Elogio Ta Refreská
1 “Mi no tabata bon mucha awe?” e mucha muhé chikí a bisa awa na wowo na ora di bai drumi. E pregunta ei a sorprendé e mama. Maske el a ripará kuantu esfuerso e chikitin tabata hasi e dia ei pa komportá su mes bon, tòg e mama no a elogi’é niun tiki. E lágrimanan di e chikitin ei mester rekordá nos ku nos tur—hóben i bieu—tin mester di elogio. Nos ta refreská e personanan ku ta rònt di nos dor di ekspresá apresio pa e kosnan bon ku nan ta hasi?—Pro. 25:11.
2 Nos kompañeronan kristian ta duna nos hopi motibu bon pa elogiá nan. Ansianonan, sirbidónan ministerial i pioneronan ta traha duru pa kumpli ku nan responsabilidatnan. (1 Tim. 4:10; 5:17) Mayornan temeroso di Dios ta hasi nan máksimo esfuerso pa lanta nan yunan den e kamindanan di Yehova. (Efe. 6:4) Hóbennan kristian ta hiba un lucha fuerte pa resistí “e spiritu di mundu.” (1 Kor. 2:12; Efe. 2:1-3) Otronan ta sirbi Yehova fielmente apesar di edat avansá, problema ku salú i otro pruebanan. (2 Kor. 12:7) Tur e personanan ei meresé elogio. Nos ta rekonosé nan esfuersonan digno di elogio?
3 Personal i Spesífiko: Nos tur ta gusta tende ora rumannan ta elogiá kongregashon for di plataforma. Sin embargo, elogio ta asta mas refreskante ainda ora e ta dirigí na nos personalmente. Por ehèmpel, den e kapítulo 16 di Pablo su karta na e romanonan, el duna elogio spesífiko na entre otro, Febe, Prisila i Akila, Trifena i Trifosa, i Pérsida. (Rom. 16:1-4, 12) E rumannan fiel aki lo mester a sinti nan masha refreská dor di e palabranan ei! Elogio asina ta duna nos rumannan e konfiansa ku nos tin mester di nan, i ta sirbi tambe pa hala nos mas serka otro. Abo a duna otro hende elogio spesífiko i personal, resientemente?—Efe. 4:29.
4 Di Kurason: Pa un elogio por ta realmente refreskante, e mester ta sinsero. Hende por ripará ki ora nos ta papia di kurason òf ki ora nos ta djis “labia” nan. (Pro. 28:23) Segun ku nos ta entrená nos mes pa tuma nota di bon kualidat den otro hende, nos kurason lo motivá nos pa duna elogio. Ya ku nos sa “ki bon ta un palabra duná na ora,” laga nos ser generoso den duna elogio sinsero!—Pro. 15:23.