Felismente Uní Huntu ku Yehova i Su Yu
E Evento Mas Importante di Aña Ta Tuma Lugá Dia 28 di Mart
1 Dia 28 di mart 2002, despues ku solo baha, nos ta demostrá e union felis ku nos tin ku Yehova Dios i Hesukristu, selebrando e Sena di Señor. Na e okashon masha spesial ei, e restu di kristiannan ungí lo disfrutá di e “komunion” spesial ku nan tin ku otro herederonan di Reino, ku e Tata i ku su Yu. (1 Huan 1:3; Efe. 1:11, 12) Miónes di ‘otro karné’ lo meditá riba nan privilegio maravioso di por ta den union ku Yehova i su Yu, di por hasi e obra di Dios huntu ku nan den un solo kurason i mente!—Huan 10:16.
2 Trahando Huntu den un Relashon Estrecho: Yehova i Hesus semper tabata felismente uní. Nan tabatin un amistat será pa hopi tempu promé ku e kreashon di hende. (Mik. 5:2) Asina, un laso estrecho di tierno kariño a desaroyá entre nan dos. E Yu primogénito aki, personifiká komo sabiduria, por a bisa den su eksistensia prehumano: “Dia tras dia mi tabata [Yehova] su delisia, regosihando semper su dilanti.” (Pro. 8:30) E míles di miónes di aña ku el a pasa den asosiashon íntimo ku e Fuente di amor tabatin un efekto profundo riba e Yu di Dios!—1 Huan 4:8.
3 Ku e idea ku humanidat tabatin mester di un reskate, Yehova a skohe su Yu unigénito, kende tabatin un kariño spesial pa hende, pa e perkurá e sakrifisio di reskate, ku ta nos úniko speransa. (Pro. 8:31) Meskos ku Yehova i su Yu ta uní den kumpli ku un solo propósito, nos ta keda uní ku nan i ku otro den e lasonan di amor fuerte, hasiendo e boluntat di Dios ku goso.
4 Kon pa Mustra Nos Gratitut Sinsero: Dor di ta presente na Memorial i skucha ku sumo atenshon i rèspèt, nos por demostrá ku di bèrdat nos ta apresiá tantu Yehova su amor komo e sakrifisio di su Yu pa nos. E diskurso di Memorial lo enfatisá Hesus su ehèmpel amoroso, su fieldat te na morto pa perkurá e reskate, su gobernashon komo Rei di Dios su Reino establesí, i tambe e bendishonnan ku e Reino lo trese pa humanidat. Tambe e diskursante lo rekordá nos ku nos tin ku manifestá nos fe kontinuamente, trahando ku selo na armonia ku e boluntat di Yehova komo “kolaboradónan pa e bèrdat.”—3 Huan 8; Sant. 2:17.
5 Yuda Otro Hende Asistí Huntu ku Nos: E kuerpo di ansiano mester hasi un esfuerso spesial pa animá tur Testigu inaktivo ku tin den e teritorio pa asistí na Memorial: e konmemorashon di Kristu su morto. (Mat. 18:12, 13) Traha un lista di esnan ku mester haña un bishita ya asina lo no pasa ningun di nan por haltu i nan tur ta haña un invitashon personal.
6 Bo sa di mas hende ku lo por bini Memorial? Tuma e inisiativa pa lanta nan apresio pa e okashon aki. Invitá nan kordialmente, i laga nan sinti ku nan ta bon biní. Laga nos hasi nos máksimo esfuerso pa invitá tur nos studiantenan di Beibel i otro personanan interesá, i tambe miembronan di famia i konosínan, na e evento mas importante di aña. Ainda tur hende ku siña “e balor superior di konosé Kristu Hesus,” por risibí e benefisionan di e reskate. (Fil. 3:8) Esnan ku ehersé fe den e sakrifisio di Kristu por haña e speransa firme di bida eterno.—Huan 3:16.
7 Nunka balotá e efekto ku Memorial por tin riba hende sinsero. Dos aña pasá riba e islanan di Papua Nueva Guinea, 11 persona interesá a biaha 17 ora den un boto chikitu riba laman brutu pa nan por a asistí. Dikon? Nan a bisa: “Nos kier a selebrá e Memorial di Kristu huntu ku otro adoradónan di Yehova; p’esei e biahe tabata bale la pena.” Pensa riba e selo ku e personanan interesá ei a demostrá i e apresio ku nan tabatin di por ta felismente uní ku Yehova, ku su Yu i ku e hermandat kristian!
8 Ofresé un studio di Beibel na tur hende interesá. Animá nan pa asistí regularmente na e reunionnan di kongregashon i pa kompartí ku otro hende e bèrdatnan ku nan ta siñando. Yuda nan ‘kana den e lus’ i “praktiká e bèrdat” dor di apliká prinsipionan bíbliko den nan bida. (1 Huan 1:6, 7) Tambe nos mester yuda nan desaroyá un relashon estrecho ku Yehova i lanta nan apresio pa e privilegio di por hasi su boluntat unidamente.
9 Ta ki un privilegio maravioso di por ta felismente uní “den ún spiritu, di ún akuerdo, luchando huntu pa e fe di evangelio”! (Fil. 1:27, 28) Laga nos spera ansiosamente riba e dushi asosiashon ku nos lo tin huntu na Memorial, dia 28 di mart, i keda semper gradisidu na Yehova i su Yu!—Luk. 22:19.