Laga Nos Ofresé Yehova Lo Mihó
1 Yehova su Lei pa e pueblo di Israel a stipulá ku e animalnan ku nan a presentá na dje komo sakrifisio mester tabata “sin defekto.” Un animal ku defekto tabata inaseptabel. (Lev. 22:18-20; Mal. 1:6-9) Ademas, ora nan a hasi un sakrifisio, tur e vèt—e parti mas riku—tabata pa Yehova. (Lev. 3:14-16) Komo e Tata i Doño di Israel, Yehova a meresé lo mihó.
2 Meskos ku ántes, awe tambe Dios ta masha interesá den e kualidat di loke nos ta ofresé na dje. Nos sirbishi mester reflehá e debido rèspèt profundo pa Yehova. Klaru ku kada hende su sirkunstansia ta diferente. Sin embargo, nos tin bon motibu pa skudriñá nos mes pa hasi sigur ku loke nos ta duna Yehova ta lo mihó.—Efe. 5:10, NW.
3 Sirbishi di Henter Kurason: Pa nos sirbishi por onra Yehova i toka kurason di nos oyentenan, e no por ta rutinario. Loke nos ta bisa di Yehova i su gran propósito mester sali for di un kurason yen di apresio. (Sal. 145:7) Esaki ta enfatisá e importansia di mantené un bon programa personal di lesamentu i studio di Beibel.—Pro. 15:28.
4 Duna Yehova lo mihó ta enserá imitá su amor pa hende. (Efe. 5:1, 2) Amor pa hende lo motivá nos pa purba alkansá mas tantu hende posibel ku e mensahe di bèrdat ku ta salba bida. (Mar. 6:34) E ta impulsá nos pa mustra interes personal den hende ku nos ta papia kuné. E ta pone ku nos ta sigui pensa riba nan despues di nos promé kòmbersashon i ta motivá nos pa bolbe bishitá nan. E ta impulsá nos pa hasi tur loke nos por pa yuda nan progresá spiritualmente.—Echo. 20:24; 26:28, 29.
5 “Un Sakrifisio di Alabansa”: Un otro manera ku nos ta duna Yehova lo mihó ta dor di ta diligente den sirbishi. Ora nos ta bon organisá i ta enfoká riba e trabou ku tin nos dilanti, nos por saka mayor benefisio di e tempu ku nos tin na nos disposishon. (1 Tim. 4:10) Un bon preparashon ta yuda nos papia ku klaridat i konvikshon, i dor di esei oumentá nos chèns di haña un reakshon faborabel. (Pro. 16:21, Beibel na papiamentu koriente) Segun ku nos ta kompartí e bon nobo ku otro hende, korektamente nos ekspreshonnan sinsero por ser yamá “un sakrifisio di alabansa.”—Heb. 13:15.