Kana Manera Hende Sabí
1 Ora Hesus a invitá kuater piskadó pa bira su siguidó, nan no a posponé nan desishon pero, ‘mesora nan a siguié.’ (Mat. 4:18-22) Ora Saulo di Tarso a kombertí i despues a rekobrá su bista, e tampoko no a pèrdè tempu sino, “mesora el a kuminsá proklamá Hesus den e snoanan.” (Echo. 9:20) Tempu ta move konstantemente den un direkshon, esta, padilanti; unabes ku e pasa, ta pa semper. P’esei, ta importante pa nos ‘kana manera hende sabí’ relashoná ku e uso di nos tempu.—Efe. 5:15, 16.
2 Suseso Imprevisto: Kisas mañan nos no tin e oportunidatnan ku nos tin awe pa sirbi Yehova. (Sant. 4:14) Tur hende por haña nan konfrontá ku “suseso imprevisto.” (Ekl. 9:11, NW) Ademas, nos tur su edat ta subi. I den e sistema di kosnan aki, nos no por skapa di e “dianan malu” ku edat avansá ta trese kuné i ku ta limitá loke nos por hasi den e sirbishi di Yehova. (Ekl. 12:1) P’esei anto, no ta sabí pa posponé nos dedikashon na Dios òf pa sinta warda pa sirkunstansianan ideal presentá pa nos por ekspandé nos sirbishi n’e grado ku aktualmente ta posibel. (Luk. 9:59-62) Abraham a haña pas i trankilidat durante su último añanan di bida i a muri “bieu i satisfecho” pasobra el a usa su bida na un manera sabí, kompletamente dediká na Yehova.—Gén. 25:8.
3 Tempu Ta Kòrtiku: Nos ke usa nos tempu na un manera sabí tambe pasobra e tempu ku a resta “ta kòrtiku.” (1 Kor. 7:29-31) No falta mashá pa e sistema bieu di kosnan aki terminá. Lo yega e dia ku lo no tin oportunidat mas pa partisipá den e gran rekohementu di hende ku kualidatnan di karné durante e “kosecha di tera.” (Rev. 14:15) Nos tin ku tene kuidou pa ansiedatnan di bida i otro distraishon no kita tempu ku nos lo por usa mihó den e ministerio. (Luk. 21:34, 35) Nos lo sinti un gran satisfakshon ora nos wak atras sabiendo ku nos a partisipá plenamente den e kosecha!
4 Nos mester vigilá konstantemente pa nos no pèrdè privilegionan gososo di sirbishi ku lo por presentá riba nos kaminda. Laga nos ta desididu pa hasi tur loke nos por pa sirbi Yehova “tanten ku por papia di ‘awe’” ainda. (Heb. 3:13) Hasiendo asina, nos lo mustra ku nos ta realmente sabí, pasobra ta “esun ku hasi e boluntat di Dios ta permanesé pa semper.”—1 Juan 2:17.