Kon pa Mehorá Nos Sirbishi: Yuda Bo Kompañero

Dikon e Ta Importante: Hesus tabata sa ku ta importante pa prediká ku un kompañero. P’esei, ora el a manda 70 di su disipelnan pa bai su dilanti pa kuminsá prediká, el a manda nan dos dos. (Luk. 10:1) Un publikadó por yuda un kompañero ora e haña su mes den un situashon difísil òf ora e no sa kiko pa kontestá un persona. (Ekl. 4:9, 10) E publikadó por konta e kompañero di su eksperensianan i de bes en kuando dun’é un sugerensia ku por yud’é bira mas kapas den sirbishi. (Pro. 27:17) Ademas, e por anim’é ku su kòmbersashon edifikante segun ku nan dos ta bai di un porta pa otro.—Flp. 4:8.

Kon pa Hasié:

Presta atenshon ora bo kompañero ta duna testimonio. (Sant. 1:19) Ora e ta lesa un teksto, sigui e lesamentu den bo Beibel. Asina ta mas fásil pa dun’é un man si ta nesesario.
Usa disernimentu pa determiná si bo mester drenta den e kòmbersashon i na ki momento. (Pro. 25:11) Si bo ta kompañá un publikadó na un estudio di Beibel, lo e apresiá e komentarionan ku bo ta duna de bes en kuando. Sinembargo, ora bo ta prediká di kas pa kas, bo kompañero lo preferá pa bo lag’é papia ora ta su bùrt di prediká na un kas. Klaru, si e ta un publikadó nobo òf no ta muchu sigur kon pa kontestá un pregunta òf vense un opheshon, sigur lo e ke pa bo yud’é. Pero sea ku bo ta kompañá un publikadó di kas pa kas, na un rebishita òf un estudio di Beibel, no interumpié ni tuma e kòmbersashon over òf bini ku otro tema.
Kont’é di bo eksperensianan. Si de bes en kuando bo por duna bo kompañero un sugerensia ku por yud’é mehorá den su sirbishi, no keda sin hasié. (Pro. 3:27) Na un momento apropiá bo por bis’é: “Kon bo ta haña e kòmbersashon a bai?” òf “Mi por duna bo un sugerensia?” òf “Ami sa purba di hasi esaki . . . ” Tene kuenta ku maske un publikadó lo apresiá pa bo dun’é algun sugerensia de bes en kuando, e por desanimá si bo ta hala su atenshon riba delaster un kos chikí.

Purba di Hasi Esaki Durante e Luna Akí:

Despues ku bo kaba di traha ku un ruman den sirbishi, bis’é kiko el a bisa òf hasi ku bo a haña hopi práktiko.