Nos Tin un Comision pa Predicá
1 Jesus a manda su siguidornan pa “haci disipel di hende di tur nacion.” (Mat. 28:19) Den 232 pais i grupo di isla rond e tera, mas cu cincu miyon alabador di Jehova Dios ta duna un testimonio bibu dje cumplimentu di Jesus su mandamentu. Pero kico di nos personalmente? Nos ta tuma na serio e comision pa predicá?
2 Un Obligacion Moral: Un comision ta “un mandato pa efectuá actonan prescribí.” Nos a ser mandá dor di Cristo pa predicá. (Echo. 10:42) Apostel Pablo a realisá cu esaki a pone riba dje un necesidad, of obligacion moral, pa declará e bon nobo. (1 Cor. 9:16) Pa ilustrá: Imaginá cu bo ta un tripulante riba un barcu cu ta sink. E capitan ta mandá bo advertí e pasaheronan i dirigí nan n’e botonan salbabida. Lo bo ignorá e mandato ei i concentrá riba salba solamente bo mes? Claro cu no. Otro hende ta dependé di bo. Nan bida ta den wega. Bo ta moralmente obligá di cumpli cu bo comision di yuda nan.
3 Nos a ser divinamente comisioná pa anunciá un advertencia. Pronto Jehova lo trece un fin na henter e mal sistema di cosnan aki. Miyones di bida ta den balansa. Lo ta corecto pa nos ignorá e peliger pa otronan i ta interesá solamente den salba nos mes? Naturalmente cu no. Nos ta moralmente obligá pa yuda salba e bida di otronan.—1 Tim. 4:16.
4 Ehempelnan Fiel pa Sigui: Profeta Ezekiel a sinti un responsabilidad pa duna un mensahe di advertencia na israelitanan infiel. Jehova enfáticamente a advertié dje consecuencianan si e keda sin cumpli cu su asignacion: “Ora mi bisa na un persona malbado, ‘Positivamente lo bo muri,’ i abo realmente no advertié . . . , dor cu e ta malbado, den su eror lo e muri, pero su sanger lo mi pidi bek for di bo mes man.” (Eze. 3:18) Ezekiel a cumpli cu su comision lealmente asta ora el a confrontá oposicion fuerte. P’esei, e por a alegrá ora e huicionan di Jehova a ser ehecutá.
5 Siglonan despues, apostel Pablo a skirbi di su responsabilidad pa predicá. El a declará: “Mi ta limpi dje sanger di tur hende, pasobra mi no a nenga di bisa boso tur e conseho di Dios.” Pablo a predicá públicamente i di cas pa cas debí cu el a reconocé cu kedando sin haci esei lo por a hacié culpabel di sanger dilanti Dios.—Echo. 20:20, 26, 27.
6 Nos tin e celo di Ezekiel? Nos ta sinti nos obligá na predicá manera Pablo a sinti? Nos comision ta mescos cu esun di nan. Nos mester sigui cumpli cu nos responsabilidad di advertí otronan, apesar di nan apatia, indiferencia of oposicion. Miles di hende mas ainda por reaccioná n’e mensahe di Reino i declará: “Nos lo bai cu boso, pasobra nos a tende cu Dios ta cu boso.” (Zac. 8:23) Cu nos amor pa Dios i pa nos próhimo motivá nos pa no entregá. Nos tin un comision pa predicá!