Mas ku Djis un Kompañero den Sirbishi
1. Kon nos por imitá e aktitut di apòstel Pablo ora nos ta traha ku otronan den sirbishi?
1 Apòstel Pablo a konsiderá e tempu ku el a pasa ku su rumannan den fe komo oportunidatnan pa nan por tin “un interkambio di estímulo.” (Rom. 1:12) Ora abo ta traha ku un otro publikadó den sirbishi, bo ta probechá di e tempu pa anim’é i yud’é? En bes di keda ketu, dikon bo no ta kont’é kiko a yuda bo bira un publikadó efikas?
2. Kiko nos por hasi pa yuda nos kompañero bira mas sigur di su mes den sirbishi di vèlt, i dikon esaki ta importante?
2 Yuda Otronan Bira Mas Sigur di Nan Mes: Algun publikadó ta insigur di nan mes i esei ta keda reflehá den nan kara òf tono di bos. Ora nos duna nan elogio sinsero, nan por kuminsá sinti nan mas sigur di nan mes. Tin otro manera ku nos por hasi esei? Un superintendente di sirkuito sa konta su kompañero den sirbishi kua ta su temornan i kon hopi biaha e ta hasi orashon pa pidi Yehova yud’é vense e sintimentunan ei. Un otro ruman hòmber a menshoná kiko ta yud’é pa ta mas sigur di su mes. El a bisa: “Tur kos ta kuminsá ku un smail. Tin biaha mi tin ku hasi orashon pa yuda mi asta den esei.” Tin algu ku a yuda bo haña mas konfiansa den sirbishi? Kompartié ku bo kompañero den sirbishi di vèlt.
3. Kiko nos por kompartí ku nos kompañero ku por yud’é bira mas ábil den su sirbishi?
3 Kompartí Bo Métodonan: Bo a yega di usa algun palabra òf pregunta simpel òf kisas algu tokante un suseso lokal ku a hiba na un kòmbersashon? Bo tabatin bon resultado ku un presentashon di Nos Ministerio di Reino ku bo a duna un toke personal? Konta bo kompañero. (Pro. 27:17) Ora boso ta bai hasi un rebishita, bo por bis’é kiko ta bo meta pa ku e bishita i kon bo tin pensá pa logr’é. Despues di un estudio di Beibel, splika bo kompañero dikon bo a skohe sierto punto, teksto bíbliko òf método di siñansa pa yuda e studiante.
4. Dikon nos mester ta interesá den yuda nos rumannan den fe?
4 E predikadónan di promé siglo no solamente tabata interesá den yuda hende ku no tabata kreyente, sino tambe nan a mira e importansia di enkurashá i fortalesé otro. (Echo. 11:23; 15:32) Apòstel Pablo a entrená e hóben Timoteo i despues el a anim’é pa e kompartí loke el a siña ku otro hende. (2 Tim. 2:2) Si nos tambe kompartí loke nos a siña ku nos rumannan ora nos ta den sirbishi, nan lo haña mas goso i bira mas ábil. I riba tur kos, nos ta hasi nos Tata selestial kontentu.—Heb. 13:15, 16.