonan ta describí na forma bibu con bida riba tera lo ta bou dje Reino di Dios, i nan ta dirigí e lector na e realidadnan di Reino cu ta ser splicá den e Palabra di Dios. Naturalmente, lagando un foyeto cu un persona interesá ta solamente e comienso di nos trabou. (1 Cor. 9:23) Laga nos rebishitá unbes tur persona cu a tuma foyeto, cu e meta di ofrecé un studio den e buki Conocimentu cu Ta Hiba na Bida Eterno. Con nos por logra esaki durante augustus?
2 Por ofrecé e foyeto “Disfruta di bida riba tera pa semper!” cu un presentacion masha breve. Segun cu bo ta mustra su portada, lo bo por bisa:
◼ “Lo mi kier mustrá bo algu cu ta contené un bunita mensahe.” Habri e foyeto Bida riba tera, i lesa e promé paragraf dje introduccion. Anto sigui: “E ta contestá tambe e pregunta aki [bai na e tema riba plachi number 8]: ‘Pakico hende ta muri?’ Lo bo hañ’é interesante pa studia e plachinan i lesa e textonan bíblico cu ta den e foyeto aki. Si bo kier haci esei, bo por keda cu e foyeto aki pa un contribucion chikitu.”
3 Kico lo bo bisa ora di rebishitá un persona cerca ken bo a laga e foyeto “Bida riba tera”? Lo bo por purba e sugerencia aki:
◼ Mustra plachi number 49 den e foyeto Bida riba tera i puntra, “Esaki no ta un bunita plachi? [Permití contesta.] E ta den e foyeto cu mi a laga cu bo biaha pasá. Lo mi kier hací bo e pregunta riba e siguiente página.” Bai na plachi number 50 i lesa e pregunta: “ ‘Bo kier biba pa semper den e paradijs bunita?’ [Permití contesta.] Si esei ta bo deseo, ripará loke e ta bisa cu bo mester haci: ‘Anto siña mas dje Palabra di Dios.’ [Lesa Juan 17:3.] Gustosamente lo mi studia e Bijbel cu bo grátis. Lo bo kier esei?” Traha un afsprak definitivo pa regresá.
4 Ora di ofrecé e foyeto “Mira! mi ta traha tur cos nobo,” lo bo por cuminsá dor di mustra henter e plachi riba e kaft i puntra:
◼ “Kico bo ta kere lo ta necesario, pa haci henter e tera manera e plachi aki?” Permití contesta. Describí algun dje rasgonan dje plachi, cu ta ser relatá na página 3. Anto bisa: “Mayoria hende ta kere cu ta imposibel pa haci e mundu asina aki. Pero esei no ta imposibel pa Dios logra. [Compartí puntonan den §43; anto lesa Isaías 9:6, 7.] Dios a primintí di trece un mundu nobo den cua hende di tur nacion lo disfrutá di un paradijs maraviyoso. Lo mi kier pa bo lesa e foyeto aki. Lo e mustrá bo con abo i bo famia por disfrutá di un futuro maraviyoso cu Dios lo establecé.”
5 Na e rebishita, lo bo por usa e foyeto “Mira!” pa splica pakico ta necesario pa siña mas tocante e Bijbel. Kisas bo por mustra e kaft atrobe i bisa:
◼ “E promé biaha cu mi a mustrá bo e plachi aki, nos a bai di acuerdo cu nos lo gusta mashá di biba den un mundu maraviyoso asina. Pa haci esaki posibel, tin algu cu nos tur tin cu haci.” Habri e foyeto “Mira!” na §52; lesa e paragraf i e texto na Juan 17:3. Conectá e informacion ei cu e comparacion den §53 tocante un educacion bíblico apropiado, i despues splica cu Testigonan di Jehova ta ofrecé tal instruccion grátis na cas. Ofrecé pa demostrá nos método di studio, usando e buki Conocimentu.
6 Ora di ofrecé e foyeto “E gobierno cu lo restorá paradijs,” lo bo por purba di bisa esaki:
◼ “Mi a tende hopi hende bisa cu nan lo tin gana di biba bou di un gobiernu cu realmente por solucioná e problemanan grandi cu nos ta enfrentá awe. [Mencioná problemanan local manera desempleo, criminalidad aumentante of abusu di droga.] E cosnan aki ta laga nos sinti masha insigur pa cu nos futuro i di nos stimánan. Bo ta kere cu un dia lo tin un gobiernu cu lo solucioná e problemanan aki? [Permití contesta.] Kisas bo a resa e Oracion di Nos Tata. Si ta asina, bo tabata sa cu en realidad bo ta pidiendo den oracion pa un gobiernu hustu?” Bai na página 3 den e foyeto Gobierno, i lesa e promé dos paragrafnan. Ofrecé e foyeto.
7 Si bo a laga e foyeto “E gobierno cu lo restorá paradijs,” lo bo por cuminsá e consideracion n’e rebishita dor di bisa:
◼ “Biaha pasá nos a considerá pakico nos tin mester di un gobiernu hustu cu por solucioná e problemanan di hende. E foyeto cu mi a laga cu bo ta señalá n’e Reino di Dios como nos único speransa. Algun hende ta puntra nan mes kico e gobiernu ei lo por haci pa mehorá nos situacion. Bijbel ta mustra cu Cristo a duna prueba caba cu lo e tin éxito caminda lidernan humano a fracasá.” Habri e foyeto Gobierno na página 29, i lesa e último cuater paragrafnan. Anto bisa: “Esei no ta un futuro maraviyoso? Lo bo kier mir’é?” Permití contesta. Lesa Juan 17:3. Animá e persona pa siña mas mediante un studio di Bijbel na cas.
8 Si bo ta usando otro foyetonan, bo por prepará bo mes presentacionnan, usando esnan sugerí ariba como ehempel. Corda mencioná e contribucion pa nos foyetonan. Prepará bon i busca Jehova su bendicion segun cu bo ta proclamá e bon nobo di Reino.