Probechá Traha Mas den Sirbishi Durante Temporada di Memorial!

1. Ki bon motibu nos tin pa hasi esfuerso pa traha mas den sirbishi durante mart, aprel i mei?

¹ Bo por hasi mas den e trabou di prediká durante e temporada di Memorial ku ta aserkando? Durante e temporada akí den hopi parti di mundu e klima ta faborabel i ta bira skur mas lat. Algun publikadó por usa nan dianan liber pa traha den sirbishi. Dia 2 di aprel nos lo kuminsá ku un kampaña spesial pa invitá hende interesá pa bin Memorial riba 17 di aprel. Despues di esei, nos lo hasi esfuerso pa kultivá interes di e personanan ku a asistí na Memorial i invitá nan pa bin skucha e diskurso spesial den e siman di 25 di aprel. Sí, nos tin hopi motibu pa hasi esfuerso pa traha mas den sirbishi durante mart, aprel i mei.

2. Kua ta un manera ekselente ku nos por hasi mas den sirbishi?

² Traha Pionero Ousiliar: Un manera ekselente ku nos por hasi mas ta si nos traha pionero ousiliar. Ya ku nos tur tin un programa drùk, lo ta nesesario pa nos plania i hasi ahuste den nos programa. (Pro. 21:5) Kisas bo por posponé algun aktividat ku no ta dje esensial ei. (Fil. 1:​9-⁠11, NW ) Dikon no papia ku rumannan den bo kongregashon tokante bo deseo di traha pionero i mira si nan tambe lo por traha pionero?

3. Kon famianan por plania pa traha mas tantu den sirbishi?

³ Lo ta bon pa kada famia konsiderá nan metanan durante e siguiente anochi di Adorashon Komo Famia. (Pro. 15:⁠22) Si tur hende den e famia kooperá, kisas algun di nan lo por traha pionero ousiliar durante ún luna òf mas. Pero, kiko si esaki no ta posibel? Wèl, e famia por plania pa partisipá den sirbishi den siman parti atardi òf traha mas tantu den sirbishi durante wikènt.

4. Ki bindishon nos ta risibí ora nos traha mas den sirbishi durante e temporada di Memorial akí?

⁴ Yehova ta tuma nota di tur loke nos ta hasi pa sirbié i ta apresiá nos sakrifisionan. (Heb. 6:⁠10) Ora nos hasi esaki tantu pa Yehova komo pa otro hende, nos ta eksperensiá e goso di duna. (1 Kró. 29:⁠9; Echo. 20:⁠35) Abo por probechá traha mas den sirbishi durante e temporada di Memorial akí, i asina eksperensiá e goso i bindishon ku esei ta trese kuné?