“Kumpli Debidamente ku e Predikamentu di e Palabra di Dios”
1 Ora ku sinseramente bo ta apresiá algu bon ku bo a risibí, bo no ta demostrá esei mediante bo aktitut i akshonnan? Klaro ku sí! Ripará kon apòstel Pablo a reakshoná riba e bondat amoroso ku Yehova a mustra na humanidat. Pablo a deklará ku entusiasmo: “Grasia sea na Dios pa su don ineksplikabel!” Kiko e “don” òf regalo ei ta enserá? Esei ta tur e “grasia sobreabundante di Dios” ku el a mustra na nos, di kua e manifestashon mas grandi tabata di regalá su propio Yu komo un reskate pa nos pikánan.—2 Kor. 9:14, 15; Huan 3:16.
2 Pablo su gratitut a keda na palabra so? Sigur ku no! El a demostrá su apresio profundo den hopi manera. E tabata masha interesá den e bienestar spiritual di su kompañeronan kristian i kier a hasi loke e tabata por pa yuda nan benefisiá plenamente di Dios su bondat amoroso. Pablo a bisa lo siguiente tokante e kompañeronan ei: “Teniendo pues un amor grandi pa boso, a agradá nos pa no solamente kompartí e evangelio di Dios ku boso, ma tambe nos mes bida, pasobra boso a bira masha stimá pa nos.” (1 Tes. 2:8) Fuera di yuda esnan ku ya tabata parti dje kongregashon pa sigurá nan salbashon, Pablo a prediká e bon nobo inkansablemente. El a biaha míles di kilometer riba tera i laman pa haña esnan “ku tabata korektamente dispuesto pa bida eterno.” (Echo. 13:48, NW) Pablo su apresio profundo pa tur loke Yehova a hasi p’e, a motiv’é pa ‘prediká e palabra di Dios debidamente.’—Kol. 1:25.
3 Nos apresio pa tur loke Yehova a hasi pa nos, no ta motivá nos pa ofresé yudansa spiritual na esnan ku tin mester di yudansa den nos kongregashon? (Gal. 6:10) I nos no ta sinti nos mes motivá pa partisipá mas plenamente posibel den e predikashon dje bon nobo di Reino den henter nos teritorio?—Mat. 24:14.
4 Un Oportunidat pa Demostrá Apresio: Tur aña e Memorial, esta, e konmemorashon dje morto di Kristu, ta duna nos un oportunidat spesial pa demostrá apresio pa loke Yehova i Hesus a hasi pa nos. Esaki no ta djis un reunion mas òf simplemente konmemorashon di un suseso. Hesus a bisa: “Hasi esaki na mi rekuerdo.” (Luk. 22:19) E Memorial di Kristu su morto ta un okashon pa nos meditá riba e klase di persona ku Hesus ta. Ta un tempu pa nos rekonosé ku awe e ta na bida i aktivo, ku el a risibí gloria i un reino pa e bida fiel ku el a hiba i pa su sakrifisio. Tambe e konmemorashon aki ta un oportunidat pa demostrá nos sumishon na Kristu su hefatura segun ku e ta dirigí asuntu i aktividatnan dje kongregashon kristian. (Kol. 1:17-20) Henter e pueblo di Dios mester demostrá rèspèt i asistí na e Memorial di Kristu su morto. E aña aki lo ten’é riba djaweps, 28 di mart 2002, despues ku solo baha.
5 E esfuerso diligente ku nos a hasi aña pasá promé ku Memorial, a pone ku nos tabatin un máksimo di 6.084 persona presente p’e okashon na islanan ABC. Kuantu e asistensia lo ta e aña aki? Esei lo dependé hopi di kon ‘duru nos traha i lucha’ pa yuda mas tantu hende posibel asistí.—1 Tim. 4:10.
6 Fuera di asistí na e Sena di Señor, kisas nos por oumentá nos aktividat di sirbishi di fèlt. Sin duda, sientos di ruman lo traha pionero durante un òf mas luna. Durante e último dos añanan aki, nos tabatin un promedio di 362 pionero ousiliar den e temporada di Memorial na luna di aprel. Abo por areglá bo asuntunan pa gosa dje privilegio di traha pionero ousiliar e aña aki? Esei lo ta un bon manera pa demostrá bo apresio sinsero pa e regalo ku Dios a duna nos, esta, e sakrifisio di Kristu. Bo por tin sigur ku lo bo risibí Yehova su bendishon, manera e siguiente eksperensianan ta mustra.
7 Un ruman muhé ku tin un trabou full-time, a skirbi tokante su eksperensia di traha pionero ousiliar mart aña pasá: “Nos Ministerio di Reino di febrüari 2001 a animá tur hende ku nan sirkunstansia a pèrmití nan, pa traha pionero ousiliar durante e temporada di Memorial. Komo ku mart tabatin sinku djasabra, esei a pas bon ku mi programa. Pues mi a disidí di entregá mi solisitut.” Na prinsipio di luna ora el a kuminsá prediká, el a pone komo meta pa purba start un studio di Beibel. El a logra? Sí, ora e tabata duna su di 52 ora di testimonio e luna ei! Kiko el a konkluí for di esei? “Ora nos hasi èkstra esfuerso, nos ta haña bendishonnan maravioso.”
8 Kiko ta e benefisionan pa un famia ku traha pionero huntu? Un famia di kuater persona ku a hasi esei aprel aña pasá, ta haña ku nunka mas nan lo no lubidá e luna ei. E mama a bisa: “Dor ku nos tabata uní den e ministerio, nos tabata kuminsá kada dia ku un punto di bista masha positivo. Papiando tokante nos aktividatnan diario den sirbishi a hasi ora di kome masha dushi.” E yu hòmber a bisa: “Tabata dushi pa traha ku Papi durante siman, ora ku normalmente e ta na trabou.” E tata a agregá: “Komo kabes di famia, mi a sinti un satisfakshon sabiendo ku nos tabata traha huntu den e aktividat di mas importante di nos tempu.” Bo famia por traha pionero huntu? Pakiko no papia over di esei komo famia i wak si ta posibel pa tur hende traha pionero durante e temporada aki di Memorial?
9 Nos Por Hasi Mart Nos Mihó Luna di Tur Tempu? Na prinsipio di aña 2000, Nos Ministerio di Reino a hasi e pregunta: “Nos Por Hasi Aprel 2000 Nos Mihó Luna di Tur Tempu?” Kiko tabata e reakshon? Nos a alkansá vários máksimo nobo. Tabatin un máksimo nobo di 389 pionero ousiliar den un luna. Ademas, nos tabatin máksimo nobo di ora, revista lagá i rebishita. Bo ta kòrda e entusiasmo ku e gran aktividat spiritual aki a generá den bo kongregashon durante e luna spesial ei? E aña aki, nos por igualá òf asta surpasá e logronan ei? Si nos tur uni forsa, Mart 2002 por bira “Nos Mihó Luna di Tur Tempu.” Dikon mart?
10 Tin dos motibu pakiko mart lo mester ta un luna di aktividat spesial. Na promé lugá, dor ku Memorial ta na fin di mart, esei lo duna nos amplio oportunidat pa invitá mas tantu hende posibel for di den kuminsamentu di luna. Na di dos lugá, e aña aki mart tin sinku fin di siman kompleto, i e ora ei ta bira mas fásil pa esnan ku ta traha òf bai skol sirbi komo pionero ousiliar. Dikon bo no ta kai sinta i prepará un programa práktiko, usando e kalènder ku tin na final dje suplemento aki? Traha pionero ousiliar kisas ta mas fásil di loke bo ta pensa. Por ehèmpel, si bo programá 8 ora di sirbishi di fèlt pa kada un dje sinku fin di simannan ei, lo bo tin ku programá solamente 10 ora mas pa e restu dje luna pa bo yega e 50 oranan rekerí.
11 Kiko e ansianonan por hasi pa yuda tur hende den kongregashon “kumpli debidamente ku e predikamentu di e palabra di Dios”? Kultivá entusiasmo mediante partinan di reunion i kòmbersashonnan personal. Superintendentenan di Studio di Buki di Kongregashon i nan asistènt por tuma e inisiativa pa papia ku kada persona asigná na nan grupo i ofresé nan yudansa personal. Podisé tur loke e rumannan mester ta poko palabra bondadoso di animashon òf algun sugerensia práktiko. (Pro. 25:11) Hopi ruman lo ripará ku dor di hasi algun ahuste chikí den nan programa, nan por disfrutá dje privilegio di sirbi komo pionero ousiliar. Den vários kongregashon, mayoria (si no ta tur) ansiano i sirbidó ministerial huntu ku nan esposa a pone un bon ehèmpel dor di traha pionero ousiliar durante e temporada di Memorial. Esaki a enkurashá hopi publikadó pa djòin nan. Tin publikadó ku no ta den posishon pa traha pionero, sea ta debí na limitashonnan físiko òf otro sirkunstansia. Pero por animá nan pa demostrá nan apresio dor di hasi tur loke nan por den e ministerio huntu ku e restu dje kongregashon.
12 Éksito ta dependé di planeamentu kuidadoso di parti dje ansianonan. Nan mester programá reunionnan pa sirbishi di fèlt na oranan kumbiniente durante henter siman. Si ta posibel, e superintendente di sirbishi lo asigná di antemano rumannan kapasitá pa kondusí tur e reunionnan pa sirbishi. Bon preparashon ta nesesario pa asina e reunionnan aki no dura mas ku 10 pa 15 minüt, i esaki ta inkluí organisá e gruponan, asigná teritorio i hasi orashon. (Wak e Kaha di Pregunta den Nos Ministerio di Reino di sèptèmber 2001.) Duna e kongregashon un bon splikashon dje programa di aktividat p’e luna ei i pega esei na e bòrchi di informashon.
13 Mester pone sufisiente teritorio disponibel. E superintendente di sirbishi tin ku reuní ku e ruman enkargá ku teritorio pa hasi areglo pa traha esnan ku no ta ser kubrí ku frekuensia. Mester pone énfasis riba traha e no-na-kasnan, prediká den kaya i di negoshi pa negoshi i prediká parti anochi. Kaminda ta apropiado, por yuda algun publikadó duna testifikashon via telefon.
14 Yuda Nan Sirbi Atrobe: Tin ruman den e teritorio di bo kongregashon ku no ta aktivo mas den predikashon dje bon nobo? E personanan ei ainda ta parti dje kongregashon i tin mester di yudansa. (Sal. 119:176) Ya ku fin dje mundu bieu aki ta asina serka i e mundu nobo ta djis nos dilanti, nos tin bon motibu pa hasi tur esfuerso pa yuda esnan ku a bira inaktivo. (Rom. 13:11, 12) Durante e último dos añanan, un promedio di 38 hende na islanan ABC a reakshoná tur aña riba e yudansa duná i a bira aktivo atrobe. Kiko nos por hasi pa yuda hopi mas tantu ruman rebibá e amor i konfiansa ku nan tabatin na prinsipio?—Heb. 3:12-14.
15 E kuerpo di ansiano lo kier konsiderá kon nan por yuda esnan ku a bira inaktivo durante e último añanan. (Mat. 18:12-14) E sekretario mester kontrolá e karchinan di Registro di Publikadó di Kongregashon i hasi un anotashon di tur esnan ku a bira inaktivo. Via e areglo di pastoreo mester hasi un esfuerso spesial pa duna yudansa. Kisas un ansiano por bishitá un sierto publikadó ku ántes e tabatin amistat òf asosiashon kuné, òf por pidi otro publikadónan pa yuda. Podisé nan a studia ku e persona ku ta inaktivo awor i nan lo keda kontentu di por duna un yudansa spesial n’e momentu di nesesidat aki. Nos ta spera ku hopi di esnan ku a bira inaktivo lo ser stimulá pa bolbe kuminsá prediká e palabra di Dios. Si nan ta kualifiká, no tin mihó tempu pa nan kuminsá ku durante e temporada di Memorial!—Pa mas detaye, wak e Kaha di Pregunta den Nos Ministerio di Reino di novèmber 2000.
16 Tin Otro Persona Ku Ta Kualifiká? Yehova ta sigui bendishoná su pueblo dor di trese “e rikesa di tur nashon” na dje. (Hag. 2:7) Tur aña míles di hende ta kualifiká komo publikadó no-batisá. Ken nan ta? Yunan di Testigunan di Yehova i tambe studiantenan di Beibel progresivo. Kon nos sa si nan ta kualifiká pa ta publikadó dje bon nobo?
17 Yunan di Testigunan di Yehova: Hopi mucha tin años ta kompañá nan mayornan den e trabou di kas pa kas, maske ainda nan no ta sirbi komo publikadó no-batisá. Mart lo ta un bon luna pa nan kuminsá. Kon bo por sa si bo yu ta kualifiká? Página 100 dje buki Organisá pa Cumpli cu Nos Ministerio ta bisa ku esei ta “ora un mucha ta ehemplar den su kondukta i ta kapas pa hasi un ekspreshon personal di su fe dor di papia ku otronan tokante e bon nobo, impulsá di kurason pa hasi asina.” Si bo ta pensa ku bo yu ta kualifiká, papia ku un dje ansianonan dje Komité di Sirbishi di Kongregashon.
18 Studiantenan di Beibel Ku Ta Kualifiká: Despues ku un studiante di Beibel a atkerí konosementu i ta asistí na reunion pa un tempu, kisas e kier bira un publikadó di Reino. Si ta abo ta studia kuné, konsiderá e preguntanan aki: E ta progresando segun su edat i abilidat? El a kuminsá kompartí su fe informalmente ku otro hende? E ta bistiendo e “hende nobo,” esta, un personalidat nobo? (Kol. 3:10) E ta kumpli ku e kualifikashonnan pa publikadó no-batisá, manera e buki Nos Ministerio ta deskribí na página 97-9? Si ta asina, bo mester tuma kontakto ku e Komité di Sirbishi di Kongregashon pa nan por hasi areglo pa dos ansiano reuní huntu ku abo ku e studiante. Si e ta kualifiká, e dos ansianonan lo inform’é ku e por kuminsá partisipá den e ministerio públiko.
19 Kiko di Aprel ku Mei? Esakinan tambe lo ta lunanan spesial pa mas aktividat den sirbishi di fèlt. Hopi ruman ku traha pionero ousiliar na mart lo por bolbe hasié na aprel i/òf mei. Durante aprel ku mei, nos lo presentá prinsipalmente e revistanan Toren di Vigilansia i Spièrta! den e ministerio. Nan tin un efekto masha probechoso riba bida di esnan ku lesa nan! E revistanan aki a hunga un papel grandi den e maravioso oumento ku nos a logra rònt mundu. Durante aprel ku mei nos lo hasi un esfuerso spesial pa ofresé e revistanan na mas tantu hende posibel. Planea for di awor pa partisipá plenamente.
20 En bista dje mayor aktividat ku tin planeá, bo no tin ku oumentá bo kuota di revista ku bo ta haña via kongregashon? Henter e aña di sirbishi nos ta ofresé E Toren di Vigilansia i Spièrta! tur djasabra, e dia ku ta designá komo nos Dia di Revista. Sin embargo, ya ku hopi ruman ta bai partisipá den e sirbishi di pionero ousiliar i nos tur lo ofresé e revistanan pa dos luna kompleto, kisas ta nesesario pa oumentá bo pedido di revista den kongregashon. Si ta asina, sea asina bon di informá e sirbidó di revista den bo kongregashon mesora. Na mesun tempu, e sirbidó di literatura mester hasi sigur ku tin un bon stòk dje tratado Lo Bo Kier Sa Mas Tocante Bijbel? pa tur hende haña.
21 Hopi ruman a ekspresá nan apresio p’e parti den Nos Ministerio di Reino titulá “Kiko Nos Por Bisa dje Revistanan.” Bo a hasi bon uso dje areglo aki dor di siña e presentashonnan di revista ku e ta sugerí? Dikon bo no ta usa un parti di bo studio di Beibel di famia di tur siman pa praktiká e presentashonnan aki?
22 Hasi e Mihó Uso Posibel dje Temporada di Memorial Aki: Meskos ku apòstel Pablo, laga nos demostrá Yehova kuantu nos ta apresiá “su don ineksplikabel,” dor di partisipá plenamente den e aktividatnan spiritual ku tin planeá pa e temporada aki di Memorial. E aktividatnan aki ta entre otro (1) asistí na e okashon mas importante di aña, e selebrashon dje Sena di Señor riba djaweps, 28 di mart 2002, (2) yuda esnan ku a bira inaktivo pa rebibá “e amor ku [nan] tabatin na prinsipio” (Rev. 2:4, NW; Rom. 12:11), (3) yuda nos yunan i studiantenan di Beibel ku ta kualifiká, pa nan bira publikadó no-batisá i (4) partisipá mas plenamente posibel den e trabou di evangelisá, si por, asta komo pionero ousiliar na mart i despues tambe.—2 Tim. 4:5.
23 Nos ta hasi orashon sinsero pa nos tur por tin un pleno partisipashon den e predikashon dje bon nobo di Reino e temporada aki di Memorial, i asina demostrá e profundidat di nos apresio pa tur loke Yehova a hasi pa nos.
[Box on page 6]
Programa Personal di Sirbishi di Fèlt pa Mart 2002
Djadumingu Djaluna Djamars Djarason Djaweps Djabièrnè Djasabra
1 2
Dia di Revista
3 4 5 6 7 8 9
Dia di Revista
10 11 12 13 14 15 16
Dia di Revista
17 18 19 20 21 22 23
Dia di Revista
24 25 26 27 28 29 30
MEMORIAL Dia di Revista
DESPUES
31 KU SOLO BAHA
Bo por programá un total di 50 ora pa traha pionero ousiliar na mart?