“Sigui Haci Esaki na Mi Recuerdo”
1 Hende ta incliná na laga asuntunan importante perde nan nificacion cu pasamentu di tempu. Esaki ta un motibu pakico, ora di instituí e “cena di Señor,” Jesus a manda su disipelnan: “Sigui haci esaki na mi recuerdo.” For dje dia ei, riba e aniversario di Jesus su morto, cristiannan obedientemente a sigui “proclamá e morto di Señor, te ora e yega.”—1 Cor. 11:20, 23-26.
2 Masha pronto awor, Jesus lo ricibí den e habitacion celestial e últimonan dje “trupa chikitu” cu ta menguando. (Luc. 12:32; Juan 14:2, 3) E aña aki atrobe e resto di esnan ungí huntu cu e multitud grandi di “otro carnénan” cu ta creciendo ketu bai, lo tin e privilegio di tene e Cena di Señor, dia 11 di april. (Juan 10:16; Rev. 7:9, 10) E ocasion aki lo fortalecé nos aprecio pa Jehova su gran amor cu el a demostrá den manda su Yu unigénito na fabor di humanidad. Lo resaltá Jesus su ehempel, su amor, su fieldad te na morto pa percurá e rescate, i su mando awor como Rey di Dios su Reino establecí, i tambe e bendicionnan cu e Reino lo trece pa humanidad. Di berdad un ocasion pa conmemorá!
3 Prepará Awor: Laga nos tur haci nos esfuerso pa e temporada aki di Memorial sea unu di gran goso i gratitud pa nos mes i pa tur esnan cu lo asociá cu nos. Nos por prepará nos curason dor di bolbe lesa e relatonan den Bijbel relacioná cu e último dianan di Jesus su ministerio i e sucesonan cu a hiba na su morto. Kisas vários siman promé cu Memorial, nos por dedicá nos studio di famia na repasá capítulonan 112-16 for dje buki E homber mas importante.
4 Cuantu hende bo conocé cu kisas lo bini Memorial si bo tuma e iniciativa pa lanta nan aprecio p’e ocasion aki, invitá nan i laga nan sinti nan bon biní? Traha un lista awor, i haci loke bo por pa yuda nan bini. Despues, yuda nan sigui crece spiritualmente dor di animá nan pa asistí regularmente n’e reunionnan.
5 Durante e temporada di Memorial, lo haci areglonan special pa aumentá tur hende su oportunidad pa predicá. Si bo tin un bon programa, lo bo por traha pionero auxiliar na april? mei? Un dje mihó maneranan pa demostrá cu nos ta recordá cu aprecio tur loke e sacrificio di Jesus ta nificá pa nos ta dor di papia tocante nos Dios, Jehova, i e bendicionnan cu e gobernacion di Reino mediante su Yu lo trece.—Sal. 79:13; 147:1.