Parti 6:—Kon pa Kondusí Estudio di Beibel Progresivo
Ora un Studiante Hasi un Pregunta
1 Unabes un estudio di Beibel ta bon establesí, por lo general ta mihó pa konsiderá siñansanan di Beibel den un manera ordená en bes di bula di un tópiko pa otro. Esaki ta yuda e studiante edifiká un fundeshi di konosementu eksakto i progresá spiritualmente. (Kol. 1:9, 10) Sin embargo, hopi bes studiantenan ta hasi pregunta riba vários tópiko durante e estudio. Kon nos mester trata ku esakinan?
2 Usa Disernimentu: Por lo general bo por kontestá preguntanan ku tin di haber ku e informashon ku boso ta studiando asina ku nan presentá. Si e publikashon ku bo ta studia ku e persona ta trata e pregunta ei mas despues, podisé ta sufisiente pa djis menshoná esei. Sin embargo, si e pregunta no tin di haber ku e informashon òf bo tin ku hasi investigashon pa kontest’é korektamente, lo ta mihó pa konsiderá e asuntu despues di e estudio òf na un otro okashon. Algun publikadó ta haña ku dor di skirbi e pregunta, nan ta duna e studiante e siguransa ku nan ta tuma su pregunta na serio, i ala bes esaki ta yuda ku e estudio no ta desviá.
3 Hopi siñansa bíbliko ta ser konsiderá djis brevemente den nos publikashonnan básiko pa estudio. Kiko si un studiante tin difikultat pa aseptá un sierto siñansa òf e ta pega fuertemente na un kreensia falsu? Kisas ta bon pa konsiderá mas informashon ku ta splika en detaye kiko Beibel ta bisa di e tópiko ei. Si ainda e studiante no ta konvensí, laga e tópiko ei para te un otro biaha i sigui ku su estudio regular. (Juan 16:12) Segun ku e ta gana mas konosementu i ta progresá spiritualmente, lo e por bin komprondé e siñansa ei di Beibel.
4 Sea Modesto: Si bo no ta sigur di e kontesta pa un pregunta, resistí e tentashon di duna bo opinion personal. (2 Tim. 2:15; 1 Ped. 4:11) Spliká e studiante ku lo bo bai buska informashon riba e asuntu i trese e kontesta p’e. Podisé bo por asta usa e oportunidat aki pa siña e studiante kon pa hasi investigashon. Mustr’é progresivamente kon pa usa e vários medionan pa hasi investigashon ku e organisashon di Yehova a perkurá. Di e manera aki, ku tempu e lo por kontestá su propio preguntanan.—Echo. 17:11.