‘Duna Testimonio Kabal di e Evangelio’
1 Den un mundu kaminda tin masha poko bon notisia, ta un privilegio pa nos ‘duna testimonio kabal di e evangelio di e grasia di Dios.’ (Echo. 20:24) Esaki ta enserá laga hende sa ku pronto Yehova lo remplasá “e último dianan” ku Su hustu mundu nobo, den kua “tur kos di ántes [lo] a pasa bai.” (2 Tim. 3:1-5; Rev. 21:4, BPK) Na e tempu ei lo no tin malesa mas. (Isa. 33:24) Sernan kerí ku a muri lo sali for di graf i lo ta huntu ku nan famia- i amigunan atrobe. (Juan 5:28, 29) Henter e tera lo bira un paradeis masha bunita. (Isa. 65:21-23) Esaki ta djis un par di ehèmpel di e evangelio òf bon nobo ku nos tin pa kompartí ku otro hende!
2 E lunanan di mart, aprel i mei ta duna nos ekselente oportunidat pa deklará e bon nobo ei. Durante e lunanan aki den hopi parti di mundu e klima ta faborabel i ta bira skur mas lat. Pues ta nèt bon pa keda mas tantu tempu den sirbishi. Ademas, lo tene e evento mas importante di aña, esta, Memorial, rònt mundu riba djasabra 22 di mart despues ku solo baha. Awor ta e tempu pa nos kuminsá hasi preparashon pa oumentá nos aktividat di sirbishi.
3 Traha Pionero Ousiliar: Lo bo por regla bo asuntunan di tal manera ku bo por traha pionero ousiliar pa un, dos òf tur tres luna? Pakiko no tuma un par di minüt durante e siguiente estudio di famia pa papia riba e asuntu aki? Ku bon koperashon, un òf mas miembro di famia lo por traha pionero ousiliar. (Pro. 15:22) Hasi orashon tokante e asuntu aki, i mira kon Yehova lo bendishoná boso esfuerso. (Pro. 16:3) Asta si ningun hende den e famia no por traha pionero ousiliar, tur miembro di famia por pone meta spesífiko pa partisipá mas tantu den e ministerio segun ku nan ta traha huntu ku esnan ku sí por traha pionero.
4 Si bo tin un trabou di henter dia, un bon skèdjel lo por yuda bo traha pionero ousiliar. Kisas lo bo por usa un parti di bo pousa di mèrdia pa prediká. Òf bo por pidi pa bo haña un teritorio personal ku ta keda serka di bo kas òf trabou i partisipá den e sirbishi mas o ménos un ora promé òf despues di trabou. Lo bo por haña mas tempu ora bo posponé kosnan ménos importante pa e siguiente luna i pasa henter dia den sirbishi durante fin di siman. Algun ruman a tuma un òf dos dia liber pa traha den sirbishi di vèlt.
5 Si bo ta un hende di edat, enfermo òf un hende ku no tin hopi energia, kisas lo bo por logra traha pionero ousiliar dor di sali tur dia den sirbishi pero trahando ménos ora. Pidi Yehova duna bo “e poder mas ayá di loke ta normal.” (2 Kor. 4:7, NW) Un ruman muhé a logra traha pionero ousiliar na edat di 106 aña! Ku yudansa di su famia kristian i otro rumannan den e kongregashon, el a prediká di kas pa kas, hasi rebishita, bai estudionan di Beibel i partisipá den otro rasgonan di sirbishi. El a yuda dies hende kuminsá studia Beibel. E ta bisa: “Ora mi pensa riba e maravioso privilegio ku mi tabatin di sirbi komo pionero ousiliar, mi kurason ta yena ku apresio i amor pa Yehova, su Yu i Su organisashon amoroso. Di kurason mi ke bisa ‘danki, Yehova!’”
6 Si bo ta un hóben batisá ku ta bai skol ainda, bo tambe lo por traha pionero ousiliar. Meskos ku esnan ku tin trabou di henter dia, probablemente lo bo traha den sirbishi mas tantu durante di bo wikèntnan. Òf tin dia lo bo por sali mas o ménos un ora den sirbishi despues di skol. Tin dianan liber ku lo bo por usa pa partisipá den sirbishi? Si bo ke traha pionero ousiliar, papia ku bo mayornan tokante e asuntu.
7 Lanta Entusiasmo: E ansianonan por hasi hopi pa lanta entusiasmo di e kongregashon mediante nan ehèmpel. (1 Ped. 5:2, 3) Nan lo por programá reunionnan adishonal pa sirbishi di vèlt pa esnan ku ta sali den sirbishi mainta trempan, despues di skol òf despues di trabou. E superintendente di sirbishi tin ku perkurá pa asigná publikadónan kualifiká pa hiba delantera, sòru pa tin sufisiente teritorio, revista i literatura disponibel pa e lunanan di aktividat spesial aki.
8 Den un kongregashon, e ansianonan a kuminsá animá e rumannan un par di luna di antemano pa traha pionero ousiliar. Tur siman nan tabata informá e kongregashon kuantu publikadó a haña aprobashon pa traha pionero ousiliar. Di e manera ei esnan ku tabata deseá di traha mas tantu den sirbishi tabatin sigur ku nan lo tin hopi hende pa traha kuné. A programá reunionnan adishonal pa sirbishi di vèlt, mainta trempan i anochi. Komo resultado 53 publikadó a traha pionero ousiliar na aprel, ku ta kasi mitar di e kongregashon!
9 Yuda Otronan Prediká: Ora esnan nobo i hóben kualifiká pa kuminsá prediká, nan por ser asigná pa traha den sirbishi di vèlt ku publikadónan eksperensiá. Nan lo por haña e oportunidat ei durante e temporada di Memorial ora hopi ruman den kongregashon lo oumentá nan aktividat. Bo tin un studiante di Beibel progresivo ku ta biba na armonia ku Yehova su normanan hustu? Bo tin yu ku ta komportá nan mes bon i ku ta hasiendo bon progreso pero ku no ta publikadó ainda? Si un di nan ta ekspresá e deseo di bira un publikadó no-batisá i bo ta pensa ku nan ta kualifiká, pone un di e ansianonan na haltura di esei. E superintendente presidente lo hasi areglo pa dos ansiano konsiderá e asuntu huntu ku bo i e yu òf studiante.
10 E lunanan ku ta bin tambe lo ta un temporada ekselente pa esnan inaktivo bolbe bira aktivo den kongregashon. E superintendentenan di Estudio di Buki di Kongregashon i e otro ansianonan mester hasi tur nan esfuerso pa bishitá rumannan inaktivo i ekstendé un kaluroso invitashon pa traha ku nan den sirbishi. Si nan tabata inaktivo pa hopi tempu, dos ansiano lo mester papia ku nan promé pa wak si nan ta kualifiká.—km-PA 11/00 pág. 3.
11 Prepará pa Memorial: E reskate ta e ekspreshon di mas grandi di “e grasia [òf, “bondat inmeresí,” NW] di Dios.” (Echo. 20:24) Miónes di hende apresiativo rònt mundu lo reuní riba djasabra 22 di mart despues ku solo baha pa konmemorá e morto di Kristu. Nos ke invitá i yuda tur hende sinsero pa asistí na e evento importante aki ku ta duna prueba di e bondat inmeresí ku Yehova a mustra na humanidat.
12 Traha un lista di tur e hendenan ku bo tin pensá di invitá. Sin duda, bo lista lo inkluí famia, bisiña, kolega di trabou òf kompañero di skol, studiante i eks-studiante di Beibel i tur otro hende ku bo ta bishitá riba un base regular. Si un hende ku bo invitá tin pregunta tokante Memorial, kisas lo bo haña ku ta útil pa usa e apèndiks den e buki Beibel Ta Siña, na página 206-8, ku ta trata e Sena di Señor. Kisas esei asta lo habri kaminda pa un estudio di Beibel, ya ku bo ta haña oportunidat pa introdusí e publikashon ku nos ta usa pa duna estudio di Beibel.
13 Un ruman muhé tabatin 48 famia pa invitá riba su lista. Kada bes ku el a kaba di invitá un famia, e tabata skrap nan nòmber i skirbi e fecha ku el a hasi esei. Esta kontentu el a keda ora 26 hende ku el a invitá a bin Memorial! Un ruman hòmber ku tin un tienda a invitá un trahadó ku ta un eks-pastor. E hòmber a asistí i despues el a bisa tur emoshoná: “Den un ora mi a siña mas tokante Beibel ku e 30 añanan ku mi tabata den Iglesia Katóliko.” No muchu tempu despues di Memorial el a kuminsá studia for di e buki Beibel Ta Siña.
14 Un Kampaña Spesial: Riba djasabra 1 di mart lo kuminsá ku un kampaña spesial rònt mundu pa invitá hende pa Memorial, i esaki lo sigui te ku 22 di mart. Tur publikadó lo ke partisipá plenamente den e kampaña importante aki. Ta mas mihó pa duna e doño di kas un invitashon den su man en bes di djis laga e invitashon atras. Sin embargo, si boso tin un teritorio grandi, e ansianonan por tuma desishon ku por laga un invitashon na un manera diskreto kaminda no tin hende na kas. Durante wikènt nos lo ofresé nos revistanan aktual tambe.
15 Siendo ku nos no tin hopi tempu pa parti e invitashon, ta mihó pa mantené nos presentashon breve. Sea amigabel i entusiasmá. Lo bo por bisa algu asin’aki: “Nos ke invitá abo ku bo miembronan di famia i bo amigunan na un evento importante ku lo tuma lugá riba 22 di mart. Esaki ta bo invitashon. E invitashon ta duna bo mas detaye.” Kisas e doño di kas tin pregunta. Òf kisas e ta aseptá e invitashon i asta ta ekspresá ku lo e bin. Hasi anotashon di esnan ku mustra interes i hasi areglo pa bolbe bèk.
16 Aña pasá un sòldá a haña un invitashon pa Memorial na su porta. El a disidí ku e ke bai, pero e mester a pidi aprobashon di su serzjant. Ora el a mustra e serzjant e invitashon, e serzjant a keda ketu pa un ratu i despues a bisa ku su mayornan ta Testigu di Yehova i ku e tabata bai reunion ku nan. P’esei, no solamente el a duna e sòldá aprobashon pa asistí sino el a bai kuné tambe!
17 Demostrá Apresio: Segun ku e temporada di Memorial di 2008 ta aserká, laga kada un di nos reflekshoná riba e bondat inmeresí ku Yehova ta mustra na nos. Apòstel Pablo a skirbi: “Nos tambe ta supliká boso pa no aseptá e bondat inmeresí di Dios i keda sin kumpli ku su propósito.” (2 Kor. 6:1, NW) Kon nos ta demostrá ku nos no a keda sin kumpli ku e propósito di Dios su bondat inmeresí? Pablo a skirbi: “Den tur kos nos ta rekomendá nos mes komo sirbidónan di Dios.” (2 Kor. 6:4) P’esei, nos ta demostrá nos apresio pa Yehova su regalo mediante nos bon kondukta i entusiasmo den prediká e bon nobo. E temporada di Memorial aki nos lo tin un ekselente oportunidat pa oumentá nos aktividat, dunando testimonio kabal di e bon nobo.
[Study Questions]
1. Ki bon nobo nos tin pa kompartí ku otro hende?
2. Dikon e temporada di Memorial ta duna nos un ekselente oportunidat pa duna testimonio di e bon nobo?
3. Kiko lo yuda nos oumentá nos aktividat komo famia?
4. Kon nos lo por regla nos asuntunan pa traha pionero ousiliar si nos tin un trabou di henter dia?
5. Kon lo bo por yuda un hende di edat òf enfermo traha pionero ousiliar?
6. Kon un hóben batisá ku ta bai skol ainda lo por logra traha pionero ousiliar?
7. Kiko e ansianonan por hasi pa lanta entusiasmo pa sirbishi durante e temporada di Memorial?
8. Kiko e eksperensia di e kongregashon menshoná den e paragraf ta siña nos?
9. Pakiko e temporada di Memorial ta un tempu ekselente pa esnan ku kualifiká kuminsá prediká e bon nobo?
10. Kiko e ansianonan por hasi pa yuda esnan inaktivo?
11. Kiko ta e ekspreshon di mas grandi di e “bondat inmeresí” di Dios?
12. Ken nos mester invitá pa Memorial?
13. Kon Yehova a bendishoná e esfuerso di dos publikadó ku a disidí di invitá otro hende pa Memorial?
14. Ki kampaña lo kuminsá rònt mundu riba 1 di mart?
15. Kon nos por ofresé e invitashon di Memorial?
16. Ki eksperensia ta mustra kon balioso e kampaña pa invitá hende den e teritorio pa Memorial ta?
17. Kon nos ta demostrá ku nos no a keda sin kumpli ku e propósito di Dios su bondat inmeresí?
[Box on page 3]
Ken Lo Por Traha Pionero Ousiliar?
◼ Famianan
◼ Esnan ku tin trabou di henter dia
◼ Hende di edat i enfermo
◼ Esnan ku ta bai skol
[Box on page 4]
Ora di Parti Invitashon di Memorial:
◼ Sea breve; papia ku entusiasmo
◼ Hasi anotashon di esnan ku mustra interes i bolbe bèk
◼ Ofresé revista durante wikènt