Predicá e Reino

¹ Na Hebreonan 10:23, nos ta ser instá pa “tene firmemente gará e declaracion público di nos speransa.” I nos speransa ta enfocá riba e Reino di Dios. Jesus specíficamente a manda pa e bon nobo di Reino ser predicá den tur nacion. (Mar. 13:10) Nos tin cu tene esaki na mente segun cu nos ta participá den nos ministerio.

² Ora nos haña contacto cu hende, nos ta purba start un combersacion tocante algu cu ta interesá of ta preocupá nan. Generalmente nos ta mencioná cosnan cu nan ta bon conciente di dje, manera, crímen den e becindario, e problemanan di hubentud, ansiedadnan pa gana nos pan di cada dia, of un crísis den asuntunan di mundu. Ya cu e mente di mayoria hende ta enfocá riba e “ansiedadnan di bida” aki, ora nos ta mustra cu nos ta interesá i comprensivo, hende hopi bes lo expresá loke ta preocupá nan. (Luc. 21:34) Esaki por habri e caminda pa nos compartí nos speransa.

³ Sin embargo, si nos no tene cuidou, e combersacion por keda drei riba cos negativo so te n’e punto cu nos no ta logra cumpli cu e propósito di nos bishita​—⁠esta, predicá e mensahe di Reino. Aunke nos ta hala atencion n’e mal condicionnan cu ta causa asina tantu angustia, nos meta ta pa dirigí atencion n’e Reino, cu al final lo resolvé tur e problemanan di humanidad. Nos tin un speransa berdaderamente maraviyoso cu hende tin cu tende di dje urgentemente. Pues, aunke na principio nos por considerá algun dje aspectonan dje ‘tempu crítico aki, duru pa trata cuné,’ rápidamente nos mester enfocá riba nos mensahe principal, e “bon nobo eterno.” Den e manera aki nos lo cumpli cu nos ministerio plenamente.​—⁠2 Tim. 3:1; 4:5; Rev. 14:⁠6.