Hóbennan, Lesa e Palabra di Dios!
1 Hubentut ta un tempu di desafio i desishonnan importante. Hopi di boso, hóbennan kristian, diariamente ta konfrontá e preshon pa violá Dios su normanan di kondukta. Promé ku boso kuminsá tuma desishonnan personal en kuantu edukashon, empleo i kasamentu, boso mester a pone boso metanan spiritual kaba. Ta asina so boso por tuma otro desishonnan ku lo ta benefisioso pa e restu di boso bida. Metanan spiritual spesífiko lo yuda boso aktua di un manera sabí, i logra éksito den bida. Dor di lesa e Palabra di Dios i meditá riba dje regularmente, boso lo ta motivá pa biba na armonia ku su konsehonan inspirá, i boso esfuersonan bon dirigí lo tin éksito.—Jos. 1:8; Sal. 1:2, 3.
2 Kon Lo E Benefisiá Boso? E mundu di Satanas ta yen di tentashon ku por pone boso hasi loke ta malu. (1 Juan 2:15, 16) Podisé boso konosé kompañeronan di klas òf otro hóbennan di boso edat ku a haña nan ku kalamidat dor ku nan a entregá na preshon di pareu. Si boso pega na konseho di Beibel, esaki lo duna boso e fortalesa moral i spiritual pa nenga di hiba un bida di piká. Ademas, konseho di e Palabra di Dios por yuda boso evitá Satanas su trampanan sutil. (2 Kor. 2:11; Heb. 5:14) Dor di kana den e kamindanan di Dios, boso lo haña berdadero felisidat: satisfakshon personal ku boso estilo di bida.—Sal. 119:1, 9, 11.
3 E prinsipionan inkambiabel di e Palabra di Dios ta surpasá sabiduria humano. (Sal. 119: 98-100) Konosementu di prinsipionan di Beibel i meditashon riba Yehova su propósito revelá, huntu ku orashon sinsero por yuda boso kultivá un relashon estrecho ku Yehova Dios, e Outor di Beibel kende tin tur sabiduria. El a primintí: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.”—Sal. 32:8.
4 Apartá Tempu pa Les’é: Un hóben kristian a pone komo meta p’e lesa e Beibel kompletu i el a kab’é den un aña. Ki benefisio el a saka? E ta konta: “Mi a siña masha hopi kos di Yehova, kosnan ku a hala mi mas serka dje i a lanta den mi e deseo pa tem’é pa restu di mi bida.” (Sant. 4:8) Abo a lesa Beibel kompletu? Si no ta asina, pakiko no pone esei komo bo meta? Yehova siguramente lo bendishoná bo esfuerso, i lo bo kosechá gran rekompensa.