Hóbennan, Pone un Bon Fundeshi pa Futuro
1 Kiko ta e kos ku mas ta okupá bo mente? Riba kiko bo ta pensa? Bo ta interesá i preokupá prinsipalmente ku kosnan aktual? Òf bo pensamentu ta riba futuro i ta konsentrá riba loke Dios a primintí? (Mat. 6:24, 31-33; Luk. 8:14) Nos tin mester di fe fuerte pa nos por aktua na armonia ku e promesanan di Dios, manera e ehèmpelnan di Abraham i Moisés ta mustra nos. (Heb. 11:8-10, 24-26) Kon abo por desaroyá tal fe i pone “un bon fundeshi pa futuro”?—1 Tim. 6:19.
2 Buska Yehova: Si bo tin un rutina di aktividat spiritual huntu ku bo famia, esei ta algu digno di elogio. Pero no kere ku un rutina asina outomátikamente ta produsí fe fuerte. Pa “deskubrí e konosementu di Dios,” abo personalmente tin ku buska Yehova. (Pro. 2:3-5; 1 Kró. 28:9) E rei hóben Josias a hasi esei. Apesar ku el a lanta den un ambiente ku no tabata ideal pa hasi progreso spiritual, “el a kuminsá buska e Dios di su tata David” ora ku e tabatin 15 aña di edat.—2 Kró. 34:3.
3 Kon abo por buska Yehova? Dor di analisá kuidadosamente kiko bo ta kere i “komprobá” pa bo mes ku esei realmente ta e bèrdat. (Rom. 12:2) Por ehèmpel, bo por splika loke Beibel ta bisa tokante sanger òf proba ku e Reino di Dios a kuminsá goberná den shelu na 1914? Gana “konosementu eksakto di e bèrdat” ta un parti importante di pone un bon fundeshi pa futuro.—1 Tim. 2:3, 4, NW.
4 Josias su buskamentu di Dios a duna bon resultado. Promé ku el a yega 20 aña, el a aktua ku kurashi i a eliminá adorashon falsu for di den e pais. (2 Kró. 34:3-7) Asina tambe bo progreso spiritual lo ta bisto na loke bo ta hasi. (1 Tim. 4:15) Si bo ta un publikadó no-batisá, hasi esfuerso pa mehorá e kalidat di bo sirbishi. No keda kontentu ku djis ofresé literatura. Pone komo meta pa bo usa e Beibel, rasoná ku hende i kultivá e interes di e hendenan interesá ku bo ta topa. (Rom. 12:7, NW) Esaki lo yuda bo krese spiritualmente.
5 Duna Yehova Lo Mihó: Ora bo simbolisá bo dedikashon na Yehova dor di batisá, bo ta bira un minister òf sirbidó ordená di Dios. (2 Kor. 3:5, 6) Esaki ta habri vários oportunidat pa bo sirbi Yehova tempu kompletu. Esei por ta entre otro, e trabou di pionero, i sirbishi di Bètel, sirbishi di misionero i sirbishi internashonal. Otro maneranan pa ekspandé bo sirbishi ta dor di siña un otro idioma òf dor di bai sirbi kaminda tin mas nesesidat.
6 Klaru ku no ta tur hende por partisipá den e privilegionan aki di sirbishi, pero kada un di nos por duna Yehova lo mihó. (Mat. 22:37) Sea kual sea bo sirkunstansia, hasi sirbimentu di Yehova e kos sentral den bo bida. (Sal. 16:5) Dor di hasi esei, bo ta pone un bon fundeshi pa futuro.
[Questions]
1. Dikon hóbennan kristian mester desaroyá un fe fuerte?
2. Kiko nos ta siña for di e ehèmpel di Rei Josias?
3. Kon hóbennan kristian djawe por buska Yehova?
4. Kon un publikadó no-batisá por demostrá su progreso?
5. Ki oportunidat kristiannan batisá tin pa ekspandé nan sirbishi?
6. Kon nos tur por pone un bon fundeshi pa futuro?