Mustra Interes Personal—Dor di Duna Elogio
1 Elogio sinsero ta animá hende, ta motivá nan pa aktua i tambe ta hasi nan kontentu. Hopi publikadó a ripará ku djis un par di palabra di elogio sinsero hopi bes ta hasi personanan ku nos topa den sirbishi mas dispuesto pa skucha. Kon nos por elogiá hende segun ku nos ta hasi esfuerso pa kompartí e bon nobo ku nan?
2 Ser un Bon Opservadó: Hesukristu glorifiká a opservá i aprobá e bon obranan di e shete kongregashonnan na Asia Menor. (Rev. 2:2, 3, 13, 19; 3:8) Di mes manera, si nos tin berdadero interes den hende ku nos ta topa den nos ministerio esaki lo motivá nos pa buska oportunidat pa elogiá nan. Por ehèmpel, un kurá bon kuidá, un mayor ku ta trata su yunan ku kariño òf e sonrisa i saludo amigabel di un doño di kas ta habri kaminda pa nos duna elogio. Abo ta un bon opservadó i ta probechá mesora di e oportunidatnan aki?
3 Ser un Bon Skuchadó: Ora bo ta prediká na otro hende, animá nan pa ekspresá nan mes dor di hasi preguntanan apropiá. Mustra onor na nan dor di skucha ku sumo atenshon na loke nan ta bisa. (Rom. 12:10) Probablemente, lo bo haña algu pa duna elogio sinsero. Asina bo ta establesé un base komun ku bo por sigui edifiká ariba.
4 Usa Disernimentu: Kiko nos mester hasi si un doño di kas bisa algu ku no ta na armonia ku bèrdat bíbliko? En bes di refutá un deklarashon inkorekto, mustra apresio pa e doño di kas su palabranan i despues bisa algu manera: “Mi ta ripará ku señora [òf mener] a pensa profundamente riba e asuntu aki.” (Kol. 4:6) Asta si un persona tin e tendensia di ke diskutí, hopi bes nos por elogi’é pa su interes sinsero den e tema. Un manera suave asina lo por trankilisá un persona ku ta parse di ta fuertemente kontra e bon nobo.—Pro. 25:15.
5 Pa nos elogio por tin balor, e mester ta sinsero. Ora nos ta papia den e manera edifikante ei, nos ta duna onor na Yehova i por atraé otro hende na e mensahe di Reino.