Muchanan—Boso Ta Nos Goso!
1 Mucha homber i mucha muhernan, boso sa di Jehova su mandamentu pa incluí boso den e actividadnan dje congregacion? (Deu. 31:12; Sal. 127:3) Ta un goso pa tin boso banda di nos ora nos ta adorá Jehova huntu! Boso ta conmové nos curason ora boso ta sinta ketu na reunion i ta scucha cu hopi atencion. Loke foral ta haci nos contentu ta ora boso ta purba comentá cu boso mes palabra. Henter e congregacion ta gosa ora boso duna parti den e Scol di Ministerio Teocrático, ora boso ta djoin nos cu smak den sirbishi di veld, i ora nos tende cu boso ta duna testimonio cu curashi na boso compañeronan di scol i maestronan.—Sal. 148:12, 13.
2 Nos kier pa boso sa cu nos ta orguyoso di boso ora nos mira boso bon manera, nechi aparencia, conducta limpi i boso respet pa hende grandi. Nos goso ta asta mas grandi ora boso ta mustra cu boso ta ‘corda boso Magnífico Creador’ dor di pone metanan teocrático pa boso mes.—Ecl. 12:1; Sal. 110:3.
3 Conta Nos Tocante Boso Metanan: Un mucha homber di ocho aña a conta un superintendente di distrito: ‘Promé lo mi kier bautisá, despues lo mi kier yuda den congregacion cu zonido i atendé cu e microfonnan, bira un usher, yuda cu literatura, lesa na studio di buki i na Studio di Toren di Vigilancia. Despues lo mi kier bira sirbidó ministerial, caba anciano. Tambe lo mi kier bira pionero i bai e scol pa pionero. Caba lo mi kier bai Betel, bira un superintendente di circuito of un superintendente di distrito.’ Ki un gran aprecio el a mustra p’e privilegio di sirbi Dios!
4 Segun cu boso ta progresá físicamente i spiritualmente, nos ta alegrá pa mira boso alcansá boso metanan. (Compará cu Lucas 2:52.) Tur aña, miles di boso ta bira publicadó no-bautisá i despues ta cualificá pa bautismo como sirbidónan dedicá di Jehova. Nos goso ta bira mas grandi ora despues nos mira boso haci esfuerso pa traha pionero auxiliar i asta drenta den e sirbishi di tempu completo. Di berdad, muchanan, boso ta nos goso i un fuente maraviyoso di alabansa na nos Tata celestial. Cu Jehova bendicioná boso ricamente!—Pro. 23:24, 25.