Un Karta di Kuerpo Gobernante

Kerido Kompañeronan Testigu di Yehova,

Apòstel Pablo a probechá di kada oportunidat pa ekspresá su amor i apresio pa su rumannan den fe. Na e kristiannan na Roma, el a skirbi: “Mi ta gradisí mi Dios pa medio di Hesukristu pa boso tur, pasobra boso fe ta wòrdu proklamá den henter mundu.” (Rom. 1:8) Sí, den henter e Imperio Romano, e kristiannan ei di promé siglo tabata konosí tantu pa nan fe fuerte komo nan selo den e trabou di prediká. (1 Tes. 1:8) Pues no ta nada straño ku Pablo tabatin asina tantu kariño pa su rumannan!

Meskos ku Pablo, nos ta gradisí Yehova kada bes ku nos pensa riba boso. Nos ta stima boso tur masha hopi! I boso por tin sigur ku Yehova ta stima kada un di boso. Algun di boso ta haña oposishon pisá, i tòg boso ta sigui prediká. Esta kontentu Yehova ta sintié ora boso desplegá kurashi i balentia!—Pro. 27:11.

Segun ku boso ta lesa i meditá kuidadosamente riba e “Aktividat di Testigunan di Yehova den Tempu Moderno” ku tin den e edishon nobo di e Anuario eksitante i fortalesedor di fe, boso lo mira un kantidat di evidensia ku nos Señor Hesukristu ta sali “konkistando, i pa konkistá,” i ku ningun arma ku wòrdu forma kontra siguidónan di Kristu lo no prosperá.—Rev. 6:2; Isa. 54:17.

Na e kristiannan den Filipos, Pablo a skirbi: “Mi ta gradisí mi Dios . . . pa motibu di boso partisipashon den e evangelio.” (Fil. 1:3-5) Esei ta nèt loke nos komo miembronan di Kuerpo Gobernante ta sinti pa boso. Durante e aña di sirbishi 2007, rònt mundu 6.691.790 publikadó a dediká un total di 1.431.761.554 ora na e predikashon di e bon nobo den 236 pais. Boso ta hasiendo un tremendo esfuerso pa plama e bon nobo! Pensa riba e efekto ku e esfuerso ku nos tur a hasi tin riba sientos di míles di bida. Tur esaki ta un alabansa na Yehova!

Na un otro okashon, Pablo a mustra ku e tabata ègt sinti pa su rumannan. El a skirbi esnan na Tesalónika: “Nos ta tene presente tur ora . . . boso perseveransia debí na boso speransa den nos Señor Hesukristu dilanti nos Dios i Tata.” (1 Tes. 1:2, 3, NW) Sí, bida ta yen di desafio i lo surgi problema, pero ta masha importante pa nos perseverá. Ki problemanan abo personalmente ta pasando aden? Bo ta sinti bo desanimá pasobra un malesa grave ta limitá loke bo por hasi den Yehova su sirbishi? Bo kasá ku bo a stima pa hopi aña a bira víktima di Seol, e enemigu di mas insasiabel ei? (Pro. 30:15, 16) Bo ta buskando, aparentemente enbano, un hende pa kasa kuné ku ta stima Yehova meskos ku bo, miéntras bo ta pega fielmente na e konseho bíbliko pa kasa solamente den Señor? (1 Kor. 7:39) Bo ta hasiendo esfuerso pa lanta bo yunan bou di sirkunstansianan ekonómiko hopi difísil? Sea kual sea bo situashon, si bo pone interesnan di Reino na promé lugá den bo bida, bo por tin sigur ku Yehova lo no ‘lubidá bo trabou i e amor ku bo a mustra pa su nòmber.’ Por fabor, rumannan, ‘no kansa di hasi bon’!—Heb. 6:10; Gal. 6:9.

Kiko lo por yuda bo perseverá? Meskos ku den kaso di e tesalonisensenan, “speransa den nos Señor Hesukristu” ta loke por yuda bo. Ku rason, Pablo despues a kompará “e speransa di salbashon” ku un bon hèlm ku por protehá un kristian for di pensamentu negativo i duda persistente.—1 Tes. 5:8.

En realidat, ora bo perseverá gososamente, bo ta dunando un kontesta na Satanas su akusashon kontra Dios su derecho di ta e soberano universal. Satanas ta pretendé ku sirbidónan di Dios ta egoista di naturalesa, i ounke ku nan ta dispuesto pa sirbi Dios pa un tempu, nan lo baha man si nan haña nan ku mas difikultat òf si e sistema di kosnan aki dura mas largu di loke nan a spera. Bo tin e privilegio pa demostrá ku Diabel ta un mentiroso baho! Kada dia ku pasa bo ta mas serka di e dia ku bo speransa lo bira realidat.

Meskos ku Pablo a sinti ku tabata un plaser p’e probechá di e oportunidat pa elogiá su rumannan pa nan fe dinámiko, nan aporte generoso na e trabou di prediká i nan perseveransia, gustosamente nos tambe ta probechá di e oportunidat aki pa elogiá boso i pa laga boso sa ku nos ta stima boso. Sigui ku e bon trabou!

Nos ta deseá ku e próksimo aña lo ta yen di bendishon di Dios. Nos ta deseá boso tur klase di éksito.

Boso rumannan,

Kuerpo Gobernante di Testigunan di Yehova