Hasi e Temporada di Konmemorashon Algu Gososo!
1. Kon nos por oumentá nos goso den e temporada di Konmemorashon?
1 Lo bo ke oumentá bo goso den mart, aprel i mei? Un manera pa logra esei ta di sali mas den sirbishi i, si ta posibel, traha komo pionero ousiliar. Pero kon esaki por oumentá bo goso?
2. Dikon nos goso ta oumentá ora nos ta sali mas den sirbishi?
2 Oumentá Bo Goso: Yehova a krea nos ku e kapasidat di sinti goso ora nos ta ador’é i asina satisfasé nos nesesidat spiritual. (Mat. 5:3) Tambe el a traha nos di tal manera ku nos por sinti nos felis ora nos hasi algu pa otro hende. (Echo. 20:35) Ora nos ta sali den sirbishi nos ta hasi tur dos, esta adorá Dios i yuda otro hende. Pues ta lógiko ku mas nos ta den sirbishi, mas nos goso ta oumentá. Anto mas nos prediká, mas eksperensia i konfiansa nos ta haña, i nos lo ta ménos nèrvioso. Tambe nos lo haña mas oportunidat pa duna testimonio i kuminsá estudio di Beibel. Tur esaki ta hasi nos sirbishi mas dushi.
3. Dikon mart i aprel ta dos luna ideal pa traha pionero ousiliar?
3 Mart i aprel ta dos luna ideal pa traha pionero ousiliar ya ku nos por skohe pa traha sea 30 òf 50 ora. Ademas, nos kampaña pa invitá hende pa bin na e Konmemorashon lo kuminsá djasabra 22 di mart i dura te djaluna 14 di aprel, e dia ku nos lo konmemorá e morto di Hesukristu. Tur kongregashon lo ta entusiasmá ya ku hopi publikadó lo ta trahando “skouder ku skouder” pa kubri mas tantu teritorio posibel den e tempu stipulá.—Sof. 3:9, NW.
4. Kiko nos tin ku hasi si nos ke traha pionero ousiliar?
4 Kuminsá Plania: Si bo no a hasié ainda, tuma tempu pa wak bo programa i mira unda bo por hasi ahuste pa bo sali mas den sirbishi durante un òf mas luna. Pidi Yehova su guia. (Sant. 1:5) Papia ku bo famia i e rumannan di bo kongregashon tokante bo plan. (Pro. 15:22) Apesar di un programa drùk òf problema ku salú, kisas bo tambe lo por sinti e goso di traha pionero ousiliar.
5. Kiko nos lo logra ora nos ta sali mas den sirbishi den e temporada di Konmemorashon?
5 Yehova ke pa su sirbidónan ta felis. (Sal. 32:11) Ora nos hasi esfuerso pa sali mas den sirbishi den e temporada di Konmemorashon, nos lo tin mas goso; ma no esei so, tambe nos lo hasi nos Tata selestial kontentu.—Pro. 23:24; 27:11.