Repaso di Skol di Ministerio Teokrátiko
Lo konsiderá e siguiente preguntanan na e Skol di Ministerio Teokrátiko durante e siman di 27 di òktober 2008. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 1 di sèptèmber te ku 27 di òktober 2008.
KUALIDAT DI PAPIA
1. Kon nos por haña sa e motibu dikon hende ta kere sierto kosnan? [1 di sèpt., be-PA pág. 259 §2, 3] Ta tuma tempu pa haña sa kiko tin den kurason di un hende i no ta algu ku nos ta logra di un dia pa otro. Loke por yuda ta pregunta. Nos por puntra: “Kiko bo ta pensa di . . . ?” “Kiko a konvensé bo ku . . . ?” òf “Kiko lo bo hasi si . . . ?” Promé ku nos mustra un hende ku su punto di bista ta robes, nos mester purba komprondé e sintimentu tras di su palabranan. Si nos oyentenan sinti ku nos ta komprondé nan, tin mas chèns ku nan lo pensa seriamente riba loke nos ta bisa.
2. Kon nos por yuda un hende saka prehuisio i odio for di su kurason? [15 di sèpt., be-PA pág. 260 §2] Un hende ku tin odio òf prehuisio mester siña mira otro hende, inkluso su mes, manera Yehova ta mira hende. Unabes e komprondé kon Yehova ta trata kada hende ku ternura sin importá nan background, nashonalidat òf rasa, lo e tin un base bíbliko firme pa disfrutá di relashonnan pasífiko ku otro hende. (Echo. 10:34, 35)
3. Kon nos por yuda nos studiantenan eksaminá nan kurason ku e meta pa nan sigui hasi progreso spiritual? [29 di sèpt., be-PA pág. 261 §3] Nos tin ku animá nos studiantenan pa no lubidá ku Beibel ta revelá kon Yehova ta mira nos. (Pro. 17:3) Nos mester yuda nan komprondé ku lesamentu di Beibel ta un manera pa haña sa kon Yehova ta mira nan “pensamentunan i intenshonnan di kurason,” ya asina nan por koperá ku Dios pa hasi e ahustenan nesesario. (Heb. 4:12)
4. Kiko nos no mester lubidá ora nos ta hasi esfuerso pa yega na kurason di nos oyentenan? [13 di òkt., be-PA pág. 262 §5] Ta bon pa kòrda ku ora nos ta siña otro hende nos papel ta di kolaborá ku Yehova. (1 Kor. 3:9) Ta Yehova ta esun ku ta evaluá kurason i ta atraé hende pa disfrutá di un relashon kuné. (Pro. 21:2; Juan 6:44) E no ta fòrsa ningun hende aseptá e bèrdat, pero segun ku nos ta usa e Skritura, e por laga kada hende komprondé ku nan ta skuchando e kontesta riba nan preguntanan òf riba nan orashonnan.
5. Dikon nos mester presta atenshon na e asuntu di taim nos partinan den reunionnan di kongregashon? [20 di òkt., be-PA pág. 263 §1, 3, kuadro] Ora nos taim nos partinan den kongregashon, nos ta “laga tur kos sosodé korektamente i na un manera ordená.” (1 Kor. 14:40) Mester dediká sufisiente tempu na kada punto prinsipal di instrukshon. Sea kual sea e kustumber lokal òf preferensia personal, nos reunionnan ta programá pa kuminsá i kaba na tempu.
PARTI NUM. 1
6. Kiko a konmové Pablo pa skirbi su promé karta na e korintionan? [1 di sèpt., si-S pág. 210 §3] Ta parse ku Pablo a haña un karta for di e kongregashon relativamente nobo na Korinto, i e mester a kontestá e karta akí. Ademas, Pablo a haña algun notisia ku a molesti’é. (1 Kor. 1:11; 5:1; 11:18) E notisianan ei a pone Pablo sintié asina angustiá ku ta te den e promé versíkulonan di kapítulo 7 di su karta el a bin referí na e karta ku pregunta ku e korintionan a manda p’e.
7. Kiko tabata algun motibu pakiko Pablo a skirbi su segundo karta na e korintionan? [15 di sèpt., si-S pág. 214 §1-2] Ora Tito a bin bèk for di Korinto, el a informá Pablo kiko tabata e reakshon di e kongregashon riba su promé karta, ku a konmové nan pa arepentí. Sinembargo, e bienestar spiritual di e kongregashon tabata den peliger debí na e “super-apòstelnan” ku Pablo a yama “apòstelnan falsu” i “trahadónan engañoso.” (2 Kor. 11:5, 13, 14) Pablo su outoridat komo apòstel tabata bou di atake. Pues, su segundo karta na e kristiannan na Korinto a duna nan nèt loke nan tabatin mester.
8. Kon kristiannan mester konsiderá e ministerio? [22 di sèpt., si-S pág. 216-217 §18] Den su segundo karta na e korintionan, Pablo a reflehá apresio profundo pa e ministerio. Kristiannan tambe mester hasi esaki. E sirbidónan kristian ku Dios a hasi kompetente no ta hasi negoshi ku e palabra di Dios pero ta sirbi Dios di kurason. No ta loke tin skirbí riba un dokumento ta hasi e sirbidó di Dios kompetente, sino fruta ku e ta produsí. Maske nos ministerio ta glorioso, nunka nos no ta konsiderá esaki un motibu pa halsa nos mes. Mas bien, nos ta realisá ku ta mediante Yehova su poder so nos por logra kumpli ku nos ministerio. (2 Kor. 2:16, 17; 3:1-5; 4:7)
9. Kon nos awe, meskos ku e rumannan na Filipos, por logra haña Dios su aprobashon i ser un fuente di goso pa nos rumannan? [13 di òkt., si-S pág. 225 §12] Nos por imitá e filipensenan dor di mustra generosidat i yuda nos rumannan ora nan ta den difikultat. (Fil. 1:3-6) Nos lo haña e aprobashon di Dios si nos sigui “para firme den ún spiritu, . . . luchando huntu pa e fe di evangelio,” briando komo “lusnan” den e mundu malbado akí. Ora nos hasi e kosnan akí, nos por ser un fuente di goso pa nos rumannan. (Fil. 1:27; 2:15; 4:1)
10. Ki efekto positivo Pablo i su kompañeronan tabatin riba e kongregashon na Tesalónika? [20 di òkt., si-S pág. 231 §13] Pablo a bisa ku tantu e komo esnan ku tabata kuné a kompartí no solamente e bon nobo di Dios sino asta nan mes bida na fabor di nan rumannan stimá na Tesalónika. Pablo a pidi den orashon pa e tesalonisensenan “abundá den amor pa otro.” Amor ekspresá di buena gana ta sumamente edifikante i ta separá kristiannan for di e mundu sin amor, korupto i inmoral. (1 Tes. 2:8; 3:12; 4:1-9)
LESAMENTU SEMANAL DI BEIBEL
11. Kiko ke men “entregá un hende [malbado] na Satanas pa destrukshon di su karni, pa [e] spiritu wòrdu salbá”? (1 Kor. 5:5) [1 di sèpt., w08-PA 1/7 “E Palabra di Yehova Ta Bibu—Puntonan Sobresaliente di e Kartanan na e Korintionan”] Ora un hende ser ekspulsá for di e kongregashon, e ta bira parti di e mundu malbado di Diabel atrobe. (1 Juan 5:19) Beibel ta bisa ku e ta ser entregá na Satanas. Su ekspulshon ta eliminá su mal influensia for di e kongregashon i asina ta konserbá e kongregashon su “spiritu” òf aktitut dominante. (2 Tim. 4:22)
12. Pablo a bisa “kada bes” Hesus su morto mester ser konmemorá. Kuantu biaha ta kada bes, i “te” ki tempu mester konmemor’é? (1 Kor. 11:26) [8 di sèpt., w08-PA 1/7 “E Palabra di Yehova Ta Bibu—Puntonan Sobresaliente di e Kartanan na e Korintionan”] Pablo tabata ke men ku ki ora ku kristiannan ungí tuma di e emblemanan di Memorial, esta, un biaha pa aña, riba 14 di nisan, nan lo “proklamá e morto di Señor.” Nan lo hasi esaki “te ora ku e bin,” esta, te ora ku e risibí nan den shelu mediante un resurekshon durante su “binida.” (1 Tes. 4:14-17)
13. Na kua vishon 2 Korintionan 12:2-4 ta referí, i ken probablemente a hañ’é? [22 di sèpt., w04-PA 15/10 pág. 8 §4; pág. 10 §9] E vishon a referí na e kondishon elevá di adorashon berdadero, e paradeis spiritual ku Yehova su pueblo ta disfrutá di dje den “tempu di e fin.” (Dan. 12:4) Ya ku e pasashi akí ta bin despues di e versíkulonan den kua Pablo a defendé su posishon komo apòstel, probablemente e tabata relatá su propio eksperensia.
14. Den ki sentido nos ta “sembra pa e spiritu”? (Gal. 6:8) [29 di sèpt., w08-PA 1/8 “E Palabra di Yehova Ta Bibu—Puntonan Sobresaliente di e Kartanan na e Galationan, Efesionan, Filipensenan i Kolosensenan] Nos ta hasi esaki dor di biba na un manera ku ta permití e spiritu di Dios obra libremente riba nos. Un hende ku ta sembra pa e spiritu, entre otro, ta hasi un esfuerso sinsero pa partisipá den aktividatnan ku ta promové fluho di e spiritu.
15. Kiko Pablo tabata ke men ora el a resa pidi pa e “spiritu i alma i kurpa [di e rumannan] sea preservá”? (1 Tes. 5:23) [20 di òkt., w08-PA 1/9 “E Palabra di Yehova Ta Bibu—Puntonan Sobresaliente di e Kartanan na e Tesalonisensenan i na Timoteo”] Pablo tabata referí na e kongregashon kristian den su totalidat. El a resa pidi pa e “spiritu,” òf disposishon mental, di esaki keda preservá. Tambe el a resa pidi pa e “alma,” esta, e bida, òf eksistensia di e kongregashon, i pa e “kurpa,” esta, e kuerpo òf totalidat di esnan ungí. (1 Kor. 12:12, 13) Pablo su orashonnan ta resaltá su interes intenso den e kongregashon. Si nos imit’é, nos orashonnan tambe lo reflehá interes profundo den nos hermandat mundial.