Imitá e Gran Maestro Ora di Usa e Buki Beibel Ta Siña
1 E Gran Maestro, Hesus, semper a splika kosnan na un manera simpel i kla. Pa a stimulá su oyentenan pa pensa, tin biaha e tabata puntra nan promé kiko ta nan opinion. (Mat. 17:24-27) El a hala hende su atenshon na e Palabra di Dios. (Mat. 26:31; Mar. 7:6) E tabata kouteloso pa e no duna su disipelnan demasiado informashon, ya ku e tabata konsiente ku nan lo a sigui siña. (Juan 16:12) Hesus tabata interesá tambe pa sa si su disipelnan tabata kere i komprondé loke e tabata siña nan. (Mat. 13:51) E buki Beibel Ta Siña ta diseñá pa yuda nos siña hende di e mesun manera.
2 Preguntanan di Introdukshon: Ora boso ta bai kuminsá studia un kapítulo, ta bon pa hala atenshon na e preguntanan di introdukshon bou di e título. Hasi e preguntanan aki den forma retóriko pa lanta e studiante su apetit. Òf bo por anim’é pa komentá brevemente riba e preguntanan ei. No tin nodi konsiderá su komentarionan en detaye ni di korigí kada ekspreshon robes. Bo por simplemente gradisié pa su opinion i kuminsá konsiderá e informashon. Su komentarionan riba e preguntanan di introdukshon lo yuda bo haña sa si bo tin ku duna mas atenshon na un sierto parti di e lès.
3 Tekstonan di Beibel: E estudio mester konsentrá riba e Skritura. (Heb. 4:12) Sin embargo, no ta nesesario pa lesa tur teksto ku ta ser menshoná. Enfatisá esnan ku ta mustra e base bíbliko pa nos kreensianan. Podisé no ta nesesario pa lesa tekstonan ku ta duna informashon históriko adishonal. E buki Beibel Ta Siña ta presentá e bèrdat na un manera fásil pa hende komprondé. Mantené e estudio simpel. Enfoká riba e puntonan prinsipal, i evitá e tendensia di papia demasiado tokante detayenan òf di bin ku informashon adishonal den e konsiderashon sin ku esaki ta nesesario.
4 Apèndiks: E apèndiks ta kontené 14 tópiko ku ta komplementá e teksto prinsipal. Bo no ta obligá di konsiderá e tópikonan aki durante e estudio. Den kaso di algun tópiko, bo por skohe pa animá bo studiante pa lesa e informashon adishonal riba su mes, spesialmente si e ta komprondé i aseptá e informashon den e teksto prinsipal. Por ehèmpel, si e studiante ta kere kaba ku Hesus ta e Mesias, kisas no ta nesesario pa boso trata e tópiko “Hesukristu—E Mesias Primintí” ora boso ta konsiderá kapítulo 4, “Ken Hesukristu Ta?” Na otro okashonnan kisas ta bon pa tuma tempu durante e estudio pa konsiderá e informashon di e apèndiks òf parti di dje.
5 Si bo skohe pa konsiderá e informashon di e apèndiks, lo bo por prepará e preguntanan di antemano i konsiderá e paragrafnan ku e studiante manera lo bo a hasi ku e teksto prinsipal. Òf dependiendo di e nesesidatnan di e studiante, lo bo por skohe pa tuma un par di minüt durante e estudio pa repasá e informashon kuné. Esaki lo permití bo hasi sigur ku e ta komprondé e informashon ku el a lesa su so.
6 Kuadro di Repaso: E kuadro na fin di kada kapítulo ta kontené deklarashonnan ku por lo general ta kontestá e preguntanan di introdukshon. Bo por usa e deklarashonnan aki pa repasá e puntonan prinsipal di e kapítulo. Algun publikadó a ripará ku ta bon pa huntu ku e studiante lesa kada deklarashon i podisé e tekstonan relashoná ku nan. Kaba nan ta pidi e studiante pa splika brevemente kon e tekstonan ta proba e deklarashon. Esaki ta yuda e maestro saka afó si e studiante ta komprondé e puntonan prinsipal di e lès bon i tambe kon Beibel ta apoyá nan, i si e ta di akuerdo ku nan. Ademas, esaki ta yuda e studiante siña kon pa usa Beibel pa splika e bèrdat na otro hende.
7 E manera mas efektivo pa kumpli ku nos enkargo di siña hende i hasi disipel ta di imitá Hesus su métodonan di siña. (Mat. 28:19, 20) E buki Beibel Ta Siña por yuda nos hasi esei. Hasi bon uso di dje pa siña otro hende e bèrdat na un manera kla, simpel i interesante.
[Study Questions]
1. Kon Hesus a siña hende?
2. Den ki maneranan nos por usa e preguntanan di introdukshon pa kada kapítulo?
3. Kon nos por mantené e estudio simpel?
4. Kiko ta determiná si nos mester tuma tempu durante e estudio pa konsiderá informashon di e apèndiks?
5. Kon nos por konsiderá e informashon for di apèndiks si nos skohe pa hasi esaki?
6. Kon nos por usa e kuadro di repaso na fin di kada estudio?
7. Kon nos por usa e buki Beibel Ta Siña pa kumpli ku nos enkargo?