Kaha di Pregunta
◼ Kon tur hende por yuda mantené un ambiente ku ta faborabel pa siña na e reunionnan di kongregashon? (Deu. 31:12)
E echo ku nos tin rèspèt profundo pa Yehova i pa e reunionnan di kongregashon, ku ta un provishon di dje, ta motivá nos pa yega trempan i pa ta prepará pa siña for di dje. Ta práktiko pa yena e asientonan parti dilanti den salòn promé, i laga e stulnan mas patras pa esnan ku tin yu chikí i pa esnan ku yega lat. Promé ku reunion kuminsá, mester ahustá tur aparato elektróniko pa nan no distraé e presentenan. Si tur e presentenan tin un aktitut respetuoso durante henter reunion, lo tin ménos distraishon, i si tin mes, lo no ta masha kos.—Ekl. 5:1; Fil. 2:4.
Ora un hende kuminsá asistí na e reunionnan di kongregashon, esun ku konosé e hende ei por ofres’é pa sinta banda di dje. Esaki ta práktiko spesialmente ora nan bini ku mucha chikitu ku no ta kustumbrá di sinta ketu. Kisas baimentu di reunion ta un eksperensia nobo pa e famia. Si esei ta e kaso, probablemente e mayornan lo apresiá si nan por sinta patras kaminda nan lo kousa ménos distraishon ora nan tin ku sali un ratu for di e sala prinsipal pa atendé ku nan yunan chikitu. (Pro. 22:6, 15) Nos no mester pensa ku famianan ku yunan chikitu ta obligá di sinta den un sala separá kaminda e muchanan por sinti ku nan ta liber pa hasi bochincha. Por lo general ta mihó pa e mayor disipliná òf perkurá pa kualke otro nesesidat di e mucha pafó di e sala prinsipal i despues bin bèk den e sala prinsipal ku e mucha.
E ùshernan t’ei pa mantené un ambiente ku ta pas pa un kas di adorashon. Nan ta yuda famianan i esnan ku tin bes ta yega lat haña un asiento adekuá. E ùshernan ta konsiente ku nan mester ta diskreto i usa takto pa yuda hende haña un lugá di sinta kómodo sin kousa distraishon innesesario. Nan ta usa sano huisio ora nan tin ku trata ku kualke problema inesperá. Ora un mucha ta distraé otro hende, e ùshernan bondadosamente ta ofresé yudansa.
Tur esnan ku ta bini reunion pa adorá Yehova por kontribuí na un ambiente faborabel pa nos tur por siña di Yehova i su propósito pa trese un mundu nobo kaminda pas i hustisia lo reina.—Heb. 10:24, 25.