“Donnan den Hende” Ta Pastoriá e Tou di Dios ku Hopi Afan
1 Ki un areglo amoroso Yehova a hasi mediante su Yu pa perkurá “donnan den hende”! (Efe. 4:8, 11, 12, NW) Nan tin vários responsabilidat, inkluso pa pastoriá e tou di Dios aktivamente i ku hopi afan. (1 Ped. 5:2, 3) Nos tur ta benefisiá di e perkurashon tan nesesario aki. Sea ku algun ruman ta konfrontá difikultat, ta resien asosiá ku e kongregashon, tin sierto debilidat òf a dual for di e bèrdat, e hòmbernan aki ta sumamente interesá den e bienestar spiritual di tur.—Fil. 2:4; 1 Tes. 5:12-14.
2 Ora ku susesonan mundial ta kousa un sierto grado di ansiedat, e supwardadónan aki ta resultá di ta “manera un refugio kontra bientu, i un protekshon kontra tempestat.” Ora nos ta kansá òf kargá i ta sinti ku nos tin mester di konsuelo, nan ta refreská nos, “manera koridanan di awa den un tera seku,” òf “manera sombra di un baranka masha grandi mes den un tera ku tin set di awa.”—Isa. 32:2.
3 Animando Esnan Inaktivo: E ansianonan ta hasi un esfuerso spesial pa animá esnan ku a bira iregular òf inaktivo, i ta yuda nan pa bolbe partisipá ku regularidat den tur aktividat di kongregashon. Bishitanan di pastoreo hasí ku amor a yuda hopi ruman asistí ku regularidat na reunionnan di kongregashon i asina ser edifiká spiritualmente te ku nan ta partisipando atrobe den sirbishi di fèlt. Tur e esfuerso ei ku e ansianonan ta hasi ta reflehá Yehova su kuido amoroso i e liderato aktivo di Hesukristu. El a mustra kon mester mustra interes den kualkier karné ku a dual òf pèrdè.—Mat. 18:12-14; Huan 10:16, 27-29.
4 E supwardadónan ta wak si nan ta mira señal ku ta indiká ku algun karné kisas ta tambaleá den sentido spiritual. Ken ku ta duna señal di desanimashon, ku bira iregular den asistí na reunion òf ku baha man na sirbishi di fèlt, probablemente tin mester di yudansa spiritual. E ansianonan ta ansioso pa yuda ken ku kuminsá desplegá un tendensia di bisti i peña manera e mundu òf ku desaroyá un aktitut di kritiká e kongregashon. Ku interes sinsero i tierno kariño, superintendentenan preokupá ta dispuesto na ‘kompartí nan mes bida’ den un intento pa yuda e personanan ei rebibá nan amor pa Yehova.—1 Tes. 2:8.
5 Tabatin biaha ku algun kristian dediká a pèrdè kontakto ku e kongregashon i a kai den inaktividat spiritual debí ku nan a sinti nan aplastá pa problema ku salú, kontratempu ekonómiko òf preshon di famia. Di un manera bondadoso i sin kritiká, e ansianonan ta duna nan e siguransa ku Yehova ta interesá den tur su karnénan i lo e sostené nan den tempu difísil. (Sal. 55:22; 1 Ped. 5:7) Wardadó alerto di e tou por yuda nan realisá ku si nan ‘hala serka Dios, e lo hala serka nan,’ i duna nan konsuelo i refreskamentu.—Sant. 4:8; Sal. 23:3, 4.
6 Duna Balor na Esnan Enfermo: Supwardadónan amoroso ta interesá tambe den esnan ku nos lo por pasa por haltu. Den tur kongregashon tin algun ruman enfermo, interná den kasnan di kuido òf inkapasitá den un òf otro manera. Ta di komprendé ku debí na nan sirkunstansia nan no por hasi mashá den e proklamashon di e mensahe di Reino. Kisas e úniko chèns ku nan tin pa duna testimonio ta na bishitante, otro pashènt òf na esnan ku ta kuida nan. No opstante, nos ta konsiderá loke sea nan por hasi komo un aporte balioso na e obra di prediká en general. (Mat. 25:15) Asta si ta 15 minüt so nan a prediká, mester raportá esaki, i lo sigui konta nan komo publikadónan di Reino regular.
7 E ‘donnan den hende’ ta spesialmente konsiente di e nesesidat spiritual di nan rumannan durante e tempu aki di aña: temporada di Memorial. Esaki ta un bon tempu pa ansianonan hasi un esfuerso spesial pa yuda tur esnan ku a dual, pa nan bolbe eksperensiá e goso i pas mental ku ta bini di e asosiashon kaluroso den kongregashon! Nos ta alegrá ora nos mira e personanan ei “ku ta di e famia di fe” presente na reunionnan di kongregashon i den sirbishi, rekonfirmando nan fe den e sakrifisio di reskate.—Gal. 6:10; Luk. 15:4-7; Huan 10:11, 14.