Sigui Deklará Yehova Su Obranan Maravioso

¹ No tin niun otro persona manera nos gran Dios, Yehova! David a skirbi: “O SEÑOR mi Dios, hopi ta e maravianan ku bo a hasi, i bo pensamentunan pa ku nos; no tin ningun ku ta di kompará ku bo.” (Sal. 40:5) Yehova su obranan maravioso ta entre otro, kreashon di e universo, e Reino Mesiániko, aktonan di miserikòrdia pa ku su pueblo i e kampaña mundial di predikashon. (Sal. 17:7, 8; 139:14; Dan. 2:44; Mat. 24:14) Amor pa Yehova i apresio pa tur loke el a hasi ta impulsá nos pa konta otronan di dje. (Sal. 145:5-7) Durante mart, aprel i mei nos lo tin oportunidat pa hasi esaki mas plenamente.

² Komo Pionero Ousiliar: Abo lo por programá bo skema di tal manera ku bo por dediká 50 ora den sirbishi durante un òf mas dje lunanan di aktividat spesial aki? Kualke ahuste ku bo hasi den bo rutina lo ta bale la pena. (Efe. 5:16) Hopi ruman a ripará ku e trabou di pionero ousiliar ta yuda nan mehorá e kalidat di nan sirbishi. Nan ta sinti nan mas kómodo ora nan ta prediká di kas pa kas, i nan ta haña mas chèns pa usa nan Beibel. Dor ku nan ta pasa mas tantu tempu den sirbishi, ta bira mas fásil pa nan sigui yuda personanan interesá. Anto algun ruman ku anteriormente no tabatin studio di Beibel a kuminsá un studio durante nan sirbishi komo pionero ousiliar. E trabou di pionero ousiliar ta un aktividat gososo ya ku e ta enserá esfuerso pa yuda otro hende.—Echo. 20:35.

³ No konkluí lihé ku bo sirkunstansianan no ta permití bo traha pionero ousiliar. Un ansiano ku a traha pionero ousiliar aña pasá tin dos yu i un trabou fultaim. Kon e ruman hòmber drùk aki a logra hasié? Dor ku e ta traha den siman, el a plania pa traha hopi den sirbishi durante wikènt. Djasabra e tabata kuminsá for di 7 or di mainta dunando testimonio riba kaya. Vários ruman den su kongregashon ku tabatin sirkunstansianan similar tambe a traha pionero, i nan un a apoyá i animá otro. Den un otro kongregashon un ruman muhé di 99 aña a disidí di traha pionero durante mei, despues ku su yu muhé a invit’é pa djòin e. Otro rumannan den e kongregashon a yuda e ruman muhé di edat aki bai di kas pa kas i tambe studio di Beibel dor di kore su ròlstul. Tambe el a duna testimonio via telefon, riba kaya i via karta. E ta konvensí ku el a logra esaki, no riba su propio forsa, ma solamente ku yudansa di Yehova.—Isa. 40:29-31

⁴ Purba pone riba papel un skema ku ta kuadra mihó ku bo sirkunstansianan. Den e edishon aki tin algun skema komo ehèmpel, podisé nan por yuda bo. Bo ta traha fultaim òf bo ta bai skol? Un skema ku ta usa prinsipalmente e wikèntnan lo ta mas práktiko pa bo. Si bo tin problema ku salú i bo no tin e energia pa keda hopi ora den sirbishi, un skema ku ta rekerí tiki ora pa dia lo ta mihó. Papia ku otronan tokante bo deseo pa traha pionero ousiliar. Podisé nan tambe lo pone esei komo nan meta.

⁵ Kon Hóbennan Por Partisipá: Yehova ta keda kontentu ora hóbennan ta deklará su obranan maravioso. (Sal. 71:17; Mat. 21:16) Si bo ta un hóben batisá, kisas bo por traha pionero ousiliar durante un luna ku bo tin fakansi di skol. Si bo no por traha komo pionero ousiliar, lo bo por pone metanan spesífiko pa oumentá bo partisipashon i mehorá bo kalidat di sirbishi durante e lunanan ei? Si bo ta sali den sirbishi huntu ku bo mayornan pero bo no ta un publikadó no-batisá ainda, awor lo ta un bon chèns pa bo purba kualifiká. Bo no tin nodi pensa ku bo mester ta un eksperto den kontestá preguntanan tokante Beibel òf ku bo mester sa mes tantu ku adultonan batisá. Bo ta komprondé e siñansanan básiko di Beibel? Bo ta kumpli ku normanan moral di Beibel? Bo ke ta konosí komo un Testigu di Yehova? Anto papia ku bo mayornan tokante e asuntu aki. Nan por aserká e ansianonan pa hasi areglo pa reuní ku bo pa wak si bo ta kumpli ku e rekisitonan.—Wak e buki Nos Ministerio, página 98-9.

⁶ Yuda Otro Hende Prediká: Studiantenan di Beibel progresivo lo por kualifiká pa djòin nos komo publikadó durante e binidero lunanan di aktividat spesial. Si bo tin un studiante di Beibel ku ta progresá bon, aserká bo superintendente di studio di buki òf e superintendente di sirbishi pa yudansa. Un di nan por bai e studio ku bo pa evaluá e studiante su progreso. Si e studiante ta kualifiká i e ta deseá di bira publikadó, e superintendente presidente por hasi areglo pa dos ansiano reuní ku bo i e studiante. (Wak E Toren di Vigilansia na spañó di 15 di novèmber 1988, página 17.) Asina e studiante haña aprobashon, kuminsá entren’é mesora den sirbishi.

⁷ Superintendentenan di studio di buki mester duna atenshon spesial na tur publikadó den nan grupo ku ta inaktivo òf iregular. Invitá nan personalmente pa traha ku bo den sirbishi. Si nan tin hopi tempu inaktivo, ta konsehabel pa dos ansiano papia ku nan promé pa wak si nan ta kualifiká. (Wak e Kaha di Pregunta den Nos Ministerio di Reino di novèmber 2000.) E selo di e kongregashon durante e lunanan aki di aktividat spesial lo por stimulá nan pa bolbe kuminsá sali regularmente den sirbishi.

⁸ Prepará Awor pa Mas Aktividat: Ansianonan, kuminsá stimulá e kongregashon for di awor pa traha pionero ousiliar. Bo komentarionan positivo i bo bon ehèmpel por hasi hopi. (1 Ped. 5:3) Kua ta e kantidat máksimo di pionero ousiliar ku e kongregashon a yega di logra? Boso por surpas’é e aña aki? E superintendentenan di studio di buki i nan asistente mester buska maneranan pa animá tur esnan den nan grupo pa oumentá nan aktividat. Podisé e superintendente di sirbishi por programá mas reunion pa sirbishi di vèlt. Informá e kongregashon di antemano di e areglonan. Hasi sigur di asigná publikadónan kapas pa hiba delantera, i sòru tambe ku e reunionnan pa sirbishi ta kuminsá i kaba na tempu. (Wak e Kaha di Pregunta den Nos Ministerio di Reino di sèptèmber 2001.) E superintendente di sirbishi mester hasi areglo tambe pa tin sufisiente teritorio, revista i literatura.

⁹ Aña pasá ansianonan di un kongregashon ku entusiasmo a kuminsá animá e rumannan for di trempan pa traha pionero ousiliar, i vários di e ansianonan a entregá nan solisitut. Nan a programá mas reunion pa sirbishi di vèlt: unu tabata mitar di seis di mainta pa prediká riba kaya, un otro tabata tres or djatardi pa e rumannan ku tabata sali for di skol i esun di tres tabata seis or djatardi pa e rumannan ku a sali for di trabou. Ademas, tabatin areglo pa tres reunion di sirbishi di vèlt riba djasabra. Kon e kongregashon a reakshoná? Durante aprel nan tabatin 66 pionero ousiliar!

¹⁰ Pakiko no apartá tempu durante boso siguiente studio di famia pa pone metanan realístiko pa e lunanan binidero? Ku bon koperashon i planiamentu, algun òf tur miembro di famia lo por traha pionero ousiliar. Si esei no ta posibel, pone meta pa oumentá boso aktividat dor di traha mas largu ku normal den sirbishi, òf sali mas tantu biaha den sirbishi. Hasi orashon tokante e asuntu aki komo famia. Boso por tin e konfiansa ku Yehova lo bendishoná boso esfuersonan.—1 Juan 3:22.

¹¹ Dios Su Obra di Mas Maravioso: Dios su ekspreshon mas grandi di amor ta e echo ku el duna su Yu komo reskate pa nos. (1 Juan 4:9, 10) E sakrifisio di reskate ta e base legal pa salba humanidat di piká i morto. (Rom. 3:23, 24) Dor di Hesus su sanger dramá, e aliansa nobo a drenta na vigor, i a bira posibel pa hende imperfekto ser adoptá komo yunan di Dios ku e prospekto di goberná den e Reino selestial. (Jer. 31:31-34; Mar. 14:24) Loke ta mas importante ainda ta ku Hesus su bida di obedensia perfekto a santifiká e nòmber di Yehova. (Deu. 32:4; Pro. 27:11) Riba djadumingu 4 di aprel, despues ku solo baha, lo tin e Memorial, e konmemorashon di e morto di Kristu rònt mundu.

¹² Selebrashon di e Sena di Señor ta engrandesé e obranan maravioso di Yehova. E diskurso ta duna nos mas apresio pa loke Yehova a hasi dor di perkurá e reskate. Personanan interesá ku asistí lo por mira otro obranan maravioso di Dios. Nan lo por mira e union i amor kaluroso ku Yehova a siña su pueblo desplegá. (Efe. 4:16, 22-24; Sant. 3:17, 18) E okashon importante aki por tin un berdadero impakto riba e manera di pensa di un persona ku asistí, p’esei nos kier pa mas tantu hende posibel t’ei presente.—2 Kor. 5:14, 15.

¹³ Invitá Hende pa Asistí: Kuminsá prepará mesora dor di traha un lista di e personanan ku bo tin ku invitá. Riba bo lista lo mester tin miembronan di famia ku no ta Testigu, konosínan di trabou òf di skol, studiantenan di Beibel aktual i di pasado i tur bo rebishitanan. E superintendentenan di studio di buki mester inkluí publikadónan inaktivo riba nan lista.

¹⁴ Usa e invitashonnan imprimí di Memorial, i taip òf skirbi na un manera nèchi riba nan e ora i sitio di e Memorial. Òf si bo ke bo por usa e invitashon ku ta aparesé parti patras di E Toren di Vigilansia di 15 di mart 2004 òf di e ¡Despertad! di 22 di mart 2004. Segun ku 4 di aprel ta yega serka, bolbe rekordá e personanan riba bo lista dor di bishitá nan òf bèl nan.

¹⁵ Na Memorial: Purba yega trempan e anochi di Memorial. Demostrá hospitalidat dor di kuminda e hendenan nobo na un manera kariñoso. (Rom. 12:13) Bo tin un responsabilidat spesial pa ku e hendenan ku bo a invitá. Laga nan sinti nan bonbiní, i introdusí nan na otro miembronan di kongregashon. Kisas bo por yuda nan haña un lugá banda di bo. Si algun di nan no tin Beibel òf buki di kantika, hasi areglo pa nan wak huntu ku bo òf ku otro hende. Despues di e selebrashon, ofresé pa kontestá kualke pregunta ku nan por tin. Si tin hende ku a bini pa promé bes, puntra nan si nan lo kier siña mas di Dios su Palabra i su propósito. Ofresé nan un studio di Beibel na kas.

¹⁶ Sigui Yuda Esnan Ku A Asistí: Durante e simannan despues di Memorial, esnan ku a asistí lo por tin mester di mas yudansa. Esaki ta inkluí personanan ku ántes tabata asistí regularmente na nos reunionnan pero ku awor tin un asosiashon limitá ku e kongregashon. E ansianonan lo keda pendiente pa no lubidá riba e personanan ei i lo buska pa sa dikon nan a stòp di progresá spiritualmente. Laga nan mira e urgensia di nos tempu. (1 Ped. 4:7) Yuda nan tur mira e benefisio di obedesé e apelashon urgente ku Beibel ta hasi na nos pa reuní regularmente ku e pueblo di Dios.—Heb. 10:24, 25.

¹⁷ Asta si nos biba pa semper, Yehova su obranan ta muchu maravioso pa nos komprondé nan plenamente. (Jòb 42:2, 3; Ekl. 3:11) P’esei, nunka nos lo no falta motibu pa alab’é. Durante e temporada di Memorial aki nos por demostrá nos apresio pa Yehova su obranan maravioso dor di hasi un esfuerso spesial pa ekspandé nos sirbishi.

[Study Questions]

1. Kua ta algun dje obranan maravioso di Yehova ku abo ta apresiá partikularmente?

2. Ki benefisio nos ta saka personalmente dor di traha pionero ousiliar?

3. Kon bin algun ruman por a traha pionero ousiliar apesar di sirkunstansianan difísil?

4. Ki faktornan nos lo tin ku tene kuenta kuné ora nos ta traha un skema pa traha pionero ousiliar?

5. Ki metanan hóbennan por pone pa mart, aprel i mei?

6. Kon nos por yuda studiantenan di Beibel bira publikadó di e bon nobo?

7. Kon lo por yuda publikadónan iregular òf inaktivo?

8, 9. Kiko ansianonan por hasi pa stimulá e rumannan pa e aktividat spesial?

10. Kon famianan por prepará pa oumentá nan aktividat?

11. (a) Ki kosnan maravioso e sakrifisio di Kristu a logra? (b) Unda i ki ora lo tene e Memorial lokal?

12. Kon e selebrashon di e Sena di Señor por benefisiá esnan interesá ku asistí?

13, 14. Ken nos mester invitá pa Memorial i kon?

15. Kon nos por mustra hospitalidat riba e anochi di Memorial?

16. Kiko nos por hasi pa yuda esnan ku a asistí na Memorial, progresá spiritualmente?

17. Dikon nos mester sigui deklará Yehova su obranan maravioso?

[Chart on page 5]

Bo Por Usa un di e Skemanan Aki pa Traha Pionero Ousiliar?

Mart Z M* D* W* D V Z Total

Tur Dia 2 1 1 1 1 1 5 51

Dos Dia 0 5 0 5 0 0 0 50

Wikènt So 5 0 0 0 0 0 8 52

Aprel Z M D W D* V* Z Total

Tur Dia 2 1 1 1 1 1 5 50

Dos Dia 0 0 0 0 5 5 0 50

Wikènt So 5 0 0 0 0 0 8 52

Mei Z* M* D W D V Z* Total

Tur Dia 2 1 1 1 1 1 4 51

Dos Dia 0 5 0 0 0 0 5 50

Wikènt So 3 0 0 0 0 0 7 50

*Den e luna aki tin sinku