Bo Ta Haci Falta!
1 De bes en cuando, nos por falta un of mas reunion di congregacion, pensando cu ‘niun hende lo sinti mi falta; nan lo no ripará mes cu mi no t’ei.’ Esei no ta berdad! Mescos cu cualkier miembro di nos curpa físico, cada un di nos ta hunga un papel vital den funcionamentu dje congregacion. (1 Cor. 12:12) Nos ausencia na un reunion semanal por afectá e bienestar spiritual di otronan cu ta asistí. Si bo no t’ei, sea sigur di un cos—bo ta haci falta!
2 E Papel Vital cu Bo Ta Hunga: Pablo tabata anhelá pa asociá cu su rumannan. Romanonan 1:11, 12 ta splica pakico: “Pa mi compartí cu boso algun don spiritual . . . pa por tin un intercambio di estímulo entre boso, dor di cada un mediante e fe di e otro, tantu di boso como di mi.” Di igual manera, nos comentarionan, nos partinan den e reunion, i nos presencia mes, ta un gran yudansa pa edificá un e otro pa sigui den un rumbo di fieldad.—1 Tes. 5:11.
3 Abo no ta anticipá pa mira e rumannan na reunionnan di congregacion? Bo ta scucha atentamente na nan comentarionan i ta apreciá nan expresionnan di fe. Nan donnan spiritual ta yuda edificá bo. Si nan no tabata presente na reunion, abo lo a sinti cu tabata falta algu importante. Bo rumannan ta sinti mescos di bo, si abo no ta presente.
4 E Papel Vital cu Reunionnan Ta Hunga: Un biaha E Toren di Vigilancia a comentá con vital e reunionnan ta pa nos sobrebibencia spiritual, bisando: “Den e mundu desuní i inmoral aki, e congregacion cristian ta un berdadero refugio spiritual . . . , un haf di pas i amor. P’esei, asistí regularmente na tur su reunionnan.” (w93-PA 15/8 11) Cada dia nos ta ser confrontá cu situacionnan cu ta agotá nos spiritualmente. Si nos no tene cuidou, nos lo por haña nos asina absorbá den nos propio ansiedadnan cu nos por perde for di bista e interesnan spiritual, cual ta mas importante. Nos tur ta dependé un di otro pa e animacion necesario pa asina por keda uní i celoso den e sirbishi di Dios.—Heb. 10:24, 25.
5 Ta vital pa nos bai reunion. De bes en cuando malesa i suceso imprevisto por stroba nos di t’ei. Si esei no ta e caso, laga nos ta dicididu pa ta semper entre e multitud congregá cu ta alabá Jehova huntu!—Sal. 26:12.