Un Karta di Kuerpo Gobernante

Segun ku nos ta drenta e promé añanan di siglo 21, ta un plaser pa skirbi boso, rumannan rònt mundu, i felisitá boso pa e trabou duru ku boso ta hasi. (1 Ped. 2:17) Kasi 2.000 aña pasá, Hesus a puntra: “Ora ku e Yu di hende bin, lo e haña fe riba mundu?” (Luk. 18:8) Boso aktividat seloso durante e aña di sirbishi ku a pasa ta kontestá Hesus su pregunta ku un sí resonante! Hende a despresiá i ridikulisá algun di boso pa motibu di boso fe. Den hopi lugá, boso a perseverá apesar di guera, desaster, malesa òf hamber. (Luk. 21:10, 11) Boso selo pa obranan hustu ta pone ku ainda Hesus por “haña fe riba mundu.” I esei sigur ta motibu pa alegria den shelu!

Nos sa ku no ta fásil pa perseverá. Tuma komo ehèmpel e pruebanan di nos rumannan di un pais den wèst di Asia. Violensia kontra Testigunan di Yehova ta kasi normal den e pais ei. Poko tempu pasá, polis a para un asamblea pasífiko di mas o ménos 700 persona. Barikada riba kaminda a stroba un 1.300 persona di asistí. Un multitut ku kara tapá, entre nan polis, a basha drenta e lugá di asamblea, bati hopi di e delegadonan i a pega e fasilidat ku nan lo a usa pa e asamblea na kandela. Na otro okashonnan, ekstremistanan religioso a bati nos rumannan kruelmente ku palu ku klabu pegá na nan.

E tipo di atakenan ei ta skandaloso pero no sorprendente. Dios a inspirá apòstel Pablo pa skirbi: “Tur hende ku ta deseá di hiba un bida santu den Kristu Hesus lo wòrdu persiguí.” (2 Tim. 3:12) Den promé siglo, e kristiannan a soportá persekushon verbal i físiko, i asta nan a mata algun. (Echo. 5:40; 12:2; 16:22-24; 19:9) Meskos tabata e kaso den siglo 20, i sin duda esaki lo sigui ta e kaso den siglo 21. No opstante, Yehova ta bisa nos: “Ningun arma ku wòrdu formá kontra bo lo no prosperá.” (Isa. 54:17) Ki un garantia maravioso esei ta! En bèrdat, nos ta asina presioso pa Yehova ku el a bisa via profeta Zakarías: “Esun ku mishi ku boso ta mishi ku [mi, NW] pret’i wowo.” (Zak. 2:8) Na final e enemigunan di e adoradónan di Yehova no tin chèns di gana. Adorashon puru lo sali viktorioso!

Por ehèmpel, den e pais menshoná anteriormente, Testigunan di Yehova tabatin dos máksimo nobo di publikadó durante aña di sirbishi 2001. Sí, meskos ku tur otro kaminda, nos rumannan einan ta perseverá apesar di difikultat. Mundialmente durante e último aña di sirbishi, 5.066 persona a batisá tur siman komo símbolo di nan dedikashon na Yehova. Awor e rumannan nobo aki ta determiná, huntu ku e sobrá di nos, pa “para firme, perfekto i kompletamente sigur den henter e boluntat di Dios.”—Kol. 4:12.

Konsiderá tambe e desaroyonan resien ku a tuma lugá na Gresia. Apesar ku pa hopi aña Iglesia Griego Òrtodòks a resistí e Testigunan di Yehova fuertemente, awor gobièrnu ta rekonosé nan komo un “religion konosí.” E dokumento ku a otorgá e rekonosementu aki ta deklará mas aleu ku e kompleho di Bètel di Gresia ta “un lugá sagrado i konsagrá, dediká pa adorá Dios.” Tambe ta un plaser pa nos por informá boso ku durante e último aña di sirbishi, kortenan a dikta sentensianan legal faborabel ku tin efekto riba nos adorashon na Alemania, Bulgaria, Hapon, Kánada, Merka, Rumania i Rusia. Nos ta gradisí Yehova mashá ku el a tene e porta di aktividat habrí den e paisnan ei!

Segun ku nos ta konsiderá e maneranan ku Yehova ta sostené su pueblo durante e último dianan aki, nos ta mira ku e ta e mihó Amigu ku hamas nos por tin. Nos ta kontentu ku nos tin un relashon kuné, sabiendo ku e ta stima nos, siña nos i korigí nos. Sí, nos lo sigui konfrontá pruebanan di nos fe. Pero fe inkebrantabel den Yehova lo sostené nos. Santiago a skirbi: “Konsiderá esaki komo puru goso, mi rumannan, ora boso haña boso mes den diferente pruebanan, sabiendo ku e prueba di boso fe ta produsí perseveransia.” (Sant. 1:2, 3) Ademas, nos perseveransia ta demostrá nos amor pa Yehova, i esaki ta duna nos hopi goso! Rumannan stimá, sea sigur ku Yehova lo yuda kada un di nos. Si nos keda fiel, lo e yuda nos sin falta pa drenta den e mundu nobo. E kier pa nos logra esei.

P’esei nos ta urgi boso rumannan, hòmber i muhé, hóben i bieu, pa semper kòrda riba e bendishonnan maravioso ku tin nos dilanti. Laga nos tin e mesun aktitut ku apòstel Pablo, kende a skirbi: “Mi ta konsiderá ku e sufrimentunan di e tempu presente aki no ta digno di wòrdu kompará ku e gloria ku lo wòrdu revelá na nos.” (Rom. 8:18) Dependé riba Yehova ora boso ta enfrentá kualkier tipo di kontratempu. Perseverá, i no entregá. Boso lo no lamentá esei nunka. E Palabra di Dios ta sigurá nos: “Ma e hustu lo biba pa medio di su fe.”—Hab. 2:4.

Boso rumannan,

Kuerpo Gobernante di Testigunan di Yehova