Congreso di Distrito pa 1997 “Fe den e Palabra di Dios”
1 Apostel Pablo a recordá Timoteo cu “tur Scritura ta inspirá di Dios.” (2 Tim. 3:16) Siendo cu e Palabra di Dios ta inspirá, nos tin tur motibu pa ehercé fe den dje. E tema dje congreso di distrito dje aña aki ta “Fe den e Palabra di Dios.” E programa lo fortalecé nos fe den Bijbel, sea cu nos conocé e berdad pa hopi aña of djis recientemente a bini den contacto cu e organisacion di Jehova. Nos tur mester haci areglo pa ta presente pa henter e programa. Ki edificante lo ta si personanan recien interesá, specialmente esnan cu ken nos ta studia Bijbel, asistí cu nos!
2 Congreso di Tres Dia: E aña aki a haci areglo pa un programa di congreso di distrito di tres dia pa nos beneficio. E Toren di Vigilancia di 15 di februari, 1997, tin un lista dje fecha i sitionan di tur e congresonan pa islanan ABC i Merca. Pa awor aki bo a ser informá na cua congreso bo congregacion ta asigná, i bo mester a haci plannan definitivo caba pa asistí tur e tres dianan dje programa. Bo a acercá bo doño di trabou pa haña e dianan liber cu bo mester? Si bo tin yunan cu ta bai scol, i boso congreso ta cai promé cu scol cera, bo a informá nan maestronan bondadosamente cu bo yunan lo ta ausente riba diabierne pa e parti importante aki di nan entrenamentu religioso?—Deu. 31:12.
3 Ademas di papiamento, lo tin congresonan na hulandes i ingles.
4 E programa lo cuminsá tur tres dia 9:30 a.m. Porta lo habri 8:30 a.m. E úniconan cu ta ser permití pa drenta promé cu esei ta esnan cu asignacionnan di trabou, pero lo no permití pa esakinan reservá stul sino te ora e edificio habri pa tur hende.—Fil. 2:4.
5 Haci Bon di Presta Atencion: Apostel Pedro a recordá e cristiannan di promé siglo cu nan lo a haci bon di presta atencion n’e palabra profético manera na un lampi cu ta briyando den un lugá scur. (2 Ped. 1:19) Mescos ta cierto di nos. Bibando den e mundu bieu aki cu ta bou di control di Satanas ta manera ta den un lugá scur bo ta. Nos ta gradicidu cu nos a ser yamá for di scuridad spiritual. (Col. 1:13; 1 Ped. 2:9; 1 Juan 5:19) Pa permanecé den e lus, nos tin cu mantené nos fe fuerte dor di presta atencion n’e Palabra inspirá di Jehova. Nos congreso di distrito e aña aki lo animá nos pa haci net esei.
6 Tal bes ta rekerí esfuerso di nos parti pa nos por concentrá riba e programa, pero siguramente nos lo ser bendicioná pa haci esei. Nos mester haci esfuerso pa bini n’e lugá di congreso bon descansá di manera cu nos lo ta alerto durante e sesionnan. Permití bastante tempu tur dia pa yega n’e lugá di congreso, afin di ta den bo asiento promé cu e programa cuminsá. Anto uni den e cantica i oracion di apertura na comienso dje programa di cada dia. Adultonan mester ta un ehempel, i mayornan mester entrená nan yunan.—Efe. 6:4.
7 Si nos repasá e temanan dje partinan promé cu e programa dje dia cuminsá, nos por purba anticipá cua puntonan tal bes lo ser presentá durante e sesion ei. Esaki lo aumentá nos interes den e informacion ora e ta ser presentá. Nos lo por presta atencion na puntonan cu lo yuda nos expresá na otronan pakico nos ta kere den Dios i den su promesa sigur di recompensá esnan cu ta busk’é cu empeño. (Heb. 11:1, 6) A ser recomendá pa nos haci notanan breve pa yuda nos corda e puntonan principal dje programa. Si nos tuma demasiado nota, nos lo por perde algun punto clave debí cu nos ta muchu ocupá ta skirbi.
8 Aña pasá atrobe a observá hopi adulto i hóben ta cana por nada den e pasiyonan, ta keiru rond pafó, i ta combersá cu otro durante cu e programa tabata den progreso, en bes di scucha na loke “e esclabo fiel i discreto” a percurá pa nos beneficio. Jesus a primintí di duna nos alimento spiritual n’e debido tempu. (Mat. 24:45-47) P’esei, nos mester ta presente pa beneficiá dje alimento ei i no mustra un falta di aprecio. (2 Cor. 6:1) Tambe ta parce cu ora algun mucha bira inkieto, hopi bes nan ta pidi pa bai baño como un excuus pa lanta i bai cana rond. Bon entrenamentu na cas generalmente lo haci e baimentu frecuente pa baño innecesario. Tin biaha, hóbennan mas grandi ta sinta huntu den lugánan alehá, ta papia, ta fluister i pasando carta un pa otro. Nos hóbennan, kendenan ta enfrentando hopi presion awe, tin cu concentrá riba e informacion cu ta ser presentá, no haciendo otro cosnan durante e programa. Mester evitá deseonan di hubentud cu no ta armonisá cu principionan di Bijbel. (Compará cu 2 Timoteo 2:22.) Nos lo onra Jehova i hacié alegrá si nos tur, adulto i hóben, presta atencion.
9 Si bira necesario pa un dje ushernan duna conseho na cualkier persona den e asuntunan aki, mester acept’é como un percuracion amoroso for di Jehova. (Gal. 6:1) Tur ruman mester corda cu e motibu cu nos ta haci esfuerso pa asistí n’e congreso ta pa nos por ‘scucha i siña.’ (Deu. 31:12) Tambe, “un persona sabí lo scucha i ricibí mas instruccion.” (Pro. 1:5) Den e tempu cu ta resta promé cu bo asistí n’e congreso, considerá huntu como famia e necesidad di sinta huntu den auditorio, keda sintá durante henter e programa, i presta sumo atencion, afin di saca pleno beneficio dje programa.
10 Adorno cu Ta Agradá Jehova: E pueblo di Jehova ta ser exhibí pa tur e mundu mira. (1 Cor. 4:9) Generalmente nos ta conocí pa nos norma excelente di bisti i peña. Aplicando e principionan bíblico hañá na 1 Timoteo 2:9, 10 i na 1 Pedro 3:3, 4 a resultá den cambionan grandi den e aparencia di hopi ruman compará cu e manera cu nan tabata ora nan a cuminsá asociá cu e congregacion cristian. Esaki ta na contraste skerpi cu e normanan di bisti i peña mundano cu ta sigui bai atras. Nos mester tin cuido pa nos no bira manera e mundu den nos aparencia—bisti pañanan extremo, promové novedadnan den estilo di peña mundano, of bisti inmodestamente. Nos manera ehemplar di bisti i peña mester yuda esnan recien interesá cu ta asistí n’e congreso mira con cristiannan tin cu dorna nan mes.
11 Aunke e congresonan di aña pasá a laga un impresion general masha faborabel atras, ainda tin algun di nos rumannan cu tin problema cu un moda di bisti i peña mundano, specialmente despues dje sesionnan. Ora nos ta traha nos plannan pa asistí n’e congreso, nos mester analisá nos mes relacioná cu nos manera di bisti i peña. Mayornan, ta sabí pa controlá loke boso yunan chikitu i tienernan lo bai bisti. Haci sigur cu nos no ta lagando estilo i novedadnan mundano tene un mal influencia riba nos aparencia cristian.
12 Mantené Conducta Excelente: Conducta excelente ta un característica di cristiannan berdadero. (1 Ped. 2:12) Nos comportacion unda cu nos por ta—n’e congreso, na restaurantnan i na hotel, i tambe ora nos ta biahando—por duna un testimonio excelente i yuda otronan mira loke fe den Dios i den su Palabra por haci pa hende. Esaki tal bes ta impulsá algun pa bin conocé Jehova. (Compará cu 1 Pedro 3:1, 2.) Nos tin e privilegio di glorificá Dios mediante nos conducta. E gerencia di un hotel na Alabama, Merca, a bisa cu nos delegadonan ta “e grupo mas simpático i cu mihó comportacion cu nan ta hospedá.” Nan a agregá: “Lo ta un privilegio pa tin boso atrobe den futuro.” Un oficina di turismo i congreso den parti nortwest di Merca a skirbi: “Tur aña, henter nos comunidad ta spera ansiosamente e conferencia di Sociedad Watchtower. Boso miembronan ta un berdadero deleite; comportando nan mes cu sumo cortesia i respet. Nos negoshinan local ta reconocé esaki i ta atesorá e regreso di nan ‘famia’ di huéspednan tur aña.” Informenan manera esakinan ta un placer pa lesa, no ta asina? Sin embargo, ta necesario pa keda vigilante di manera cu nos por conserbá e bon reputacion dje pueblo di Jehova.
13 Hopi recordatorio a ser duná tocante controlá nos yunan, pa no laga nan core rond den hotel sin supervision, molestiando otro bishitantenan. Tur aña, Sociedad ta ricibí informenan cu algun di nos yunan ta sin supervision den of rond dje pisina of ta mira nan ta core rond den pasiyonan i áreanan público di hotel. Un manager cu a pasa un anochi na su hotel a ser lantá dos biaha despues di 11:00 p.m. dor di gruponan di nos muchanan batiendo na porta di cada kamber en busca di otro Testigonan. Aunke e congresonan ta duna nos chens pa bishitá i asociá cu nos rumannan, tog mayornan mester tene na mente nan obligacion di percurá supervision pa nan yunan na tur momento. Esaki ta un responsabilidad cu Jehova ta pone riba tur mayor. (Pro. 1:8; Efe. 6:4) E cosnan cu muchanan ta haci sin supervision por daña e bon reputacion cu otro Testigonan di Jehova a haci esfuerso pa edificá.—Pro. 29:15.
14 Si un hotel ta percurá desayuno grátis durante bo estadia, lo bo no mester mira esaki como un oportunidad pa probechá coge e cuminda di merdia. Hotelnan a raportá cu algun di nos rumannan a bin for di nan kambernan cu sacunan di plestik i a yena nan cu fruta, i tur tipo di pan dushi pa come despues, lagando poco pa e otro huéspednan. Tal comodidadnan di hotel ta ser percurá como un cortesia pa huéspednan cu ta na hotel i no mester ser abusá. Tumando mas di loke lo bo come durante bo desayuno realmente lo demostrá un spiritu di golosidad, i tambe ta desonrado. Si nos ripará un actitud inapropiado di parti di compañeronan Testigo, lo ta un bondad pa recordá nan dje manera cu nan lo mester actua. Corda tambe, no mag di cushiná den kambernan di hotel aménos cu tin un cushina pa e propósito ei. Si bo ta bini cu un djuk di ijs den bo kamber, por fabor, haci sigur cu e no ta lek ni soda i asina daña e tapijt, mueble of murayanan dje kamber.
15 Tene na mente cu dunamentu di tip ta apropiado ora bo ricibí un servicio personal, specialmente ya cu hopi hende cu ta sirbi público, manera waiter, waitress, camarera i belboy, ta dependé principalmente di tip pa gana nan pan. Como Testigonan di Jehova, nos kier demostrá bon manera den esaki tambe.—Mira ¡Despertad! di 22 di juni, 1986, página 24-7.
16 Cubriendo Gastunan di Congreso: Nos tur lo tin gastunan pa asistí n’e congreso. Tin un otro gastu mas cu nos mester considerá. Lugánan cu ta ser usá pa congreso ta caru. Tambe tin otro gastunan cu mester atendé. Nos contribucionnan boluntario i generoso n’e congreso ta ser apreciá mashá.—Echo. 20:35; 2 Cor. 9:7, 11, 13.
17 Asiento: E instruccionnan cu a ser duná pa un cantidad di aña lo sigui aplicá, esta, POR RESERVA STUL SOLAMENTE PA BO MIEMBRONAN DIRECTO DI FAMIA I CUALKIER PERSONA CU POR TA BIAHANDO CU BO DEN BO AUTO. Tabata dushi pa mira cu mas ruman ta cumpliendo cu e instruccionnan aki den añanan recien, i esaki a aumentá e ambiente amoroso desplegá n’e congresonan. Na mayoria sitio algun stul ta mas fácilmente accesibel cu otronan. Por fabor, mustra consideracion, i laga e stulnan mas cumbiniente pa esnan kende nan circunstancianan ta rekerí esei.
18 Cámara, Videocámara i Casetrecorder: Por usa cámara i ekipo di graba na congresonan. Sin embargo, usando nan nos no mag distraí otronan presente. Nos no tin cu cana rond durante e sesionnan sacando potret, ya cu esei lo molestiá otronan cu ta purbando di concentrá riba e programa. No ta permití pa conectá ningun sorto di aparato di graba n’e sistema di coriente of di zonido, tampoco e ekipo aki no mag blokea e pasiyonan, caminda di cana of e bista di otronan.
19 EHBO: E Departamento di EHBO ta solamente pa casonan di emergencia. E no por atendé esnan cu ta crónicamente malu. P’esei bo mester considerá di antemano cua ta e necesidadnan médico di bo mes i di bo famia. Por fabor, bin cu bo mes aspirin, remedi pa digestion, pleister, prèkè, i artículonan similar, ya cu cosnan asina lo no ta disponibel n’e congreso. Cualkier persona cu sa cu e tin chens di haña steipi, shok di insulina, problemanan di curason, etcétera, mester anticipá su necesidadnan te n’e grado posibel. E mester tin e remedinan necesario, i un miembro di famia of di congregacion cu ta comprendé su situacion mester ta huntu cuné na tur momento pa percurá cualkier yudansa necesario. Problemanan a presentá na congresonan ora a laga personanan cu problemanan crónico di salú nan so i nan a bira malu. E administracion di congreso mester a yama ambulans pa hiba nan hospital. Si algun ruman cu ta rekerí atencion médico special no tin famia cu por yuda nan, nan lo tin cu informá nan ancianonan di congregacion dje situacion pa nan haci areglonan necesario pa yuda. Lo no tin areglo n’e congresonan pa kambernan special pa acomodá esnan cu alergia.
20 Cuminda n’e Congreso: Dor cu no ta sirbi cuminda na congresonan a pone cu hopi mas ruman ta liber durante tur e sesionnan pa concentrá riba e alimento spiritual. Nos a ricibí un cantidad di expresion di aprecio pa e simplificacion aki desde cu a instituí e areglo. Tur ruman mester planea pa trece nan mes artículonan di cuminda práctico i nutritivo pa e pausa di merdia, manera a ser sugerí den e suplemento di Nos Ministerio di Reino di mei 1995, §22. No mag trece ningun envase di glas ni bebidanan alcohólico na e lugá di congreso. Djuknan mester ta suficiente chikitu pa pas bou di bo stul. A ripará cu algun den auditorio ta come i bebe durante e programa. Esaki ta falta di respet. Caminda tin un área comercial di bende cuminda den e lugá di congreso of tin bendedónan pafó, a ripará cu algun ruman ta bai cumpra cos durante e programa. Esei ta inapropiado.
21 Berdaderamente nos ta apreciá nos bankete spiritual i e ambiente relahá i pacífico di compañerismo durante nos pausanan corticu di merdia. Na armonia cu e propósito dje areglo aki, en bes di bandoná e lugá durante e pausa di merdia pa bai cumpra cuminda, por fabor, bini cu algu di come. Asina, lo bo tin mas tempu pa disfrutá dje compañerismo di bo rumannan.
22 Ki contentu nos ta cu e Congresonan di Distrito “Fe den e Palabra di Dios” lo cuminsá pronto! Nos tur kier ta sigur cu nos preparacionnan a ser hací pa asistí na henter e programa, di manera cu nos por disfrutá plenamente dje bankete spiritual excelente cu Jehova a prepará pa nos mediante su organisacion. Den e manera ei nos lo bira “completamente ekipá pa tur bon obra” den e dianan nos dilanti.—2 Tim. 3:17.
[Box on page 6]
Recordatorionan pa Congreso di Distrito
Bautismo: Candidatonan pa bautismo mester ta sintá den e seccion asigná promé cu e programa cuminsá riba diasabra mainta. Cada persona cu ta planea pa bautisá mester bini cu un trahe di baño modesto i un serbete. Den pasado algun a bisti trahe di baño cu no tabata apropiado i cu a rebahá e ocasion. Ancianonan cu ta repasá e preguntanan for dje buki Nos Ministerio cu candidatonan pa bautismo, mester haci sigur cu cada candidato ta comprendé e puntonan aki. Despues dje discurso di bautismo i oracion na encargo dje orador, e presidente dje sesion lo anunciá e cantica. Despues dje último cuplet, e ushernan lo dirigí e candidatonan n’e sitio di bautismo of n’e autonan cu lo hiba nan aya. Bautismo como símbolo di un persona su dedicacion ta un asuntu íntimo i personal entre e individuo i Jehova. Pues, ta inapropiado pa candidatonan brasa otro of tene man di otro segun cu nan ta ser bautisá.
Karchinan pa Badge: Por fabor, bisti e badge di 1997 tur momento n’e congreso i ora bo ta biaha pa of for dje sitio di congreso. Esaki hopi bes ta crea oportunidadnan pa nos duna un excelente testimonio. Mester obtené e karchi pa badge i e plestik pa cargu’é via bo congregacion, ya cu nan lo no ta disponibel n’e congreso. No warda te cu un par di dia promé cu e congreso pa pidi p’e karchinan pa badge pa bo i bo famia. Corda carga bo karchi actual di Instruccion/Exoneracion Médico Delantá.
Garoshi di Baby i Bo Mes Stul: Den mayoria localidad, no por usa garoshi di baby den lugánan di reunimentu público. Reglamentunan contra candela ta prohibí pa pone nan den pasiyonan of entre rijnan di stul. Siendo cu multitudnan grandi por causa pertamentu, garoshinan di baby ta potencialmente peligroso no solamente pa e baby sino tambe pa cualkier persona cu lo por trompecá riba nan. Pues, por fabor, no bini cu nan na e sitio di congreso. Stulnan di mucha portátil of pa den auto ta ser permití, siendo cu esakinan por ser mará riba stul banda dje mayornan. Por fabor, no bini cu bo mes stul. Esei ta peligroso i no ta ser permití den facilidadnan público grandi. Bo cooperacion ta importante i ta ser apreciá.
Servicio di Boluntario: Bo por apartá poco tempu n’e congreso pa yuda den un dje departamentonan? Sirbiendo nos rumannan, aunke ta solamente pa un par di ora, por ta masha útil i ta duna hopi satisfaccion personal. Si bo por yuda, por fabor, meldu na e Departamento di Servicio di Boluntario na e congreso. Muchanan bou di 16 aña di edad tambe por haci un excelente contribucion dor di traha bou di guia di un mayor of un otro adulto responsabel.
Palabranan di Cautela: Keda alerto pa posibel problemanan pa asina evitá dificultad innecesario. Hopi bes ladron i otro individuonan sin escrúpulo ta atacá hende cu no ta den nan mes ambiente. Haci sigur cu bo vehículo ta di lock tur momento, i nunca laga nada na bista pa tenta un persona pa kibra drenta. Ladronnan i ‘zakkenrollers’ ta enfocá nan atencion riba reunionnan grandi. Lo no ta sabí pa laga nada di balor riba bo stul. Bo no por ta sigur cu tur hende rond di bo ta un cristian. Pakico hinca nan den tentacion? Tabatin informe di personanan djafó cu a purba di lok muchanan chikitu for di e área di congreso. TENE BISTA RIBA BO YUNAN NA TUR MOMENTO.
Servicionan di television i video cu ta disponibel den hopi hotel hopi bes ta presentá programanan indecente i pornográfico. Sea alerto pa e trampa aki i no permití muchanan haña acceso no-supervisá na e television den e kamber. Mayornan kisas ta deseá di prevení nan yunan di wak cierto canalnan di television, manera “pay TV” den nan kamber di hotel dor di pidi e hotel pa inactivá e canalnan ei durante nan estadia.
Por fabor, no bel ni skirbi e gerencia dje lugá di congreso, buscando informacion tocante asuntunan di congreso. Si e informacion no ta disponibel cerca e ancianonan, lo bo por skirbi na e adres di un congreso specífico.