Nos Ta Kompartí Nos Speransa di Reino
1 Durante e último dianan krítiko aki, hopi hende na mundu ta sin speransa. (Efe. 2:12) Otronan no a aktua sabí, poniendo nan konfiansa den rikesa material, gobernantenan humano, siensia moderno, etcetera. Nos ta masha felis ku nos sí tin berdadero speransa pa futuro, un speransa ku ta ‘un anker di e alma, sigur i firme.’—Heb. 6:19.
2 Bou di gobernashon di e Reino di Dios, e tera lo ser transformá den un paradeis. Nos sernan kerí ku a muri lo ser resusitá. (Echo. 24:15) Pobresa, inhustisia, malesa, behes i morto lo no eksistí mas. (Sal. 9:18; Mat. 12:20, 21; Rev. 21:3, 4) Esakinan ta algun di e promesanan di Yehova ku pronto lo haña nan kumplimentu. Kumplimentu di kua rasgo di nos speransa bo ta spera spesialmente ku anhelo?
3 Prediká e Bon Nobo: Nos no mester tene e speransa di Reino pa nos so. Amor pa Dios i pa próhimo ta motivá nos pa imitá Hesus i pa “prediká evangelio na e pobernan . . . proklamá libertat na e prezunan, i restorashon di bista na e siegunan [i] pa duna libertat na esnan ku ta wòrdu oprimí.” (Luk. 4:18) Apòstel Pablo a prediká e bon nobo na hende na plasa i unda ku e por a haña nan. El a okupá su mes intensamente ku e ministerio. (Echo. 18:5) Si nos ta sigui su ehèmpel di prediká ku entusiasmo den sirbishi, esaki lo evitá ku “preokupashonnan di mundu, i e engaño di rikesa” lo pone ku nos speransa kristian ta bira dòf.—Mar. 4:19.
4 Nos speransa di Reino no ta mengua ora nos topa hende ku ta indiferente, ku no ta mustra masha interes den e mensahe di Reino òf ku ta oponé nos abiertamente. Nos ta “tene firme na e konfeshon [òf, “deklarashon públiko,” NW] di nos speransa sin vasilá.” (Heb. 10:23) Nos no tin “bèrgwensa di e evangelio,” òf bon nobo. (Rom. 1:16) Podisé nos konvikshon i perseveransia opvio lo motivá algun hende pa skucha ku tempu.
5 Korektamente nos ta hala hende su atenshon na e kondishonnan di mundu ku ta deteriorando i ku ta kumpli ku profesia di Beibel. Pero nos no ta predikadónan di kalamidat. Mas bien, nos sirbishi ta enfoká riba nos speransa di Reino, esta, e bon nobo di e Reino di Dios. Laga nos prediká e bon nobo aki ku konvikshon i entusiasmo “pa asina realisá e siguransa kompletu di [nos] speransa te na fin.”—Heb. 6:11.