Presta Atencion na Declaracionnan Sagrado
1 No ta tur cos cu hende papia merecé atencion special. Pero ora Dios papia, tin motibu vital pa scucha. (Deu. 28:1, 2) Afortunadamente, escritornan inspirá a registrá “e declaracionnan sagrado di Dios” pa nos beneficio. (Rom. 3:2) E binidero congreso di distrito lo percurá oportunidadnan precioso pa tende e declaracionnan aki segun ta lesa i considerá nan. Con abo por presta atencion special?
2 Yega Trempan Tur Mainta: Imaginá bo e excitacion dje israelitanan ora a bisa nan pa topa Jehova na ceru di Sinaí pa tende su Ley! (Ex. 19:10, 11, 16-19) Si bo tin un actitud similar pa ricibí Jehova su instruccion n’e congreso di distrito, lo bo haci areglo pa yega trempan tur dia. Nos no por scucha henter e programa si nos cana yega lat i ta stroba otronan miéntras nos ta purba haña un lugá pa sinta. Lo habri porta dje lugá di congreso 8’or di mainta, i e programa ta cuminsá tur dia 9:30 di mainta.
3 Asta algun ruman cu ta yega trempan no ta na nan lugá ora e sesion cuminsá. Con bin? Nan ta warda te ora cu e presidente ta introducí e cantica di apertura pa nan stop di combersá cu amigunan i cuminsá cana bai pa nan asiento. Nos mester tuma nota cu vários minuut promé cu e cantica di apertura di cada sesion, e presidente lo ta sintá riba plataforma miéntras cu ta toca música di Reino di introduccion. Esei ta nos señal cu ta ora pa tuma asiento! Anto asina, ora anunciá e cantica di apertura, nos lo ta cla pa uni den canta alabansa na Jehova.
4 Scucha Como un Famia Uní: Ora cu tabata lesa declaracionnan sagrado pa e israelitanan congregá, famianan, incluso “e chikitinnan,” mester a scucha i siña. (Deu. 31:12) Na nos congresonan, no mester ‘laga mucha pa nan cuenta.’ (Pro. 29:15) Mayornan, haci areglo pa henter boso famia sinta huntu, incluso bo yunan tiener. Tin mayor ta warda te na e cantica di apertura pa bai baño cu e yunan. Sin embargo, esaki lo no siña e muchanan e gran importancia di cantica i oracion den nos adoracion. Ta cuantu mas mihó pa te caminda ta posibel, atendé asuntu di bai baño promé cu comienso di cada sesion!
5 Loke lo yuda nos scucha ta si nos sosegá bon tur anochi i evitá cuminda pisá durante dia. Concentrá riba loke e orador ta bisa. No permití bo mente dual. Sigui textonan lesá den bo Bijbel. Haci anotacionnan breve. Segun e rumannan ta duna cada discurso, repasá den bo mente loke e orador a bisa, i considerá con lo bo aplicá e informacion. Na fin dje dia, combersá tocante e programa como famia. Ki puntonan cada un a disfrutá di dje? Con bo famia por haci bon uso dje informacion aki?
6 Mustra Respet pa e Palabra di Dios: Congresonan ta duna nos un bon chens pa combersá cu amigunan i gosa di asociacion edificante. Dor di yega trempan, nos lo tin tempu pa combersá promé cu e programa cuminsá. Sin embargo, tin ruman ta combersá durante programa, keriendo ekibocadamente cu esaki ta causa tiki distraicion den un auditorio grandi. Asta ora ta tene reunionnan grandi, ta tempu pa scucha, mescos cu na un reunion na Salon di Reino. No mester laga telefon celular, pager, videocámara i cámara pa saca potret, causa distraicion durante programa.
7 Miéntras Moises tabata ricibí e Ley for di Jehova, “e no a come pan i e no a bebe awa.” (Ex. 34:28) Di igual manera, lo ta inapropiado pa come of bebe miéntras cu e programa ta andando. A ménos cu tin factornan serio di salú, warda te ora ta e “tempu señalá” pa esaki.—Ecl. 3:1.
8 Na algun congreso, ta sigui tin problema cu hopi ruman i asta mucha chikitu cu ta cana rond den gang pornada durante programa. Lo instruí ushernan pa pidi e personanan ei pa bai bek den auditorio. Boluntarionan cu ta traha den vários departamento mester bai sinta den auditorio asina cu nan caba cu nan trabou. A ménos cu boluntarionan ta asigná pa haci trabou esencial durante sesion, nan mester ta sintá na nan lugá, scuchando e programa. Nan no tin nodi keda cana rond pornada den e departamentonan, combersando cu otro miéntras cu e programa ta den sesion.
9 Nunca nos lo kier bira ‘stompi den nos oido’ ora nos ta scucha e Palabra di Dios. (Heb. 5:11) P’esei laga nos ta determiná pa mustra e debido respet na nos binidero congreso di distrito dor di scucha cu atencion ora ta considerá e declaracionnan sagrado for di Jehova.