Congresonan Internacional i di Distrito pa 1998 “Dios Su Caminda di Bida”
1 Proverbionan 10:29 ta recordá nos cu “e caminda di Jehova ta un forti.” Ki un tema apropiado e congreso dje aña aki tin: “Dios Su Caminda di Bida”! Con lo desaroyá e tema aki durante e programa di tres dia? Nos tur ta spera ansiosamente loke tin prepará pa nos. I lo presentá puntonan importante.
2 Tal bes tin misionero, sirbidó internacional of otronan den asignacionnan den estranheria cu lo asistí na bo congreso. Nos ta verwagt miles di delegado for di otro pais n’e stadnan caminda ta tene congresonan internacional. Kisas lo bo topa algun dje bishitantenan aki. E programa di congreso lo tin informenan en cuanto con Jehova ta bendicioná e trabou den vários teritorio.
3 Ta Bale la Pena pa Asistí: Hopi di nos rumannan na Africa ta pasa trabou debí na guera i disturbio cu ta tuma lugá den algun parti dje continente ei. Nan ta considerá e congresonan di Jehova su pueblo como nan salbabida. Algun tin cu cana distancianan largu pa asistí na un congreso, i tog nan no ta pensa mes di perde ni un. N’e República Democrático di Congo (ántes Zaire), un ruman homber di 73 aña a cana un 450 kilometer pa asistí na un congreso. El a yega 16 dia despues di a sali cas, pianan tur hinchá, pero felis di ta ei. Despues dje congreso, super contentu i spiritualmente fortalecí, el a bai cas bek na pia. Esaki ta su rutina pa años!
4 Na Mozambique un superintendente di distrito i su casá a subi un ceru haltu i a crusa un área desértico grandi na pia pa asistí na un asamblea di circuito. Nan a haci e biahe di 90 kilometer den 45 ora. Tur ruman presente a sinti nan mashá animá dor dje excelente ehempel dje pareha aki. Hopi famia presente tambe a haci esfuersonan asina pa asistí. E superintendente di distrito ta informá cu algun ruman, incluso un di 60 aña, a biaha 200 kilometer na pia!
5 Abo a traha plannan definitivo pa asistí n’e congreso dje aña aki? No ta probabel cu lo bo tin cu cana distancianan largu, pero tog lo mester haci algun esfuerso i sacrificio pa abo cu bo famia por ta presente. Haci areglo pa asistí na henter e programa for di cuminsamentu te na su fin. Hopi studiante di Bijbel ta progresando den direccion di dedicacion. Nan asistencia na e congreso lo yuda nan tuma e decision corecto. Bo a invitá bo studiantenan di Bijbel i otro personanan interesá pa asistí huntu cu bo?
6 Un Programa di Tres Dia: Den E Toren di Vigilancia di 15 di februari, 1998, tin e lista di fecha i sitionan di congreso. Pa awor bo a ser informá dje congreso na cua bo congregacion ta asigná. Nos tin cu mencioná sí cu e adres p’e congreso na Aruba i pa esnan na Curaçao a cambia. Na Aruba lo e ser tené na Hotel Americana. Na Curaçao e congreso na ingles lo ser tené na Holiday Beach Hotel (tentativo); na papiamento na World Trade Center na Piscadera; i na hulandes na Holiday Beach Hotel. E fechanan a keda mescos.
7 Un Nota Special: Ta masha importante pa bo asistí n’e congreso na cua bo congregacion ta asigná. Por fabor, no planea pa asistí na un dje congresonan internacional a ménos cu bo congregacion ta asigná ei. Facilidadnan di congreso caminda ta bai tene e congresonan internacional lo no por acomodá ni sikiera un parti di tur esnan cu lo tin gana di asistí ei. Si nos cada un respetá i cooperá cu e areglonan aki, tur cos sigur lo tuma lugá decentemente i segun areglo.—1 Cor. 14:33, 40.
8 Diabierne, diasabra i diadomingo mainta, e programa lo cuminsá 9:30 a.m. Diabierne cu diasabra, e programa lo terminá 5:00 p.m., i diadomingo, 4:00 p.m. Lo habri porta tur dia 8:00 a.m. Solamente esnan cu asignacion di trabou ta permití pa drenta mas trempan cu esei. Sin embargo, lo no permití ningun hende reservá stul, sino te despues di 8:00 a.m.
9 Riba caminda pa i biniendo for dje congreso, nos mester busca oportunidadnan pa duna testimonio informal. Kisas tin trahadónan na pomp di gasolin, bendedónan den pacus, cobradónan di tol, personal di hotel i waiternan cu ta interesá den e mensahe di Reino. Prepará pa esaki dor di tin tratado, revistanan actual of otro literatura huntu cu bo pa asina bo por probechá di oportunidadnan pa duna testimonio na hende cu tal bes di otro manera no ta ser alcansá cu e bon nobo.—2 Tim. 3:17.
10 “Presta Atencion na Con Boso Ta Scucha”: Delegadonan di congreso ta haci bon di obedecé e conseho hañá na Lucas 8:18. Ta animá tur hende pa bini cu nan Bijbel i tambe buki di cantica i un buki pa haci anotacion. Scucha cuidadosamente pa puntonan clave di cada presentacion, i haci anotacionnan breve. Puntra bo mes con abo personalmente por aplicá e informacion. Tur anochi dje congreso, promé cu bo bai drumi, pakico no repasá bo notanan i analisá con estrechamente bo ta biba n’e manera di Jehova.—Pro. 4:10-13.
11 Nos a nota cu durante e sesionnan, algun ruman ta bandoná e sala i ta bai sinta den nan auto, perdiendo asina e presentacion dje programa. A ripará otronan ta cana rond pornada den gang ora cu nan lo mester ta sintá den e sala ta scucha. A mira gruponan di hóben ta sali bai for dje sitio di congreso meimei di atardi. Algun sirbidó di Jehova den pasado a cometé erornan serio den nan bida debí cu nan no a scucha cu atencion n’e recordatorionan di Jehova. Nos sigur lo kier evitá di haci e mésun fout. (2 Rey. 17:13-15) “E esclabo fiel i discreto” a prepará informacion cu nos tur tin mester. Ta foral masha importante pa nos “presta mas cu e atencion acustumbrá n’e cosnan cu nos a tende” durante cada sesion dje programa di congreso di tres dia. Cada dia tin algu di interes special pa nos, incluso informacion cu sigur lo tin un efecto saludabel riba e manera cu nos lo bai hiba nos bida. Dor di presta atencion i haci pleno uso di loke Jehova ta percurá pa nos spiritualmente n’e binidero seri di congreso, nos speransa lo ta firmemente ancrá, pa asina “nos nunca drif bai” for dje caminda di Dios.—Mat. 24:45; Heb. 2:1.
12 Paña cu Ta Onra Jehova: Den e tempunan crítico aki, nos tin cu presta mas cu e atencion acustumbrá, pa nos no ser influenciá dor dje spiritu dje mundu aki. (1 Cor. 2:12) Nos forma di bisti i di areglo personal mester ta modesto i mester reflehá e dignidad dje Dios cu nos ta adorá. (1 Tim. 2:9, 10) Nos no tin mester di paña caru pa ta entre esnan cu ta “dorna e siñansa di nos Salbador, Dios.” (Tito 2:10) Tuma nota dje excelente conseho práctico i bíblico na página 17 i 18 di E Toren di Vigilancia di 15 di juni, 1997, §14-18. Nunca balotá e testimonio poderoso cu nos por duna dor di bisti den un manera cu ta onra Jehova.
13 Un Testigo di 16 aña di edad a conta cu ora e i su ruman homber a drenta un restaurant un anochi despues dje sesionnan, nan a ripará cu algun dje rumannan cu tabat’ei den e restaurant a cambia nan paña di reunion pa paña casual inapropiado. Sin embargo, hopi cliente dje restaurant a reaccioná faborablemente ora nan a mira Testigonan cu tabata nechi i apropiadamente bistí i cu tabatin nan badge di congreso. Esaki a habri caminda pa duna testimonio na algun dje clientenan.
14 Conducta cu Ta Alabá Jehova: Nos sa cu nos conducta cristian por afectá e manera cu otronan ta mira adoracion berdadero. P’esei, nos kier comportá nos mes na tur ocasion den un manera cu ta digno dje bon nobo i cu ta trece alabansa na Jehova.—Fil. 1:27.
15 Aña pasá, pa promé bes a tene un congreso di distrito den parti nort di Angola. Riba e di dos dia dje congreso, nan a manda dos polis local n’e sitio pa sigurá órden público. Nan a keda henter dia. Na fin dje dia, nan a expresá nan admiracion pa loke nan a tende i pa e conducta ordená cu nan a observá. Un di nan a comentá: “Ta pakico nan a manda nos aki? Nos sa cu Testigonan di Jehova ta tene ordu na nan reunionnan.”
16 Un miembro di un partido político di un pais africano a hui bai Europa ora nan a asesiná tur e otro miembronan di su partido. El a pasa den hopi problema personal i a bira masha desanimá. Cu tempu el a aceptá un studio di Bijbel. Na su promé congreso di distrito, el a keda impresioná cu e echo cu hende for di diferente antecedente tabata reuní huntu den pas i armonia. El a keda convencí cu el a haña e berdad, i durante e congreso ei el a dicidí di kibra tur su coneccion cu política. Despues el a bautisá, i awor e i su yunan ta sirbiendo Jehova.
17 Con nos conducta na e congresonan dje aña aki lo afectá esnan cu kisas ta asistí pa promé bes? Nan lo ripará e spiritu di cooperacion cu ta bisto ora nos ta traha huntu como boluntario? Nan lo keda impresioná di mira con limpi nos ambiente ta i con, promé cu nos bandoná e sitio di congreso, nos cu nos yunan ta piki sushi cu por a acumulá rond di nos asiento? Nan lo observá nos conducta excelente segun cu nos ta biaha bai i bini di nos lugá di hospedahe i dje sitio di congreso? Nan lo ripará cu como mayor, nos tin nos yunan bon supervisá na tur momento? Laga nos haci sigur cu nos ta duna e mihó impresion posibel na tur cu ta observá nos.
18 Cubriendo Gastunan di Congreso: Prijs di entrada pa un evento deportivo of cualkier otro presentacion den un stadion of sala di congreso por ta caru den e mundu seglar djawe. Esaki en parti ta debí cu huur ta haltu den áreanan di stad. Sociedad su regla na congresonan semper tabata i ta: “Entrada grátis, no ta pasa colect.” Con anto por paga e huur i otro gastunan di congreso? Dor dje contribucionnan generoso di esnan presente. Nos tin sigur cu boso lo mustra un spiritu di generosidad mescos cu sirbidónan di Dios den pasado a manifestá, imitando Jehova Dios i Jesucristo. (2 Cor. 8:7) E rumannan ta soru bon pa haci sigur cu tur contribucion ta protehá for di ladronicia i ta ser registrá, i usá pa e propósito pa cua a duna nan. Cualkier contribucion hací cu chek mester ta na nomber di “Watchtower.”
19 Asiento: E instruccionnan cu a ser duná pa basta aña caba lo sigui aplicá, esta: POR RESERVA STUL SOLAMENTE PA BO MIEMBRONAN DIRECTO DI FAMIA I CUALKIER PERSONA CU POR TA BIAHANDO CU BO DEN BO AUTO. Tabata bon pa mira cu mas ruman ta cumpliendo cu e instruccionnan aki, i esaki a yena e ambiente desplegá n’e congresonan cu mas amor. Na mayoria sitio, algun stul ta mas fácilmente accesibel cu otronan. Por fabor, mustra consideracion, i laga e stulnan mas cumbiniente pa hende di edad i pa otronan kende nan circunstancianan ta rekerí esei. Corda cu ‘amor no ta busca su mes interes.’—1 Cor. 13:4, 5; Fil. 2:4.
20 Cámara, Videocámara i Casetrecorder: Por usa cámara i ekipo di graba na congreso. Sin embargo, ora di usa nan bo no mag distraí otronan presente. Cana rond durante e sesionnan sacando potret lo molestiá otronan cu ta purba di concentrá riba e programa. No ta permití pa conectá ningun sorto di aparato di graba n’e sistema di coriente of di zonido, i e ekipo aki no mag blokea e pasiyonan, caminda di cana ni e bista di otronan tampoco.
21 EHBO: E Departamento di EHBO ta solamente pa casonan di emergencia. Por fabor, bin cu bo mes aspirin, remedi pa digestion, pleister, prèkè, i cosnan asina, ya cu nan lo no ta disponibel n’e congreso. Cualkier persona cu sa cu e tin chens di haña steipi, shok di insulina, problema cu curason, etcétera, mester bini cu su remedinan necesario. Un miembro di famia of di congregacion cu ta comprendé su situacion i cu por haci algu den caso di emergencia mester compañ’é. Problemanan a presentá na congresonan ora a laga personanan cu problemanan crónico di salú nan so i nan a bira malu. Si algun ruman cu tin mester di cuido médico special no tin famia cu por yuda nan, nan tin cu informá nan ancianonan dje situacion, kendenan mester haci e areglonan necesario pa yuda. No ta posibel pa tin kambernan special n’e congresonan pa acomodá esnan cu alergia of cu malesa debí n’e medio ambiente.
22 Cuminda n’e Congreso: Cada persona presente mester bin cu su mes cuminda en bes di bandoná e lugá di congreso durante e pausa corticu di merdia pa bai cumpra algu pafó. Probablemente un cos di come nutritivo cu ta liviano i ta fácil pa carga lo ta suficiente. E suplemento di Nos Ministerio di Reino di mei 1995, §22, ta duna algun idea di kico por bin cuné. No mag trece ningun envase di glas ni bebida alcohólico na e lugá di congreso. Djuk of tas mester ta di un tamaño cu ta pas bou di bo stul. A ripará cu algun den auditorio ta come i bebe durante e programa. Esaki ta un falta di respet p’e ocasion.
23 Ki contentu nos ta cu e Congreso pa 1998 “Dios Su Caminda di Bida” lo cuminsá pronto! Bo a completá bo plannan pa asistí? Nos ta deseá bo un bon biahe i cu lo bo por bolbe cas bek refrescá, dicididu pa sigui padilanti den Jehova su sirbishi precioso i pa sigui riba Dios su caminda di bida pa bo bendicion eterno.
[Box on page 6]
Recordatorionan pa Congreso
▪ Bautismo: Candidatonan pa bautismo mester ta sintá den e seccion asigná promé cu e programa cuminsá riba diasabra mainta. Cada persona cu ta planea pa bautisá mester bini cu un trahe di baño modesto i un serbete. Den pasado algun a bisti trahe di baño cu no tabata apropiado i cu a rebahá e ocasion. Ancianonan cu ta repasá e preguntanan for dje buki Nos Ministerio cu candidatonan pa bautismo, mester haci sigur cu cada candidato ta comprendé e puntonan aki. Bautismo como símbolo di un persona su dedicacion ta un asuntu íntimo i personal entre e individuo i Jehova. Pues, ta inapropiado pa candidatonan brasa otro of tene man di otro segun cu nan ta ser bautisá.
▪ Karchinan pa Badge: Por fabor, bisti e badge di 1998 henter ora n’e congreso i ora bo ta biaha bai of bini dje sitio di congreso. Hopi bes esaki ta crea oportunidadnan pa nos duna un excelente testimonio. Mester obtené e karchi pa badge i e plestik via bo congregacion, ya cu nan lo no ta disponibel n’e congreso. No warda te cu un par di dia promé cu congreso pa pidi p’e karchinan pa badge pa bo i bo famia. Corda cana cu bo karchi actualisá di Instruccion/Exoneracion Médico Delantá.
▪ Garoshi di Baby i Bo Mes Stul: Na mayoria parti, no por usa garoshi di baby den lugánan di reunion público. Reglamentunan pa candela ta prohibí pa pone nan den pasiyo of entre rijnan di stul. Siendo cu multitudnan grandi por causa pertamentu, garoshinan di baby ta potencialmente peligroso, no solamente pa e baby, sino tambe pa cualkier persona cu lo por trompecá riba nan. Pues, por fabor, no bini cu garoshi di baby na e sitio di congreso. Ta permití stulnan di mucha portátil of pa den auto, mará riba stul banda dje mayornan. Por fabor, no bini cu bo mes stul. No ta permití esei den facilidadnan público grandi. Bo cooperacion ta importante i ta ser apreciá.
▪ Servicio di Boluntario: Bo por apartá poco tempu n’e congreso pa yuda den un dje departamentonan? Sirbi bo rumannan, maske ta solamente pa un par di ora, por ta masha útil i ta duna hopi satisfaccion personal. Si bo por yuda, por fabor, meldu na e Departamento di Servicio di Boluntario na e congreso. Muchanan bou di 16 aña tambe por haci un excelente contribucion dor di traha bou di guia di un mayor of un otro adulto responsabel.
▪ Palabranan di Cautela: Haci sigur cu bo vehículo ta di lock tur momento, i nunca laga nada na bista pa tenta un persona pa kibra drenta. Ladronnan i ‘zakkenrollers’ ta enfocá nan atencion riba reunionnan grandi. No ta sabí pa laga nada di balor riba bo stul. Bo no por ta sigur cu tur hende rond di bo ta un cristian. Pakico hinca hende den tentacion? Tabatin informe di personanan djafó cu a purba lok muchanan chikitu for di e área di congreso. TENE BISTA RIBA BO YUNAN NA TUR MOMENTO.
Hopi bes servicionan di television i video cu tin disponibel den hopi hotel ta presentá programanan pornográfico. No permití muchanan haña acceso no-supervisá na e television den e kamber. Kisas mayornan ta deseá di prevení nan yunan di wak cierto canalnan di television, manera “pay TV” den nan kamber di hotel dor di pidi e hotel pa desactivá e canalnan ei durante nan estadia.
Por fabor, no bel ni skirbi gerencia dje sala di congreso, en busca di informacion tocante asuntunan di congreso. Si e ancianonan no tin e informacion cu bo mester, nan lo por puntra Sociedad por escrito.