Temporada di Memorial—Un Tempu pa Mas Aktividat
1 Na sierto tempunan stipulá durante aña, e israelitanan di antigwedat tabata selebrá “fiestanan periódiko di Yehova.” (Lev. 23:2, NW) E tempu ku nan a tuma pa reflekshoná riba e bondat di nan Dios a resultá den gran goso i a motivá nan pa ta seloso pa adorashon puru.—2 Kró. 30:21–31:2.
2 Den tempu moderno, nos aktividat teokrátiko gososo ta oumentá tur aña durante e temporada di Memorial. Esaki ta un temporada ku nos ta reflekshoná profundamente riba e regalo presiosísimo ku Yehova a duna na nos fabor: su Yu unigénito. (Juan 3:16; 1 Ped. 1:18, 19) Segun ku nos ta meditá riba e amor ku Dios i su Yu a desplegá, nos ta sinti nos impulsá pa alabá Yehova i pa hasi esfuerso pa hasi su boluntat.—2 Kor. 5:14, 15.
3 E aña aki lo selebrá e Sena di Señor riba djaweps 24 di mart, despues ku solo baha. Kon nos lo por oumentá nos partisipashon den e ministerio durante e lunanan di mart, aprel i mei?
4 Alkansando Mas Hende: Buska maneranan pa alkansá mas tantu hende posibel ora bo ta partisipá den sirbishi di vèlt. Bo por plania pa partisipá den e trabou di kas-pa-kas ora ku tin mas hende na kas, manera mas lat atardi òf anochi? Si algun persona di e grupo di estudio di buki lo ke sali den sirbishi promé ku e estudio, e superintendente di estudio di buki lo por hasi areglo pa un reunion pa sirbishi breve pa nan por traha den un teritorio den serkania.
5 Un otro manera pa alkansá hopi hende ta di prediká na lugánan públiko. Un ruman muhé kier a traha pionero ounke e tabatin un trabou fultaim. Un ansiano a sugerié pa tur dia promé ku e bai trabou, e prediká riba kaya den serkania di e stashon di trein. Despues ku el a vense su propio timides i e mofa di algun pasahero ku ta biaha bai trabou diariamente ku trein, el a forma un ruta di revista ku rònt di 40 persona, inkluso algun di e pasaheronan ei, trahadónan na stashon di trein i doñonan di tienda den bisindario. El a laga un promedio di 235 revista pa luna. Dor di a kompartí puntonan bíbliko ku hende djis un ratu tur dia, e por a kuminsá 6 estudio di Beibel.
6 Oportunidatnan pa Duna Testimonio: Hopi publikadó ku ta bai skol tin algun periodo di fakansi durante aña. Esakinan kisas por ta bon oportunidatnan pa traha pionero ousiliar. Ademas, hóbennan kristian por oumentá nan aktividat dor di duna testimonio na skol. Lo bo por keda sorprendí kon kurioso bo kompañeronan di klas lo ta pa sa di bo kreensianan. Pakiko no probechá duna testimonio durante konsiderashonnan ku klas òf ora bo tin ku traha òpstèl? Tabatin mucha ku por a usa nos vidionan pa duna testimonio. Algun a kuminsá estudio di Beibel ku kompañeronan di klas i a yuda nan progresá te na dedikashon i boutismo. Esakinan ta maneranan ekselente pa “alabá e nòmber di SEÑOR.”—Sal. 148:12, 13.
7 Analisá bo rutina diario i buska maneranan pa papia ku otro hende tokante nos Dios maravioso i su maravioso promesanan. Un ruman hòmber ku ta biaha den e mesun trein tur dia ta duna testimonio na otro pasaheronan ku ta bayendo trabou ora esei ta apropiá. Por ehèmpel, wardando riba e siguiente trein na un stashon, e tabata duna un yònkuman testimonio mas o ménos 5 minüt tur dia. E resultado tabata ku e yònkuman i su kolega a aseptá un estudio di Beibel. Nan tabata studia Beibel segun ku nan tabata biaha den trein. Algun tempu despues, un señora di edat ku tabata skucha nan kòmbersashonnan a aserká e ruman hòmber i a pidié un estudio di Beibel. E tambe ta disfrutá di su estudio riba e dianan ku e ta biaha ku trein. Di e manera aki e ruman hòmber a studia ku 10 diferente hende miéntras ku e ta biaha den trein.
8 Kiko si bo no por hasi mashá debí na edat avansá òf problema ku salú? No opstante tin otro maneranan ku bo por oumentá bo alabansa na Yehova. Bo a purba di duna testimonio via telefon? Si bo no sa bon kon pa hasi esaki, papia ku bo superintendente di estudio di buki. E lo por hasi areglo pa publikadónan ku ta usa e método aki traha huntu ku bo. Trahando huntu komo partner, boso por siña for di otro i yuda otro duna testimonio efikas. Bo por haña ekselente sugerensianan pa duna testimonio via telefon den Nos Ministerio di Reino di febrüari 2001, página 5-6.
9 Dor di asistí na e Memorial, esnan nobo por ser stimulá pa oumentá nan alabansa na Yehova. Bo por yuda nan vense kualke temor ku nan por tin pa prediká di kas pa kas manera e ta wòrdu hasí ofisialmente, dor di konta nan eksperensianan positivo di sirbishi di vèlt i dor di train nan progresivamente pa splika siñansanan di Beibel i defendé nan fe. (1 Ped. 3:15) Si un studiante di Beibel ekspresá ku e tin deseo di kuminsá prediká e bon nobo, papia ku e superintendente presidente. E lo hasi areglo pa tene un reunion ku e studiante pa asina determiná si e ta kualifiká pa partisipá huntu ku e kongregashon den e ministerio públiko. Ora Yehova ta mira hende nobo tuma nan posishon na su banda den e kuestion di soberania universal, su kurason ta keda masha kontentu!—Pro. 27:11.
10 Bo Por Traha Komo Pionero Ousiliar? Mester konsiderá e rekisito pa pionero ousiliar di 50 ora komo algu serio. (Mat. 5:37) Esaki ta nifiká ku bo mester hasi areglo pa dediká un promedio di 12 ora pa siman den sirbishi di vèlt. Un di e muestranan di orario pa pionero ousiliar na página 5 ta pas ku bo sirkunstansianan? Si no ta asina, bo por traha un otro orario ku lo yuda bo traha komo pionero ousiliar na mart, aprel òf mei? Pidi Yehova p’e bendishoná bo esfuersonan pa oumentá bo aktividat di sirbishi.—Pro. 16:3.
11 E ansiano- i sirbidónan ministerial lo duna pleno apoyo na bo esfuersonan pa hasi e temporada di Memorial aki unu ku lo duna alabansa spesial na Yehova. Probablemente hopi di nan lo traha komo pionero ousiliar. E ansianonan lo hasi areglo pa reunionnan èkstra pa sirbishi, manera atardi lat, anochi durante siman, i den wikènt si esei ta nesesario. Pa determiná unda i ki ora mester tene e reunionnan ei i ken lo ta disponibel pa hiba delantera, ansianonan lo por papia ku e rumannan ku tin plan definitivo pa traha komo pionero òf esnan ku ta pensando pa hasié. E ansianonan lo hasi esfuerso pa kordiná e areglonan di tal manera ku lo bo haña otro publikadó pa traha kuné riba e dia- i oranan ku bo a apartá pa sirbishi. Di e manera aki, plannan por ser establesí firmemente i hopi kos bon por ser lográ.—Pro. 20:18.
12 Hasi Bo Máksimo Esfuerso: Si bo sirkunstansianan no ta permití bo traha komo pionero ousiliar, kòrda ku Yehova ta aseptá bo esfuerso- i sakrifisionan ‘segun loke bo tin, no segun loke bo no tin.’ (2 Kor. 8:12) Nos tin masha hopi motibu pa ta gradisidu na Yehova. Ku bon motibu David a skirbi: “Lo mi bendishoná SEÑOR den tur tempu; su alabansa lo ta kontinuamente den mi boka.” (Sal. 34:1) Laga esaki ta bo determinashon durante e temporada aki di Memorial.
[Study Questions]
1. Ki efekto “fiestanan periódiko” tabatin riba israelitanan ku a teme Dios?
2, 3. Dikon ta na su lugá pa nos oumentá nos aktividat spiritual durante e temporada di Memorial, i ki dia nos lo tene e Memorial?
4, 5. (a) Kiko a yuda algun ruman alkansá mas hende ku e bon nobo? (b) Kiko a resultá di ta efikas den boso teritorio?
6. Kon hóbennan lo por oumentá nan aktividat spiritual?
7. (a) Kon un ruman hòmber a probechá di oportunidatnan pa duna testimonio na otro hende? (b) Abo tambe tabatin eksperensianan similar?
8. Ki rasgo di sirbishi por yuda rumannan ku no por hasi mashá debí na edat avansá òf problema ku salú oumentá nan partisipashon den e ministerio?
9. Kon nos por yuda studiantenan di Beibel kualifiká pa partisipá den e ministerio públiko huntu ku e kongregashon?
10. (a) Kon un bon orario por yuda nos traha komo pionero ousiliar? (b) Bo por a hasi areglo pa traha komo pionero ousiliar aña pasá durante e temporada di Memorial? Kon bo a hasié?
11. Kon ansiano- i sirbidónan ministerial por apoyá esnan ku lo sirbi komo pionero ousiliar?
12. Kiko ta motivá nos pa alabá Yehova tur ora bai?
[Box on page 3]
Kon Lo Bo Oumentá Bo Aktividat?
◼ Prediká ora hende ta na kas
◼ Prediká na lugánan públiko
◼ Duna testimonio na skol òf trabou
◼ Duna testimonio via telefon
◼ Sirbi komo pionero ousiliar
[Chart on page 5]
Muestranan di Orario pa Pionero Ousiliar—Maneranan pa Programá 12 Ora di Sirbishi di Vèlt pa Siman
Mainta—Djaluna te ku Djasabra
Por kambia djadumingu pa kualke otro dia.
Dia Periodo Ora
Djaluna Mainta 2
Djamars Mainta 2
Djarason Mainta 2
Djaweps Mainta 2
Djabièrnè Mainta 2
Djasabra Mainta 2
Total di Ora: 12
Dos Dia Henter
Por selektá kualke 2 anochi den siman. (Dependiendo di e dianan ku bo selektá, e orario aki lo por yuda bo alkansá solamente 48 ora pa luna.)
Dia Periodo Ora
Djarason Henter Dia 6
Djasabra Henter Dia 6
Total di Ora: 12
Dos Anochi i Wikènt
Por selektá kualke dos anochi den siman.
Dia Periodo Ora
Djaluna Anochi 11⁄2
Djarason Anochi 11⁄2
Djasabra Henter Dia 6
Djadumingu Mitar Dia 3
Total di Ora: 12
Tres Atardi i Djasabra
Por kambia djadumingu pa kualke otro dia.
Dia Periodo Ora
Djaluna Atardi 2
Djarason Atardi 2
Djabièrnè Atardi 2
Djasabra Henter Dia 6
Total di Ora: 12
Mi Orario Personal di Sirbishi
Disidí e kantidat di ora pa kada periodo.
Dia Periodo Ora
Djaluna
Djamars
Djarason
Djaweps
Djabièrnè
Djasabra
Djadumingu
Total di Ora: 12