Congresonan di Distrito 1999 “Dios Su Palabra Profético”
1 Ora e israelitanan tabata cerca di drenta e Tera Primintí, Moises a roga nan pa apreciá Dios su instruccion. El a bisa nan: “E no ta palabra sin balor pa boso, sino cu e ta nificá boso bida.” (Deu. 32:45-47) Nos no ta gradicidu na Jehova cu nos bida ta asina balioso p’e cu e ta sigui guia nos mediante su Palabra preciosísimo? P’esei, ansiosamente nos ta anticipá e Congreso di Distrito di tres dia “Dios Su Palabra Profético” i tambe loke Jehova tin wardá pa nos.
2 Sin duda bo a haci bo areglonan caba pa asistí na tur e dianan di congreso, pasobra bo sa cu Jehova ta verwagt pa bo ta presente. Bo por tin sigur cu e ta mira e esfuerso i sacrificionan individual cu su sirbidónan ta haci pa por asistí, i e ta keda corda e cosnan ei cu aprecio. (Heb. 6:10) Dor di asistí na cada dia di congreso, for dje cantica di apertura te cu e oracion di conclusion, nos ta demostrá Jehova cu nos ta considerá su palabranan dirigí na nos masha balioso. (Deu. 4:10) Tambe nos ta demostrá aprecio pa e trabou duru cu hopi di nos rumannan a haci pa prepará p’e congreso.
3 Pa haci areglo pa miles di persona dje pueblo di Dios reuní huntu na cada sitio di congreso ta rekerí planeamentu adelantá i bon organisacion. E echo cu nos sa cu e rumannan a haci e areglonan di congreso cu amor pa nos, mester impulsá nos pa cooperá, pa asina “tur cos tuma lugá decentemente i segun areglo.” (1 Cor. 14:40) Nos ta duna e siguiente informacion i recordatorionan pa bo por yega na bo congreso completamente prepará pa disfrutá dje alimento spiritual i compañerismo cristian.
Promé cu Congreso
4 Esnan cu bo ta studia Bijbel cuné i otro personanan interesá tin mester di yudansa pa haci areglonan personal pa asistí n’e congreso? Loke nan mira i tende na congreso lo por impulsá nan pa bira adoradó di Jehova. (1 Cor. 14:25) Ancianonan mester ta na altura di ken tin mester di yudansa cu hospedahe of transport, foral miembronan dje congregacion cu ta di edad, i percurá pa satisfacé nan necesidad cu amor.—Gal. 6:10.
Durante Congreso
5 Porta n’e sitio di congreso lo habri tur dia 8 or di mainta. Bo por warda lugá solamente pa bo miembronan pegá di famia of esnan cu bini cu bo den auto. Lo tin lugá cumbiniente reservá pa rumannan di edad, i tambe lo apartá lugá pa esnan incapacitá i esnan cu ta den rolstoel. No ta posibel pa apartá kamber n’e sitio di congreso pa hende cu alergia of cu malesa debí na medio ambiente. Tur dia ora bo bai for di caminda bo a sinta, por fabor, chek haci sigur cu bo ta bai cu tur bo pertenencianan.
6 Pa por reuní na gran cantidad na nos congresonan di distrito, nos tin cu cumpli cu cierto leynan local, reglamentunan pa candela i otro medidanan di siguridad. P’esei, no tin mag di drenta den edificio caminda nos ta reuní cu garoshi di baby ni stul di porch. Nan ta forma un peliger di trompecá caminda hende ta cana of entre rijnan di stul. Pero, sí ta permití stulnan di mucha portátil of pa den auto, cu ta pas riba stul i cu por mara riba stul banda dje mayornan.
7 Bo ta bai bautisá na e congreso di distrito? Pa e sesion di diasabra mainta, lo tin un seccion di stul reservá pa e candidatonan pa bautismo, i e ushernan lo dirigí bo na e lugá ei. Por fabor, purba pa bo ta sintá promé cu e sesion cuminsá. Bini cu bo Bijbel, buki di cantica, serbete i un trahe di baño modesto. Short cortá di jeans, T-shirt cu lema riba dje i trahenan por estilo, no ta apropiado pa un ocasion asina dignificá. Ancianonan cu ta repasá e preguntanan for dje buki Nos Ministerio cu candidatonan pa bautismo, mester haci sigur cu cada candidato ta comprendé e puntonan aki. Como cu bautismo ta un símbolo di dedicacion personal na Jehova Dios, lo ta inapropiado pa candidatonan pa bautismo tene man ora di bautisá.
8 Bo por usa cámara, videocámara i casetrecorder na congreso. Pero, uso of posicion dje ekiponan aki no mag blokea pasiyo, tapa bista di otro hende of kita atencion for dje programa. Nan mester por traha riba nan mes, es decir, no mag conectá nan na e sistema di zonido ni di coriente.
9 Ya cu e uso di telefon celular i pager a aumentá, por fabor, soru pa esakinan no interferí cu bo atencion n’e programa of cu e concentracion di esnan sintá rond di bo. No mag laga esakinan ring of bip ora cu bo ta sintá den auditorio. Si bo tin cu usa un telefon celular miéntras cu e programa ta den progreso, por fabor, haci esei pafó dje sala di auditorio.
10 Pa spar tempu i pa simplificá cos, Sociedad a pidi nos pa bini congreso tur dia cu nos mes cuminda. Mayoria ruman a sigui e instruccion aki i a ripará cu ora stop p’e pausa di merdia, nan por cai sinta huntu cu nan famia i come loke nan a trece p’e dia ei. Hopi ruman a bisa cu e chens di relahá durante e pausa di merdia i pasa mas tempu cu nan rumannan tabata masha dushi. Esaki ta rekerí pa nos cumpra artículonan di come i bebe di antemano i paketá nan den un tas of djug chikitu cu ta pas bou di stul. Nos ta pidi pa tur persona presente sigui e instruccion aki. Ultimamente, gerentenan di edificio i bendedónan di cuminda den e facilidadnan caminda ta tene nos congresonan a observá cu algun ruman ta sali bai cumpra cuminda cerca bendedónan riba caya i na establecimentunan di fast-food den becindario. Awor tin bendedó di cuminda den e facilidadnan di congreso cu nos ta usa, cu ta exigí pa permití nan habri nan stènd di cuminda i sirbi e delegadonan cu ta asistí na nos congreso. Pero, si permití esaki, nos lo haña nos den compania di hopi hende di mundu durante e dia. Ademas, atrobe nos lo tin congestion i filanan largu n’e stèndnan di bende cos, loke lo stroba e ambiente relahá di nos congresonan. P’esei, nos ta pidi pa tur hende haci esfuerso pa bini congreso tur dia cu nan mes co’i come i co’i bebe. Personanan interesá cu bin congreso huntu cu bo tambe mester bini cu nan mes cuminda. No ta permití ningun envase di glas ni bebida alcohólico den e facilidadnan di congreso.
11 Bo por ofrecé bo mes pa yuda limpia e facilidad despues dje sesionnan di cada dia? Of bo por traha den un dje otro departamentonan di congreso? Si bo por yuda, por fabor, meldu n’e Departamento di Servicio di Boluntario na e congreso. Muchanan bou di 16 aña tambe ta bon biní pa traha huntu cu un mayor of un otro adulto responsabel. Naturalmente, tur hende por yuda limpia e facilidad dor di soru piki tur cos abou i deshací di nan apropiadamente.
12 Nos a ricibí puntonan di guia excelente en cuanto kico ta bistí i areglo personal apropiado na nos congresonan. Por ehempel, nos tin instruccion riba e asuntu aki den suplementonan di Nos Ministerio di Reino, nos tin plachi i potretnan den nos literatura, i mas importante cu tur, nos tin loke Jehova ta bisa den Bijbel. (Rom. 12:2; 1 Tim. 2:9, 10) Hende sa ken nos ta i pakico nos ta reuní den nan stad. Pues, riba nan mes, nos bistí i areglo personal ta un testimonio poderoso. E mayoria dje pueblo di Jehova ta pone un bon ehempel riba e tereno aki. Sin embargo, de bes en cuando nos ta mira e spiritu di mundu ta reflehá den e bistí i areglo personal di algun ruman cu ta asistí na nos congresonan. Cualkier paña sunú ta pone na duda cu e ta un persona spiritual, manera e ta pretendé di ta. Un aparencia modesto, limpi i nèchi ta mas atractivo. P’esei, cabesnan di famia tin cu tuma nota di loke nan miembronan di famia tin planeá pa bisti. Esaki ta aplicá tambe ora nos no ta na e sitio di congreso. Si nos bisti nos badge promé i despues dje sesion dje dia, e ta identificá nos mas ainda cu Jehova i cu su pueblo limpi.—Compará cu Marco 8:38.
13 Dios a inspirá e rey sabí Sálomon pa bisa cu “bobedad ta mará na curason di mucha homber” i cu “un mucha homber lagá pa su cuenta lo causa bergwensa pa su mama.” (Pro. 22:15; 29:15) Como cu mayornan tin cu duna cuenta na Jehova pa e conducta di nan yunan, un mama of tata por tin sigur cu nan yunan ta comportando nan mes i ta scuchando e instruccion di Jehova, solamente si e muchanan ta sintá huntu cu nan. Ushernan lo acercá ken cu ta causa distraicion i pidi nan stop di haci esei, recordando nan bondadosamente pa paga tinu n’e programa.
14 Como cu tur hende ta bon biní na nos congresonan, ta sabí pa tuma precaucion relacioná cu muchanan i pertenencianan personal. Nos yunan ta un regalo precioso for di Jehova. Pero nos sa cu mundu ta reflehá e naturalesa cla pa devorá di Satanas. P’esei por fabor, soru pa bo sa na unda bo yunan ta na tur momento. Tambe, bo tin cu tene bo cámara, potmoni i otro artículonan di balor huntu cu bo na tur momento i no laga nan riba bo stul. Haci sigur cu bo auto ta na lok, i pone pertenencianan personal den baul of hiba nan huntu cu bo. Esaki ta reducí e chens cu un hende ta haña e tentacion pa kibra drenta den bo auto.
15 Ta animador pa mira rumannan haci nota durante sesionnan di congreso. Notanan breve lo yuda bo concentrá i ta pone bo corda puntonan principal. Si despues bo repasá bo notanan huntu cu famia of amigunan, esei ta permití bo meditá riba e puntonan sobresaliente dje congreso i asina bo no ta lubidá nan.
16 Semper e pueblo di Jehova tabata generoso den contribuí na fabor di interesnan teocrático. (Ex. 36:5-7; 2 Cró. 31:10; Rom. 15:26, 27) E rumannan ta usa bo contribucion boluntario pa e trabou mundial, i pa yuda paga e gastunan relacioná cu huurmentu di facilidadnan grandi caminda ta tene congreso. Si bo ta haci bo contribucion cu chek, por fabor, skirbié na nomber di “Watchtower.”
17 Manera ta registrá na Amos 3:7, Jehova a bisa cu lo e “no haci ni un solo cos a ménos cu el a revelá su asuntu confidencial na su sirbidónan e profetanan.” Como e “Revelador di secreto,” Jehova a laga registrá cientos di profecia den Bijbel cu a cumpli cu exactitud i den tur detaye. (Dan. 2:28, 47) Ainda tin promesanan magnífico cu falta pa cumpli. E Congresonan di Distrito 1999 “Dios Su Palabra Profético” lo fortalecé bo fe den e promesanan di Dios. Scucha atentamente na e palabra di Jehova pa bo. Aplicá loke bo mira i tende: aplik’é den e ministerio, den congregacion i den bo bida personal. Nos ta pidi Jehova su bendicion ricu riba tur bo areglonan pa asistí na cada dia dje bankete spiritual ricu aki!
[Blurb on page 3]
Planea pa asistí henter dia diabierne, diasabra i diadomingo!