Deklará na Tur Parti e Ekselensianan di Yehova
1 “Di bo, o SEÑOR, ta e grandesa, e poder, e gloria, e viktoria i e mahestat, di bèrdat, tur loke ta den shelu i riba tera.” (1 Kró. 29:11) Ki efekto nos amor i apresio pa Yehova tin riba nos? E ta motivá nos pa ‘deklará na tur parti e ekselensianan di esun ku a yama nos for di skuridat na su lus maravioso.’ (1 Ped. 2:9, NW) Nos no por stòp di konta otro hende tokante nos gran Dios! Durante e lunanan di mart, aprel i mei nos lo tin ekselente oportunidatnan pa deklará e ekselensianan di Yehova.
2 Kampaña Spesial pa Anunsiá Memorial: Djaluna dia 2 di aprel, nos lo resaltá Yehova su ekselensianan ora nos selebrá e Sena di Señor. Rònt mundu durante e periodo di 17 di mart te ku 2 di aprel, lo distribuí un invitashon spesial pa e evento importante aki. Tur publikadó ta ser animá pa partisipá plenamente. Esaki lo ta un ekselente oportunidat pa esnan nobo ku ta kualifiká kuminsá prediká e bon nobo. Si bo tin studiante di Beibel òf yu ku lo por kualifiká, tuma inisiativa pa papia ku e ansianonan.
3 E kampaña aki lo ta similar na esun ku a tuma lugá en konekshon ku e Kongresonan di Distrito “Liberashon Ta Serka!” Lo manda sufisiente invitashon pa e kongregashonnan pa asina kada publikadó por haña 40 ehemplar, i kada pionero por haña 90 ehemplar. Mantené bo presentashon breve. Kisas bo por bisa: “Esaki ta bo invitashon pa un evento anual importante ku ta bai tuma lugá. Nos lo apresiá bo presensia. E invitashon ta duna bo e detayenan.” Sin embargo si e doño di kas tin pregunta, tuma tempu pa kontestá nan. E sekshon di e apèndiks relashoná ku e Sena di Señor den e buki Beibel Ta Siña, ku ta kuminsá na página 206 por ta un gran yudansa den esaki. Durante fin di siman nos lo ofresé nos revistanan aktual huntu ku e invitashon spesial. Tuma nota di tur persona ku a mustra interes, i hasi areglo pa bai bèk.
4 Kaminda ta posibel, nos mester entregá e doño di kas e invitashon aki personalmente. P’esei, tene un registro di esnan ku no ta na kas, i hasi areglo pa bolbe pasa na un otro ora. Durante e último siman promé ku Memorial, kongregashonnan ku a sobra un stòk grandi di invitashon por laga nan kaminda no haña hende na kas. Pero no hasié mas promé. Hasi sigur ku bo rebishitanan, studiantenan di Beibel, famianan, koleganan di trabou, bisiñanan i otro konosínan tambe ta haña un invitashon.
5 Traha Pionero Ousiliar: Bo por deklará e ekselensianan di Yehova mas plenamente trahando komo pionero ousiliar durante mart, aprel i mei? Pa bo por hasi esaki probablemente lo bo tin ku hasi sierto ahustenan den bo programa diario. (Efe. 5:15-17) Pero bo por ta sigur ku bo esfuersonan pa hasi mas den Yehova su sirbishi lo duna bo goso i Yehova su bendishon. (Pro. 10:22) E temporada di Memorial ta yegando serka, pues awor ta e tempu pa nos kuminsá plania.—Pro. 21:5.
6 Un ruman muhé di 90 aña tabatin e privilegio di traha pionero ousiliar aña pasá. El a konta: “Mi ta gusta traha den hardin i mi kier a kuminsá planta, pero mi a realisá ku mi mester a reareglá mi prioridatnan. Mi kier a pone e interesnan di Reino na promé lugá, p’esei mi a disidí di traha pionero ousiliar den luna di mart.” Su esfuersonan a ser bendishoná? El a bisa: “Awor mi ta sinti mas ku mi ta parti di e kongregashon, i esaki a hala mi mas serka Yehova.” Nos por analisá nos prioridatnan i hasi kambionan similar si esei ta nesesario?
7 Pa alkansá e rekisito di 50 ora pa pionero ousiliar kisas no ta asina difísil manera bo ta pensa. Hasi orashon i konsiderá bo aktividatnan diario, traha un schedule i not’é riba bo kalènder teokrátiko. Abo sa mihó kiko ta bo sirkunstansia. Si bo salú no ta muchu bon òf bo ta falta energia, kisas bo por traha un par di ora tur dia. Si bo ta traha fultaim òf bo ta bai skol, podisé bo por traha pionero ousiliar saliendo den sirbishi den oranan di anochi òf durante fin di siman.
8 Hopi ruman por a traha pionero ousiliar komo famia. Durante añanan anterior, un pareha kasá tabata vasilá pa inskribí komo pionero ousiliar pasobra nan a pensa ku nan sirkunstansia no tabata permití nan hasi e trabou ei. Kiko nan a hasi tokante e asuntu? “Nos a hasi orashon pidi Yehova yuda nos kumpli ku loke hopi tempu kaba nos a deseá di hasi huntu.” Ku planifikashon apropiá, nan por a alkansá nan meta. Nan a agregá: “Tabata maravioso. Huntu nos a haña hopi bendishon. Nos sugerensia ta, purb’é. Si nos a logra, kisas boso tambe por.”
9 Pakiko no apartá tempu durante boso siguiente estudio di famia pa konsiderá kon boso tur por oumentá boso aktividat durante e siguiente lunanan? Asta si bo famia kompletu no por traha pionero, podisé un miembro por hasi esaki ku yudansa i koperashon di e otro miembronan di famia. Si esei no ta posibel, probablemente boso famia por pone meta pa pasa mas tempu den e ministerio durante e lunanan spesial aki di aktividat.
10 Yuda Otro: Entusiasmo ta kontagioso. Papia ku otronan tokante bo deseo pa traha pionero ousiliar. Esaki lo por animá nan pa inskribí. Ademas, rumannan ku a traha komo pionero den pasado lo por duna bo sugerensianan ku lo yuda bo regla bo asuntunan i traha bo programa di tal manera ku bo ta alkansá bo meta. (Pro. 15:22) Si abo por traha pionero ousiliar, pakiko no invitá un otro publikadó, kisas un persona den e mesun sirkunstansia ku bo, pa djòin bo den e aktividat gososo aki?
11 Hopi ansiano ta hasi e areglonan nesesario pa nan por partisipá den e rasgo spesial aki di sirbishi. (Heb. 13:7) Esaki sigur ta un animashon pa e kongregashon! Ansianonan por generá entusiasmo tambe mediante nan kòmbersashonnan ku otronan. Podisé algun palabra di animashon òf sugerensia práktiko ta nèt loke un persona tin mester pa motiv’é pa traha pionero ousiliar. Probablemente e superintendente di sirbishi lo hasi areglo pa reunionnan adishonal pa sirbishi di vèlt pa asina tur publikadó por prediká huntu ku e grupo, asta despues di skol òf trabou. Mester anunsiá e areglonan aki regularmente. Tambe lo e hasi sigur ku tin sufisiente teritorio i literatura.
12 Asta si bo sirkunstansianan no ta permití bo traha pionero, bo por animá esnan ku sí a inskribí pa hasié i hasi orashon pa nan. (Pro. 25:11; Kol. 4:12) Kisas bo por hasi areglo pa traha ku nan den sirbishi un dia èkstra durante siman òf pa keda mas tantu den sirbishi ku normalmente.
13 Meta di 400 Pionero Ousiliar na Aprel: Na aña 2000, e tres islanan, Aruba, Bonaire i Kòrsou huntu, a alkansá e máksimo di 389 pionero ousiliar. P’esei, un meta realístiko pa aprel binidero ta 400 pionero ousiliar. Nos por alkans’é si un promedio di 1 di kada 6 publikadó den tur kongregashon traha e trabou di pionero ousiliar. Klaru ku algun kongregashon lo tin asta mas publikadó ku nan sirkunstansia ta permití nan traha pionero ousiliar. Mayoria di kongregashon por logra e meta ei fásilmente. Imaginá bo e entusiasmo ku esaki lo generá den bo kongregashon i e efekto positivo ku lo e tin riba e trabou di prediká den bo teritorio!
14 Dikon aprel ta un luna ekselente pa traha pionero ousiliar? Memorial lo ta na prinsipio di e luna, i esei ta duna nos oportunidat amplio pa rebishitá e personanan ku asistí. Nos lo ofresé e revistanan ku e meta pa laga e buki Beibel Ta Siña ora di hasi rebishita i kuminsá estudionan di Beibel. P’esei, e trabou di pionero durante aprel lo duna hopi publikadó e oportunidat di kuminsá estudio di Beibel. Den algun pais durante e temporada aki ta bira skur mas lat i generalmente e wer ta dushi. Ademas, den aprel tin sinku djadumingu i tambe un periodo di fakansi ku ta pone ku ta bira mas fásil pa esnan ku ta traha òf ta bai skol inskribí nan mes.
15 Ku kada temporada di Memorial ku pasa nos ta yega mas serka di e fin di e sistema di kosnan aki. E tempu ku a resta pa konta otro hende di nos gran Dios ta kòrtiku. (1 Kor. 7:29) Unabes ku e temporada di Memorial aki a pasa, e oportunidatnan presioso ku el a brinda nos pa duna alabansa na nos Tata selestial a pasa bai pa semper. P’esei, laga nos hasi preparashon awor pa hasi tur loke nos por pa, durante mart, aprel i mei, nos deklará na tur parti e ekselensianan di Yehova!
[Study Questions]
1. Kiko ta motivá nos pa deklará na tur parti e ekselensianan di Yehova?
2. Kua kampaña spesial ta ser planiá pa anunsiá Memorial, i ken por partisipá?
3. Kiko nos por bisa pa invitá hende na Memorial?
4. Kon nos lo distribuí e invitashonnan spesial pa Memorial?
5. Dikon nos tin ku kuminsá plania awor pa nos traha pionero ousiliar?
6. Kiko nos por siña for di e eksperensia di un ruman muhé di 90 aña ku a traha pionero ousiliar aña pasá?
7. Ta difísil pa sirbi komo pionero ousiliar?
8. Kiko a yuda un pareha kasa traha pionero ousiliar?
9. Kiko boso lo por hasi durante boso siguiente estudio di famia komo preparashon pa e binidero lunanan di aktividat spesial?
10. Dikon nos tin ku papia ku otronan tokante nos deseo pa traha pionero ousiliar durante e temporada di Memorial aki?
11. Kon ansianonan por generá entusiasmo pa e trabou di pionero ousiliar den e lunanan binidero?
12. Kiko lo bo por hasi si bo no por traha pionero ousiliar?
13. Ki meta a pone pa e tres islanan, i kon bo kongregashon por kontribuí pa alkans’é?
14. Dikon aprel ta un bon luna pa traha pionero ousiliar?
15. Dikon nos mester tin un sentido di urgensia segun ku e temporada aki di Memorial ta yega serka?
[Box on page 4]
Nos Por Tin 400 Pionero Ousiliar na Aprel?
◼ Analisá bo prioridatnan
◼ Konsiderá boso metanan komo famia
◼ Papia ku otronan tokante bo plannan