Warda Esaki

Presentashonnan Sugerí pa Sirbishi di Fèlt

Kon pa Usa e Suplemento Aki

Mayoria dje siguiente presentashonnan aki a sali den edishonnan anterior di Nos Ministerio di Reino. Si bo kier bo por purba nan tur den bo aktividat di duna testimonio, i wak ki resultado bo ta haña. Warda e suplemento aki i repas’é ora bo ta prepará p’e ministerio.

Bo por lanta un persona su interes den e Palabra di Dios si bo mensahe ta breve i al kaso. Hasi un pregunta spesífiko, kaba lesa e kontesta bíbliko breve. Lo bo por purba e sugerensianan aki:

“Ora bo ta pensa riba futuro, bo ta sinti bo optimista òf insigur? [Pèrmití e persona kontestá.] Beibel a pronostiká e susesonan inkietante ku nos ta mira awe i tambe nan resultado.”—2 Tim. 3:1, 2, 5; Pro. 2:21, 22.

“Awe hende ta masha preokupá ku kuido di salú. Bo tabata sa ku Dios ta primintí ku lo e solushoná tur problema di salú di una bes pa semper?”—Isa. 33:24; Rev. 21:3, 4.

“Bo tabata sa ku Beibel ta pronostiká ku un dia lo tin un solo gobièrnu pa henter mundu?”—Dan. 2:44; Mat. 6:9, 10.

“Kon bo ta kere mundu lo tabata si ta Hesukristu tabata goberná e tera?”—Sal. 72:7, 8.

“Hopi hende ta ser diskriminá debí na nan sekso, religion òf rasa. Kiko bo ta kere Dios ta pensa di tal prehuisio?”—Echo. 10:34, 35.

“Nos sa ku Hesukristu a hasi hopi milager den su tempu. Si bo por a pidié hasi un milager mas, kiko lo bo a pidi?”—Sal. 72:12-14, 16.

“Awe mayoria hende ta kansá di tende di problema. Nan kier tende di solushon. Pero unda nos por haña berdadero solushon pa nos problemanan?”—2 Tim. 3:16, 17.

“Bo sa kua ta e Reino ku bo ta pidi p’e den e Orashon di Nos Tata?”—Rev. 11:15.

Pregunta pa Kuminsá Kòmbersashon

Aki ta sigui un lista di pregunta, kompilá for di tópikonan dje buki Razonamentu, huntu ku e number di página dje buki na spañó, kaminda bo ta haña kada kontesta:

Tur bon hende ta bai shelu? (72)

Un hende mester bai shelu p’e tin un futuro realmente felis? (73)

Tin motibunan sólido pa kere den Dios? (118)

Realmente Dios ta interesá den loke ta pasa ku hende? (119)

Dios ta un berdadero persona? (120)

Dikon tin asina tantu maldat? (194)

Pakiko ta importante pa sa i usa Dios su nòmber personal? (203)

Ta Hesukristu mes ta Dios? (209)

Kiko por yuda drecha un matrimonio? (239)

Dikon nos ta bira bieu i muri? (245)

Kiko ta e kondishon dje mortonan? (246)

Ken ta goberná mundu: Dios òf Satanas? (257)

Kiko e Reino di Dios lo logra? (302)

Dios ta aseptá tur religion? (309)

Kon un hende por sa kua religion ta korekto? (315)

Kuantu poder Satanas tin den e mundu aktual? (358)

Dikon Dios ta pèrmití sufrimentu? (373)

Kiko ta e propósito di bida humano? (429)

Sugerensianan pa Presentá e Foyeto Rekerí

“Sin duda bo ta di akuerdo ku hopi hende ta kere den Dios. Tur hende ku ta kere den Dios ta di akuerdo ku e ta rekerí algu for di nos. E loke hende no por yega na un akuerdo riba dje ta: Kiko Dios ta rekerí di nos?” Presentá e ora ei e foyeto Rekerí, bai na lès 1 i konsider’é ku e persona.

“Ku asina tantu problema den bida di famia awe, bo a yega di puntra bo mes kiko ta e sekreto pa haña felisidat den famia?” Despues ku e persona kontestá, splika ku den Beibel, Dios ta revelá e berdadero sekreto pa felisidat den famia. Lesa Isaías 48:17. Anto bai na lès 8 dje foyeto Rekerí, i señalá algun dje versíkulonan di Beibel ku ta perkurá guia konfiabel pa kada miembro di famia. Lesa e seri di pregunta na kuminsamentu dje lès. Puntra e persona si lo e kier lesa e kontestanan.

“E foyeto aki ta kontené un kurso di studio kompleto ku ta abarká e siñansanan básiko di Beibel. Na kada página, lo bo haña kontesta pa preguntanan ku a preokupá hende pa siglonan. Por ehèmpel: Kiko ta Dios su propósito pa e tera?” Bai na lès 5, i lesa e preguntanan na kuminsamentu dje lès. Puntra e doño di kas kua di nan ta interes’é mas tantu, i e ora ei lesa e paragraf(nan) korespondiente, i buska den Beibel e tekstonan apropiado. Splika ku e por haña kontesta satisfaktorio riba e otro preguntanan mes fásil ku el a haña riba esun aki. Sugerí pa bo bolbe bèk atrobe pa konsiderá un otro pregunta.

“Kiko bo ta kere ta e motibu di tur e violensia ku tin na skolnan públiko? Ta debí na falta di guia di parti di mayornan? Òf por ta otro kos, manera por ehèmpel e influensia di Diabel?” Pèrmití e persona kontestá. Si e persona bisa ku ta debí n’e influensia di Diabel, lesa Revelashon 12:9 i 12. Mustra ku ta Diabel ta esun ku ta fomentá turbulensia den mundu. Kaba, habri e foyeto Rekerí na lès 4, i puntra e persona si el a yega di puntra su mes di unda Diabel a bini. E ora ei lesa i konsiderá e promé dos paragrafnan. Si e persona skohe ku e motibu pakiko tin violensia na skol ta “debí na falta di guia di parti di mayornan,” lesa 2 Timoteo 3:1-3 i señalá e karakterístikanan ku evidentemente ta kontribuí na e problema aki. Anto habri e foyeto Rekerí na lès 8, lesa paragraf 5, i sigui ku e konsiderashon.

“Bo ta kere ta razonabel pa ferwagt ku e Kreador lo duna nos e konosementu ku nos mester pa edifiká un bida di famia eksitoso?” Despues ku e persona kontestá, introdusí e foyeto Rekerí. Bai na lès 8, i splika ku e ta kontené prinsipionan di Beibel pa kada miembro di famia. Ofresé pa demostrá kon pa usa e foyeto huntu ku Beibel pa saka e mayor benefisio for di dje.

“Ku tur e problemanan difísil ku nos ta enfrentá den e bida djawe, bo ta kere ku di bèrdat orashon por yuda nos? [Pèrmití e persona kontestá.] Hopi hende ta bisa ku orashon ta duna nan fortalesa interno. [Lesa Filipensenan 4: 6 i 7.] Tòg, un persona por sinti ku su orashonnan no ta ser kontestá. [Habri e foyeto Rekerí na lès 7.] E foyeto aki ta splika kon nos por saka mayor probecho for di orashon.”

“Nos tabata papia ku nos bisiñanan tokante pakiko tin asina tantu diferente religion na mundu i tòg ta un Beibel so tin. Segun bo, pakiko ta eksistí e konfushon aki di religion? [Pèrmití e persona kontestá. Habri e foyeto Rekerí na lès 13, i lesa e preguntanan di introdukshon.] Lo bo risibí kontesta satisfaktorio riba e preguntanan ei dor di lesa e lès aki.”

Despues di laga e revistanan Toren di Vigilansia i Spièrta! ku un persona, puntr’é si bo por lesa un paragraf kòrtiku p’e. Si e pèrmití bo hasi esei, habri e foyeto Rekerí na lès 5. Mustr’é e seri di pregunta ku tin na komienso dje lès, i pidié skucha i mira si e no ta haña e kontesta riba e promé pregunta segun ku bo ta lesa e promé paragraf. Despues di a lesa e paragraf, hasi e pregunta i lagu’é kontest’é. Ofresé e foyeto i, si e persona asept’é, hasi areglo pa bo bolbe bèk pa haña sa su kontesta riba e siguiente dos preguntanan den e seri.

Sugerensianan pa Presentá e Buki Conocimentu

Ku Beibel den man, kuminsá bisa: “Nos ta kompartiendo un teksto di Beibel ku tur hende den bo kaya awe. E ta bisa . . .” Lesa Huan 17:3, anto puntra e persona: “Bo a ripará kiko Beibel ta primintí si nos tin e klase di konosementu korekto? [Pèrmití e persona kontestá.] Unda un hende por haña e konosementu ei?” Despues ku e persona kontestá, mustr’é e buki Conocimentu, i bisa: “E buki aki ta dirigí bo na e konosementu ku ta hiba na bida eterno. E ta hasi esei dor di kontestá e preguntanan mas komun ku hende tin tokante Beibel.” Mustra e persona e lista di tema, i puntr’é si el a yega di puntra su mes tokante kualkier un dje tópikonan ei.

“Bo a yega di puntra bo mes si Dios realmente ta preokupá ku e inhustisia i sufrimentu ku nos ta mira rònt di nos òf ku nos mes ta eksperensiá? [Pèrmití e persona kontestá.] Beibel ta sigurá nos ku Dios stima nos i ku lo e yuda nos pasa dor di tempu di angustia.” Lesa partinan di Salmo 72:12-17. Habri e buki Conocimentu na kapítulo 8, i indiká ku e buki aki ta duna un kontesta konsolador riba un pregunta ku miónes di hende a yega di hasi: Pakiko Dios ta pèrmití sufrimentu? Si ta posibel, trata algun dje pensamentunan bíbliko ku tin den paragraf 3 te ku 5, òf hasi esei ora bo rebishitá e persona.

“Mayoria di nos a pèrdè un ser kerí den morto. Bo a yega di puntra bo mes si nos lo mira nan atrobe? [Pèrmití e persona kontestá.] Hesus a duna prueba ku nos sernan kerí por ser reskatá for di morto. [Lesa Huan 11:11, 25, 44.] Maske esaki a tuma lugá siglonan pasá, e ta demostrá loke Dios a primintí di hasi pa nos.” Habri e buki Conocimentu n’e plachi na página 85 i lesa loke ta pará skirbi n’e plachi. Despues mustra e plachi na página 86 i komentá riba dje. Pone un fundeshi pa e siguiente bishita dor di puntra: “Lo bo kier sa mas tokante e motibu pakiko hende ta bira bieu i muri?” Bolbe bèk pa trata kapítulo 6.

“Bo a yega di puntra bo mes pakiko hende ta anhelá un bida mas largu?” Despues ku e persona kontestá, habri e buki Conocimentu na kapítulo 6 i lesa paragraf 3. Razoná riba e tekstonan menshoná den e paragraf. Referí na e dos preguntanan na fin dje paragraf, anto puntra e persona si e mes lo kier mira e kontestanan. Si e kier esei, sigui konsiderá e siguiente par di paragrafnan.

“Nos ta puntrando hende si nan ta kere esaki . . .” Lesa Génesis 1:1, kaba puntra: “Bo ta di akuerdo ku e deklarashon ei?” Si e persona ta di akuerdo, anto bisa: “Mi tambe. Sin embargo, bo ta kere ku si Dios a krea tur kos, ta e mes tambe ta responsabel pa maldat?” Despues di tende e persona su kontesta, lesa Eklesiástes 7:29. Habri e buki Conocimentu na kapítulo 8, i lesa paragraf 2. Si e persona no ta di akuerdo ku e deklarashon na Génesis 1:1, anim’é p’e eksaminá e evidensia ku e Kreador ta eksistí.—Wak e buki Razonamentu na spañó, página 87-9.

“Debí ku normanan moral ta kambia asina lihé awe, bo no ta haña ku nos tin mester di un guia konfiabel den bida? [Pèrmití e persona kontestá.] Ounke Beibel ta un dje bukinan mas bieu ku tin, e ta duna konseho práktiko pa bida moderno i pa un bida di famia felis.” Bai e ora ei na kapítulo 2 di e buki Conocimentu, i lesa paragraf 10 i e promé frase di paragraf 11, inkluso 2 Timoteo 3:16 i 17.

“Lo bo tin gana di sa kiko tin den futuro pa nos i pa e tera? [Pèrmití e persona kontestá.] Beibel ta resumí e futuro den un solo palabra: Paradeis! Ei ta kaminda Dios a pone e promé pareha humano ku el a krea. Tuma nota dje deskripshon aki ku ta duna un idea kon bida den e paradeis ei lo mester tabata.” Habri e buki Conocimentu na página 8, i lesa paragraf 9, bou dje suptema “Bida den Paradeis.” Kaba konsiderá e puntonan den paragraf 10, i lesa e teksto menshoná, Isaías 55:10 i 11. Ofresé pa sigui konsiderá kon bida den e Paradeis restorá lo ta i trata paragraf 11-16.

Ora bo ta rebishitá hende ku a tuma e revistanan Toren di Vigilansia i Spièrta!, lo bo por bisa esaki:

“Último biaha ku mi a pasa mi a keda kontentu di por a laga E Toren di Vigilansia ku bo. Kisas bo a ripará ku e título kompleto dje revista ta E Toren di Vigilansia Anunsiando e Reino di Yehova Dios. Awe lo mi kier splika bo kiko e Reino aki ta i kiko e por nifiká pa abo i bo famia.” Anto habri e foyeto Rekerí na lès 6, i lesa i trata e lès te kaminda e persona tin tempu p’e.

“Poko dia pasá mi a bishitá bo i a laga ku bo e revistanan Toren di Vigilansia i Spièrta! E revistanan aki ta oumentá hende su rèspèt pa Beibel i pa su guia moral. Komo ku mi ta sinti ku ta esensial pa tur hende komprendé e Palabra di Dios, mi a bini bèk pa mustra bo algu ku lo yuda bo hasi esei.” Introdusí e foyeto Rekerí òf e buki Conocimentu, i ofresé un studio di Beibel.

Ora bo ta ofresé kualkier un dje bukinan di 192 página, bo por purba e presentashon aki:

“Awe hende ta pone hopi énfasis riba e nesesidat di edukashon di kalidat. Segun bo, ki sorto di edukashon un persona mester buska pa garantisá mayor felisidat i éksito den bida? [Pèrmití e persona kontestá. Anto lesa Proverbionan 9:10 i 11.] E buki aki [menshoná e título dje buki ku bo ta ofresiendo] ta basá riba Beibel. E ta indiká kua ta e úniko fuente di konosementu ku por hiba na bida eterno.” Mustra un ehèmpel spesífiko den e buki, i animá e persona pa les’é.

Otro Publikashonnan

Nos por haña presentashonnan sugerí pa otro buki i foyeto den Indèks di Publikashonnan Watch Tower bou di:

Presentashonnan

Lista Segun Publikashon

E Método Direkto

Pa kuminsá studio di Beibel, purba usa un dje métodonan direkto aki:

“Bo tabata sa ku dor di tuma djis un par di minüt, bo por haña kontesta riba un pregunta importante di Beibel? Por ehèmpel, . . .” Anto, hasi un pregunta ku ta aparesé na prinsipio di un dje lèsnan dje foyeto Rekerí i ku bo ta kere lo interesá e persona.

“Mi a pasa pa ofresé bo nos programa di studio di Beibel grátis. Den mas o ménos sinku minüt mi por mustra kon esei ta bai. Bo tin sinku minüt?” Si e kontesta ta sí, usa lès 1 dje foyeto Rekerí pa mustra kon e studio ta bai, lesando solamente un òf dos teksto di Beibel. Despues, puntra: “Ki dia lo bo tin un 15 minüt asina ku nos por trata e siguiente lès?”

“Hopi hende tin un Beibel, pero nan no ta realisá ku den dje tin kontesta riba preguntanan importante ku nos tur tin relashoná ku nos futuro. Usando e medio aki pa studia Beibel [e foyeto Rekerí òf e buki Conocimentu] pa mas o ménos un ora pa siman, lo bo por gana un komprendementu básiko di Beibel den apénas un par di luna. Ku muchu gustu lo mi mustra bo kon e lès ta bai.”

“Mi ta di bishita pa ofresé bo un kurso di Beibel grátis na kas. Si bo pèrmití mi, lo mi kier a tuma solamente un par di minüt pa demostrá kon hende, den rònt di 200 pais, ta konsiderá Beibel na kas komo famia. Nos por usa kualkier un dje temanan aki komo base pa un konsiderashon asina. [Mustra e lista di tema dje buki Conocimentu.] Kua tema ta ègt interesá bo?” Warda p’e persona skohe un. Bai n’e kapítulo ku el a skohe i kuminsá e studio den e promé paragraf.

“Mi ta duna lès di Beibel grátis i mi tin lugá den mi orario pa mas studiante. Nos ta usa e buki aki komo yudansa pa studia Beibel. [Mustra e buki Conocimentu.] E kurso ta dura solamente un par di luna i ta duna kontesta riba preguntanan manera: Pakiko Dios ta pèrmití sufrimentu? Pakiko nos ta bira bieu i muri? Kiko ta sosodé ku nos stimánan morto? I kon nos por hala serka Dios? Mi por mustra bo kon un lès ta bai?”

Si bo tin un presentashon efektivo ku ta logra lanta interes dje personanan, sigui us’é! Djis adapt’é na e oferta di literatura p’e luna koriente.