Edifiká Otro Ora Nos Ta den Sirbishi
1 Nos tur ta apresiá ora un hende animá nos ku un “palabra papiá na ora apropiá.” (Pro. 25:11) Ora nos ta traha ku otro hende den sirbishi, kon nos por perkurá pa nos kòmbersashon ta edifikante?
2 Kòmbersashon Edifikante: Ora nos ta den sirbishi ta masha edifikante pa papia riba temanan ku por yuda fortalesé nos relashon ku Dios! (Sal. 37:30) Nos por papia riba nos presentashon òf konta eksperensia animante ku nos tabatin resientemente den sirbishi di vèlt. (Echo. 15:3) Nos lo por kompartí un punto interesante ku nos a haña den nos lesamentu di Beibel, e revistanan nobo òf na un reunion di kongregashon. Tambe nos por papia riba puntonan di un diskurso públiko ku nos a tende resientemente na Salòn di Reino.
3 Kisas nos ta sinti nos desanimá ora nos topa ku un doño di kas ku ta bin ku un opheshon ku nos no por a vense. Miéntras abo ku bo kompañero di sirbishi ta bai n’e siguiente kas, lo ta benefisioso si boso tuma un par di minüt pa wak kon lo por trata ku un situashon asina den futuro, kisas dor di wak loke e buki Rasonamentu (òf e foyeto chikí Con pa Cuminsá i Continuá Considercionnan Bíblico) ta bisa. Anto si nos a gusta algu ku nos kompañero a bisa den su presentashon, nos lo por elogi’é sinseramente pa esei.
4 Tuma Inisiativa: Tin un hende den bo grupo di estudio di buki ku bo tin basta dia sin traha kuné? Lo ta bon si bo invit’é pa sali den sirbishi, i boso lo por “kurashá otro.” (Rom. 1:12, BPK) Pioneronan regular i ousiliar ta apresiá ora nan tin otro hende pa traha kuné, spesialmente mainta trempan òf atardi lat, ora kisas ménos publikadó ta sali den sirbishi. Nos por apoyá e pioneronan si nos pone nos mes disponibel pa traha ku nan den sirbishi. Tin un publikadó malu ku no por sali dje tantu ei den sirbishi? Nos por hasi areglo p’e kompañá nos, por ehèmpel, na un estudio di Beibel. Esaki lo ta benefisioso!—Pro. 27:17.
5 Palabranan di elogio i apresio ta algu ku ta animá nos tur, asta den kosnan chikí. Nos mester tene esei na mente ora nos ta traha ku otro ruman den sirbishi, ya ku nos ke sigui “edifiká otro.”—1 Tes. 5:11.