Congreso di Districto 1996 “Mensaheronan di Pas Divino”
1 E programa di congreso di districto e aña aki siguramente lo yuda nos mantené nos pas divino, i lo e splica nos papel den yuda otronan haña e pas ei. Manera a ser anunciá den Nos Ministerio di Reino di januari 1996, e tema ta “Mensaheronan di Pas Divino.” Bo a traha bo plannan pa no perde nada dje programa?
2 Un Programa di Tres Dia: Nos sa cu lo bo disfrutá plenamente dje congreso di e aña aki i lo bolbe cas bek cu vigor renobá. (2 Cró. 7:10) E aña aki atrobe nos lo tin un programa di tres dia. Bo a haci areglo caba pa haña dia liber di bo trabou seglar di manera cu bo por asistí tur e dianan? Algun dje promé congresonan lo ser tené promé cu scol cera pa vacansi grandi. Si bo tin yu cu ta bai scol, bo a informá nan maestronan respetuosamente cu nan lo ta ausente riba diabierne pa e parti importante aki di nan entrenamentu religioso?
3 E Toren di Vigilancia di 15 di februari, 1996, tin un lista dje fecha i sitionan di tur e congresonan pa islanan ABC i Hulanda. Pa awor aki e secretario di boso congregacion a informá boso di esun na cua boso ta asigná. Ademas di papiamento, lo tin congresonan na hulandes i ingles.
4 E programa lo cuminsá tur tres dia 9:30 a.m. i lo concluí diadomingo rond di 4:00 p.m. Porta lo habri 8:00 a.m. E úniconan cu ta ser permití pa drenta promé cu esei ta esnan cu asignacionnan di trabou, i lo no permití pa esakinan reservá stul sino te ora e edificio habri pa tur hende. Nos lo demostrá bondad na nos rumannan di mas edad i esnan físicamente incapacitá dor di laga stulnan liber den áreanan cu ta mas cumbiniente i cómodo? Corda cu “amor . . . no ta busca su mes interes.”—1 Cor. 13:4, 5; Fil. 2:4.
5 Lo Bo Ser Hací Skerpi? Despues di cita Proverbionan 27:17, “Heru cu heru mes ta haci otro skerpi,” e Toren di Vigilancia di 15 di augustus, 1993, ta comentá: “Nos ta manera herment cu mester sleip regularmente. Ya cu nos expresion di amor pa Jehova i tumamentu di decision basá riba nos fe ta nificá ser diferente for dje mundu, constantemente nos tin cu tuma un curso di accion diferente for dje mayoria, na moda di papia.” Con nos por aplicá e conseho ei?
6 Nos ta i mester keda diferente for dje mundu. E esfuerso constante pa logra esaki tin cu ser mantené si nos kier ta celoso pa obranan excelente. (Tito 2:14) Ta p’esei e artículo di Toren di Vigilancia citá ariba a sigui bisa: “Ora nos ta cu otronan cu ta stima Jehova, nos ta haci otro skerpi—nos ta incitá un e otro na amor i obra excelente.” E congreso di districto ta un dje provisionnan for di Jehova pa yuda nos keda skerpi spiritualmente. Nos no por permití nos mes di perde ningun parti dje programa.
7 Un Persona Sabí Lo Scucha: Scuchamentu ta un arte cu tin cu ser desaroyá. Nan a yega di bisa cu un hende comun ta corda solamente alrededor di mitar di loke el a tende—sin importá con cuidadoso e ta kere cu el a scucha. Siendo cu nos ta biba den un era di distraicion, tin biaha nos por experenciá dificultad pa concentrá pa periodonan largu di tempu. Nos por purba aumentá nos lapso di atencion, specialmente ora nos ta sintá den un auditorio grandi scuchando un persona papia? Si un hende pidí bo duna un resúmen dje programa di cada dia despues cu bo bolbe cas bek for dje congreso, lo bo por haci esei? Con nos tur por mehorá nos abilidad di scucha i presta sumo atencion na cada parti presentá den e programa di congreso?
8 Interes intenso ta esencial, pasobra sin dje e don divino di memoria no por funcioná eficientemente. Por ehempel, mas interes un persona mustra den un tema, mas fácil ta p’e corda e puntonan principal di un discurso of un parti dje programa. Sin embargo, hopi ta dependé di si nos ta presta mas atencion cu acustumbrá na e cosnan cu nos ta privilegiá pa tende na congresonan di districto. Nos interes intenso i atencion na cada parti dje programa di congreso tin un efecto riba nos condicion spiritual actual i tambe riba nos perspectivanan pa futuro. Na congresonan nos ta ser siñá e camindanan di Jehova i ta ser duná instruccionnan pa efectuá un trabou salbador-di-bida. (1 Tim. 4:16) Imaginá cu bo tabata un barcu riba un laman sutá pa tormenta. E promesanan di Jehova ta e anker sólido di speransa. Si un persona no ta presta atencion na programanan cristian i ta permití su mente dual, tal bes e ta perde puntonan vital di conseho i instruccion cu lo por previnié di sufri naufragio spiritual.—Heb. 2:1; 6:19.
9 Den hopi parti dje mundu, nos rumannan ta haci gran esfuerso físico pa asistí n’e reunionnan. Ta maraviyoso pa mira nan atencion profundo na congresonan. Sin embargo, den algun lugá, personanan a distraí otronan dor di cana bai bini pornada riba tereno dje congreso durante e sesionnan. Otronan ta yega lat. Na algun congreso den pasado, tabata difícil pa tende e promé par di minuutnan dje programa debí cu asina tantu hende tabata cana keiru den e gangnan i parti patras dje área di asiento. Esakinan generalmente no ta rumannan trahando den nan asignacion of mamanan atendiendo n’e necesidadnan di nan yunan chikitu. Mayor parti dje strobansa ta ser causá dor di hende cu ta djis combersá. E aña aki e Departamento di Usher lo duna mas atencion n’e problema, i ta di spera cu tur presente lo bai sinta ora e presidente invitá nos pa haci esei. Bo cooperacion den e asuntu aki lo ser apreciá mashá.
10 Ki sugerencianan práctico lo yuda nos presta mas atencion n’e programa di congreso i corda mas di loke ta ser presentá? Loke a ser bisá den añanan pasá ta bal pa ser ripití: (a) Enfocá riba e motibu principal pa bai n’e stad di congreso. Esei ta, no pa participá den recreo, sino pa scucha i siña. (Deu. 31:12) Purba na haña suficiente sosiegu tur anochi. Si bo yega n’e congreso hopi cansá, lo ta difícil pa concentrá. (b) Duna bo mes hopi tempu pa parkeer bo auto i haña asiento promé cu e programa cuminsá. Pura pa bai sinta na último minuut generalmente lo resultá cu bo ta perde algu dje parti di apertura. (c) Haci anotacionnan breve di puntonan clave. Haciendo demasiado anotacion por ta un strobansa pa scucha bon. Ora di skirbi, haci sigur cu bo no ta perde otro puntonan debí cu bo ta concentrando riba bo notanan. (d) Ora un parti di congreso ta ser introducí, tene un actitud di anticipacion ansioso. Puntra bo mes, ‘Kico mi por siña for dje parti aki cu lo aumentá mi aprecio i amor pa Jehova? Con e informacion por yudá mi manifestá e personalidad nobo mas plenamente? Con esaki lo yudá mi mehorá den mi ministerio?’
11 Conducta cu Ta Dorna Nos Ministerio: Pablo a animá Tito pa demostrá su mes “un ehempel di obra excelente.” Dor di demostrá incorupcion den su siñansa, Tito lo a yuda otronan “dorna e siñansa di nos Salbador, Dios, den tur cos.” (Tito 2:7, 10) Tur aña, nos ta ricibí recordatorionan bondadoso tocante pakico conducta piadoso ta asina importante segun cu nos ta biaha pa i for di e congreso, i tambe ora nos ta na hotel i restaurant i na e congreso mes. Aña pasá atrobe nos a tende algun comentario alentador cu nos lo kier compartí cu boso.
12 E manager di un hotel a declará: “Semper ta un placer pa hospedá e Testigonan debí cu nan ta paciente, cooperativo, i nan ta tene bon bista riba nan yunan.” Un recepcionista di hotel a bisa cu su trabou ta bira “hopi mas fácil ora e Testigonan ta check-in i check-out dje hotel pasobra, apesar cu nan tin cu warda den rij, nan semper ta cortes, paciente i comprensivo.” Un señora na New England, Merca, tabata asina impresioná cu e conducta dje hóbennan Testigo kedando den e mésun motel cu el a pidi algun literatura tocante nos organisacion.
13 Na otro un banda, tin lugá pa mehorá den cierto área. Nos lo kier compartí algun observacion cu a ser mandá p’e Sociedad. Un superintendente biahero a informá cu e yunan di Testigonan di Jehova tin mester di mas supervision. Nos tin cu entrená nos yunan pa comprendé cu conducta cristian no ta mará solamente na cierto periodo di tempu. E no ta terminá ora nos sali for dje lugá di congreso. E mester dura 24 ora pa dia. Nos conducta na hotel, den restaurant i riba caya mester ta mes onorabel cu ora nos ta sintá durante e sesionnan huntu cu nos rumannan, siendo siñá pa Jehova.—Isa. 54:13; 1 Ped. 2:12.
14 Tambe nos lo kier compartí un recordatorio bondadoso tocante dunamentu di tips. Waiter, waitress, camarera i belboynan, i otronan den ocupacionnan similar ta dependé di tips pa gana nan pan di cada dia.—Mira ¡Despertad! di 22 di juni, 1986, página 24-7.
15 Aunke a stop di sirbi cuminda na nos congresonan, ainda tin bastante gastu enbolbí den huur e lugá, percurá pa lugá di parkeer i pa vários asuntunan. Nos donacionnan boluntario ta cubri e gastunan aki. Un ruman muher cu yunan tiener a bini n’e congreso cu fondonan limitá. Sin embargo, e ruman i e yunan tog a yuda cu un contribucion chikitu. Loke cada un ta dicidí pa haci relacioná cu esaki ta un asuntu personal, pero nos sa cu boso ta apreciá recordatorionan asina.—Echo. 20:35; 2 Cor. 9:7.
16 Reconocé p’e Manera cu Nos Ta Bisti: E manera cu nos ta bisti ta revelá hopi tocante nos i tocante nos sintimentunan pa cu otronan. Mayoria tiener i hopi adulto ta rondoná pa estilonan di paña con-cu-ta i cu ta cambia lihé sea na scol of na nan lugá di empleo. Cada aña estilonan di paña ta bira mas extremo, asta escandaloso. Si nos no tene cuidou, fácilmente nos lo por ser influenciá dor di compañeronan mundano pa bisti mescos cu nan. Hopi estilo ta inapropiado pa bisti pa reunionnan di adoracion. Un nota ricibí despues di un dje congresonan di aña pasá a expresá aprecio p’e programa pero a agregá: “Mi a puntra mi mes sí, pakico tabatin asina tantu hobencita cu shimis asina corticu, blusa hopi escotá i splitnan haltu.” Siguramente nos tur ta deseá di bisti den un manera cu ta pas pa ministernan cristian tantu n’e congreso como ora nos ta socialisá despues dje programa. Na tur ocasion ta bon pa nos refleccioná riba e conseho di apostel Pablo pa cristiannan sea dorná cu “bistí bon areglá, cu modestia i sano huicio.”—1 Tim. 2:9.
17 Ken mester determiná kico ta bistí modesto i “bon areglá”? Ser modesto ta nificá ser “ni descará ni arogante.” Tambe e diccionario ta definí modesto como “sin pretencion.” Ni e Sociedad ni e ancianonan mester establecé reglanan tocante bistí i peñá. No obstante, no mester ta claro pa un cristian ki estilo di paña definitivamente no ta modesto of decente? (Compará cu Filipensenan 1:10.) Nos peñá i paña no mester atraé indebido atencion. Nos mester ta agradabel den aparencia, no mundano of ofensivo. Como ministernan dje bon nobo, siendo apropiadamente bistí i peñá durante e tempu cu nos ta den e stad di congreso di districto ta trece onor na Jehova i ta reflehá bon riba e organisacion. Pues, mayornan lo pone e ehempel anto haci sigur cu nan yunan ta apropiadamente bistí p’e ocasion. Ancianonan lo kier pone un bon ehempel i ser cla pa ofrecé conseho bondadoso si ta necesario.
18 Cámara, Videocámara i Casetrecorder: Ta permisibel pa usa cámara i otro ekipo di graba, basta cu nos ta mustra consideracion pa otro hende presente. Si durante sesionnan nos ta move bai bini sacando potret, no solamente nos lo distraí otronan cu ta purbando na scucha, pero nos mes tambe lo perde parti dje programa. Generalmente nos ta beneficiá mas for dje congreso dor di presta sumo atencion n’e oradornan i dor di haci anotacionnan moderá. Tal bes nos ta grabando pa un ruman cu ta mará na cas; sin embargo, pa nos mes uso, nos por ripará ora regresá cas cu despues di a graba hopi ora dje programa, lo no tin tempu pa nos repasá mayor parti di loke nos a graba. No ta permití pa conectá ningun sorto di aparato di graba n’e sistema di coriente of di zonido, tampoco e ekipo no mag blokea e gangnan, caminda di cana of e bista di otronan.
19 Asiento: Nos ta sigui ripará un mehoramentu den e asuntu di reservá asiento. Aña pasá, mayoria di boso a sigui e instruccion: POR RESERVA STUL SOLAMENTE PA BO MIEMBRONAN DIRECTO DI FAMIA I CUALKIER PERSONA CU POR TA BIAHANDO CU BO DEN BO AUTO. Probablemente boso a haña cu esei a producí ménos tension debí cu hopi ruman a sigui e instruccion cla aki. Asta mas importante, cumpliendo cuné boso a agradá Jehova i e ‘esclabo fiel,’ kende ta duna e alimento spiritual.—Mat. 24:45.
20 Tin un cantidad creciente di nos rumannan cu tin necesidadnan special di salú. Algun di nan ta bini n’e congreso den rolstoel i tin cu ser cuidá dor di miembronan di famia. Otronan ta riba vários remedi pa malesanan crónico manera problemanan di curason of atakenan. Berdaderamente ta alentador pa nos mira e rumannan stimá aki na congreso, dicididu pa no perde nada dje alimento spiritual. Sin embargo, tin biaha, tabatin e problema cu algun persona ta bira malu durante e congreso, sin cu tin un famia of miembro di congregacion presente pa duna yudansa. Den cierto caso e administracion di congreso mester a yama ambulans pa transportá un ruman pa hospital. E responsabilidad pa cuida esnan crónicamente enfermo mester cai principalmente riba miembronan di famia i parientenan cercano. E Departamento di EHBO di congreso no ta den un posicion pa percurá cuido pa esnan crónicamente enfermo. Si un miembro di bo famia tin mester di cuido special, por fabor haci sigur cu e no ta ser lagá su so, por si acaso un emergencia presentá. Ademas, lo no tin areglo n’e congresonan pa kambernan special pa acomodá esnan cu alergia cu ta pone cu nan no por sinta den e área general di asiento. Ancianonan lo mester ta alerto pa cualkier ruman den nan congregacion cu tin necesidadnan special di salú i haci sigur cu areglonan ta ser hací di antemano pa nan cuido.
21 Necesidadnan pa Cuminda na Congreso: Nos a haña hopi comentario positivo relacioná cu e beneficionan di trece nos mes cuminda. Un ruman homber a skirbi: “Mi por mira claramente un inmenso beneficio spiritual for di esaki. Tur e tempu i energia ei por ser dirigí awor na asuntunan spiritual. Mi no a tende ni un solo comentario negativo.” Un ruman muher a skirbi: “Mediante ehempel, boso, rumannan stimá, ta animá nos como cristiannan individual pa examiná nos mes i busca maneranan pa simplificá nos bida i aumentá nos actividad teocrático.” Un superintendente biahero a skirbi tocante e percuracion anterior di sirbi cuminda: “E areglo bieu a pone un cantidad considerabel di ruman perde henter e programa di asamblea.” Relacioná cu e cuminda cu e rumannan a trece, un anciano a skirbi: “Nan tabatin precis loke nan tabata kier, i nan no tabatin cu para den rij p’e.” Finalmente, un otro ruman muher a skirbi, “Despues dje sesionnan tabata trankil i ketu i tabatin un ambiente animá.” Sí, cada persona por a trece suficiente cuminda pa sostené su mes durante e periodo di atardi. Hopi ruman a comentá riba e echo cu nan tabatin mas tempu pa combersá cu otro rumannan.
22 E aña aki atrobe lo no sirbi cuminda. Lo bo por tuma un par di minuut pa repasá e suplemento di Nos Ministerio di Reino di mei 1995, §22, pa sugerencianan en cuanto artículonan di cuminda práctico i nutritivo cu por bini congreso cuné. Por fabor corda, no mag di trece ningun envase di glas of bebidanan alcohólico n’e lugá di congreso. Si ta necesario pa trece djuknan chikitu, nan mester pas bou di bo asiento. Corda cu tin suficiente tempu durante e pausa di merdia pa come i bebe loke bo trece. Mescos cu ta e caso na Salon di Reino durante reunionnan, asina tambe nos semper ta abstené di come durante sesionnan dje congreso. Asina nos ta demostrá respet pa e areglo di adoracion i p’e alimento spiritual cu ta ser percurá.
23 Pronto e promé Congreso di Districto “Mensaheronan di Pas Divino” lo cuminsá. Bo a completá bo preparacionnan pa asistí, i bo ta cla awor pa disfrutá di tres dia di compañerismo felis i bon cosnan spiritual? Ta nos oracion sincero cu Jehova lo bendicioná bo esfuerso pa asistí n’e congreso dje aña aki.
[Box on page 6]
Recordatorionan pa Congreso di Districto
Bautismo: Candidatonan pa bautismo mester ta sintá den e seccion asigná promé cu e programa cuminsá riba diasabra mainta. A ser observá cu algun ta bisti trahe di baño cu no ta dignificá i ta rebahá e ocasion. Cada persona cu ta planea pa bautisá mester bini cu un trahe di baño modesto i un serbete. Ancianonan di congregacion cu ta repasá e preguntanan for dje buki Nos Ministerio cu candidatonan pa bautismo, mester haci sigur cu cada candidato ta comprendé e puntonan aki. Despues dje discurso di bautismo i oracion na encargo dje orador, e presidente dje sesion lo duna instruccionnan breve n’e candidatonan i despues lo anunciá e cantica. Despues dje último cuplet, e ushernan lo dirigí e candidatonan n’e sitio di bautismo of n’e autonan cu lo hiba nan aya. Siendo cu bautismo como símbolo di un persona su dedicacion ta un asuntu íntimo i personal entre e individuo i Jehova, no ta haci percuracion pa asina yamá partner di bautismo den cua dos of mas candidato pa bautismo ta brasa of tene man di otro segun nan ta ser bautisá.
Badgenan: Por fabor bisti e badge di 1996 n’e congreso i ora bo ta biaha pa of for dje sitio di congreso. Esaki hopi bes ta haci posibel pa nos duna un excelente testimonio segun nos ta biahando. Mester obtené e badge i e plestik pa carg’é via bo congregacion, ya cu nan lo no ta disponibel n’e congreso. No warda te cu un par di dia promé cu congreso pa pidi p’e badgenan pa bo i bo famia. Corda carga bo karchi actual di Instruccion/Exoneracion Médico Delantá.
Garoshi di Baby i Bo Mes Stul: Den mayoria localidad, no por usa garoshi di baby den lugánan di reunimentu público. Reglamentunan di candela ta prohibí pa pone nan den gangnan of entre rijnan di stul. Siendo cu multitudnan grandi por causa pertamentu, garoshinan di baby ta potencialmente peligroso no solamente pa e baby sino tambe pa cualkier persona cu por trompecá riba nan. Pues por fabor no bini cu nan na e sitio di congreso. Sin embargo, stulnan di mucha portátil of pa den auto ta ser permití, siendo cu esakinan por ser poné riba stul banda dje mayornan. Tambe, por fabor no bini cu bo mes stul. Nan ta peligroso i no ta ser permití den facilidadnan público grandi. Bo cooperacion den e asuntunan aki ta ser apreciá.
Servicio di Boluntario: Siendo cu no ta sirbi cuminda mas, hopi ruman cu anteriormente a traha den e departamento ei, por nota cu awor nan por ofrecé nan mes pa traha como boluntario otro caminda. Bo por apartá poco tempu n’e congreso pa yuda den un dje departamentonan? Sirbiendo nos rumannan, aunke ta solamente pa un par di ora, por ta masha útil i ta duna hopi satisfaccion. Si bo por yuda, por fabor pasa na e Departamento di Servicio di Boluntario na e congreso. Muchanan bou di 16 aña di edad tambe por haci un excelente contribucion dor di traha bou di guia di un mayor of un otro adulto responsabel.
Palabranan di Cautela: Keda alerto pa posibel problemanan pa asina evitá dificultad innecesario. Hopi bes ladron i otro individuonan sin escrúpulo lo atacá hende cu no ta den nan mes ambiente. Haci sigur cu bo vehículo ta di lock tur momento, i nunca laga nada na bista pa tenta un persona pa kibra drenta. Ladronnan i ‘zakkenrollers’ ta enfocá nan atencion riba reunionnan grandi. Lo no ta sabí pa laga nada di balor riba bo stul. Bo no por ta sigur cu tur hende rond di bo ta un cristian. Pakico hinca nan den tentacion? Tabatin informe di personanan djafó cu a purba di lok muchanan chikitu for di e área di congreso. TENE BISTA RIBA BO YUNAN NA TUR MOMENTO.
Television i video cu ta disponibel den hopi hotel hopi bes ta presentá programanan indecente i pornográfico. Sea alerto pa e trampa aki i no permití muchanan haña acceso no-supervisá na e television den e kamber.
Por fabor no bel ni skirbi e gerencia dje lugá di congreso, buscando informacion tocante asuntunan di congreso. Si e informacion no ta disponibel cerca e ancianonan, bo por skirbi na e adres di un congreso specífico.
Fechanan di Congreso di Districto 1996
Aruba: 5-7 di juli, 1996 (papiamento)
Curaçao: 12-14 di juli, 1996 (ingles)
*Curaçao: 19-21 di juli, 1996 (papiamento seccion nort)
*Curaçao: 26-28 di juli, 1996 (papiamento seccion zuid)
Curaçao: 2-4 di augustus, 1996 (hulandes)
Hulanda: 9-11 di augustus, 1996 (papiamento)
* Esakinan lo ser tené awor na Golden Entertainment Center, Kaya W. F. G. Mensing 49, Zeelandia.