Dependé Riba Jehova pa Haci Cosnan Crece
1 “Pa promé biaha mi a experenciá e goso único di yuda establecé un congregacion nobo. Esaki a rekerí mas cu dos aña di trabou diligente, oracion constante i dependé riba Jehova cu ta ‘haci cosnan crece.’ ” Asina un pionero conciencial cu a siña cu mester dependé riba Jehova pa cos crece, a skirbi. (1 Cor. 3:5-9) Den nos búskeda pa hende spiritualmente incliná, nos tambe tin mester di Dios su apoyo pa nos ministerio por producí fruta.—Pro. 3:5, 6.
2 Crecementu Ta Rekerí Cultivacion: Pa e simia dje berdad crece e mester ser cultivá. Bolbiendo bek den un of dos dia despues dje bishita inicial hopi bes ta producí bon resultado. Sea caluroso i amigabel. Laga e persona sintié cómodo. No papia abo so. Dun’é chens pa conocé bo, i mustra cu bo ta interesá den dje como persona.
3 Durante juli i siguiendo den augustus, nos ta concentrá riba ofrecé un variedad di foyeto na e hendenan cu nos topa. Sin embargo, tambe nos tin cu sigui cultivá e interes cu nos haña i wak con a bai caminda nos a laga literatura. Nos ta haci esaki dor di haci rebishita i ofrecé studio di Bijbel. (Mat. 28:19, 20) Pa logra esaki, nos por usa e foyeto Rekerí pa cuminsá studionan. Tal bes bo ta haña e siguiente cuater sugerencianan útil.
4 Si bo a papia cu un persona cu tabata preocupá cu e direccion den cua e mundu ta bayendo, lo bo por reanudá e combersacion dor di bisa:
◼ “Mi ta kere cu bo ta mes preocupá cu mi tocante e degeneracion moral den sociedad humano. Nos ta tende informenan angustioso di violencia doméstico, cu ta hiba na abusu di mucha, mayor i casánan. I ta parce cu hopi hende lo gaña of horta djis pa satisfacé nan propio deseonan. Bo ta pensa cu ta importá Dios con hende ta hiba nan bida? [Permití contesta.] Dios a establecé cierto normanan pa hende biba segun nan, i nan realmente no ta un carga pisá pa nos.” Lesa 1 Juan 5:3. Caba presentá e foyeto Rekerí, i habrié na les 10. Lesa e promé paragraf. Señalá e palabranan i frasenan cu letter cursivo na cuminsamentu di §2-6, i puntra e doño di cas cua dje prácticanan ei e ta kere ta esun mas perhudicial pa sociedad. Lesa e paragraf relacioná cu esei i busca un of dos dje textonan bíblico segun oportunidad ta permití. Concluí dor di lesa §7, i e ora ei haci areglo pa pasa bek pa mas consideracion.
5 Na esnan cu bo a topa cu ta preocupá tocante nan famia, lo bo por bisa algu asina aki:
◼ “Bo no ta kere ta razonabel pa verwagt cu e Creador lo duna nos e hermentnan cu nos mester pa edificá un bida di famia exitoso?” Permití contesta. Introducí e foyeto Rekerí, bai na les 8, i splica cu e ta contené principionan for di Bijbel pa cada miembro dje famia. Ofrecé pa demostrá con pa usa e foyeto huntu cu e Bijbel pa saca e mayor beneficio for di dje. Sigui e instruccionnan cu bo ta haña na página 2 dje foyeto. Haci areglo pa pasa bek pa sigui cu e studio dje les, of si bo a complet’é, pa studia un otro les cu e doño di cas ta scoge den e foyeto.
6 Ata aki un método directo cu lo bo por usa pa ofrecé nos programa pa studia Bijbel. Mustra e foyeto “Rekerí,” i bisa:
◼ “E foyeto aki ta contené un curso di studio completo cu ta abarcá e siñansanan básico di Bijbel. Na cada página, lo bo haña contesta pa preguntanan cu a molestiá hende pa siglonan. Por ehempel, Kico ta Dios su propósito pa e tera?” Bai na les 5, i lesa e preguntanan na cuminsamentu dje les. Puntra e doño di cas cua di nan ta interes’é mas tantu, i e ora ei lesa e paragraf(nan) corespondiente, buscando e textonan apropiado. Splica cu por haña e contesta satisfactorio pa e otro preguntanan mésun fácil cu a haña esun aki. Sugerí pa bo bolbe bek atrobe pa considerá un otro pregunta i contesta.
7 Of tal bes bo ta preferá di purba un método mas simpel pa cuminsá un studio di Bijbel dor di bisa:
◼ “Bo tabata sa cu dor di tuma djis un par di minuut, bo por haña e contesta na un pregunta importante di Bijbel? Por ehempel, . . .” E ora ei haci un pregunta cu ta aparecé na cuminsamentu di un dje lesnan den e foyeto, un pregunta cu bo ta pensa lo hala atencion dje persona. Pa haña algun idea di preguntanan cu lo bo por usa, wak §15 i 16 dje suplemento di Nos Ministerio di Reino di mart 1997, titulá: “Tuma un Curashi pa Haci Rebishita.”
8 Aceptá cu goso e desafio di haci rebishita i conducí studio di Bijbel ta parti di ta Dios su “colaboradónan.” (1 Cor. 3:9) Segun nos ta traha duru pa cultivá e interes cu nos haña i despues dependé riba Jehova pa haci cosnan crece, nos lo experenciá e berdadero satisfaccion cu ningun otro trabou por duna.