“Scucha i Absorbá Mas Instruccion”
1 E buki di Proverbionan ta describí sabiduria como si fuera e ta gritando: “Scucha, pasobra ta tocante cosnan di sumo importancia mi ta papia, i ora mi lipnan habri esei tin di haber cu rectitud. Mi tin conseho i sabiduria práctico. . . . Scucha mi; sí, felis ta esnan cu ta warda mi camindanan. Pasobra esun cu haña mi sigur lo haña bida, i ta obtené bon boluntad di Jehova.” (Pro. 8:6, 14, 32, 35) E palabranan ei ta un bon descripcion dje instruccion cu ta spera nos na e Congreso di Distrito “Siñadónan dje Palabra di Dios.”
2 E programa di congreso a ser prepará despues cu a haci un análisis dje necesidadnan dje hermandad mundial, i e ta designá pa trata cu e necesidadnan ei. E instruccion spiritual i e sugerencianan práctico cu lo ser ofrecé por yuda nos ser felis, mantené un bon relacion cu Jehova i keda riba e caminda cu ta hiba na bida eterno, basta nos aplicá nan. Sigur anto, nos tin bon motibu pa “scucha i absorbá mas instruccion.”—Pro. 1:5.
3 Promé cu e Programa: Pa beneficiá plenamente di loke ta ser presentá, nos mester ta sintá na nos lugá i cu e actitud mental corecto ora e programa cuminsá. Esaki ta rekerí bon organisacion personal. Un factor clave ta di haci cosnan trempan. Bai drumi trempan e anochi promé. Lanta suficiente trempan mainta pa duna tur hende den bo grupo tempu pa prepará i come algu. Yega trempan na e sitio di congreso ya boso por haña lugá pa sinta i atendé asuntunan necesario promé cu programa cuminsá. Porta lo habri 8’or di mainta, i e programa ta cuminsá tur dia 9:30 di mainta.
4 Como cu e propósito principal di reuní ta pa alabá Jehova “entre e multitudnan congregá,” cada sesion mester cuminsá den un manera cu ta engrandecé nos Dios. (Sal. 26:12) P’esei, nos ta animá tur hende pa ta sintá promé cu anunciá e cantica di apertura. Esaki ta na armonia cu e conseho bíblico: “Laga tur cos tuma lugá decentemente i segun areglo.” (1 Cor. 14:40) Kico esei ta nificá pa cada un di nos? Ora bo mira e presidente sintá riba plataforma durante e introduccion musical, tuma asiento mesora. Esaki lo permití bo participá di henter curason den e cantica cu ta habri cada sesion, dunando alabansa na Jehova.—Sal. 149:1.
5 Durante Programa: Ésdras “a prepará su curason pa consultá e ley di Jehova i pa cumpli cuné.” (Ésd. 7:10) Con nos por prepará nos curason pa ricibí e instruccion cu Jehova ta percurá? Segun cu bo ta repasá título dje vários partinan mencioná riba e programa imprimí, puntra bo mes: ‘Kico Jehova ta bisa mi via e programa aki? Con mi por usa e informacion pa beneficiá mi mes i mi famia?’ (Isa. 30:21; Efe. 5:17) Sigui haci bo mes e preguntanan ei durante henter e congreso. Haci anotacion di puntonan cu bo tin pensá di usa. Tuma tempu pa considerá nan na fin dje sesion di cada dia. Esaki lo yuda bo keda corda e informacion i aplik’é.
6 Concentrá pa vários ora largu por ta un desafio. Kico por yuda nos resistí e tendencia di drif bai mentalmente? Probechá dje poder di wowo. Pa gran parti, loke nos ta enfocá nos bista ariba ta controlá nos atencion. (Mat. 6:22) P’esei, resistí e gana di bira cara wak ki ora cu bo tende un zonido of movecion. Keda cu bo wowonan fihá riba e orador. Siguié den bo Bijbel ora e ta lesa un texto, i keda cu bo Bijbel habrí segun cu e ta papia over dje texto.
7 Amor cristian lo motivá nos pa evitá di stroba otronan segun cu e programa ta den. (1 Cor. 13:5) Esaki ta “un tempu pa keda ketu” i scucha. (Ecl. 3:7) Pues, evitá di papia i cana bai-bin innecesariamente. Limitá baimentu di baño dor di planea di antemano. No come ni bebe si no ta durante e tempu asigná pa esei, a ménos cu ta debí na factornan serio di salú. Esnan cu ta bini cu telefon celular, pager, cos pa graba video i cámara, no mag usa esakinan di tal manera cu nan ta distraí otro hende. Mayornan mester haci areglo pa henter nan famia sinta huntu—incluso e tienernan—di manera cu nan por supervisá nan yunan adecuadamente.—Pro. 29:15.
8 Aña pasá un anciano cu pa décadanan ta asistí na congreso a comentá: “Tabatin un motibu mas pakico mi a haña e congreso aki sobresaliente. Casi tur hende den auditorio tabata haci anotacion, incluso mucha chikitu. Tabata un goso pa mira esei. Tur hende tabata habri Bijbel ora oradornan tabata pidi pa bai na cierto textonan.” Ta realmente encomendabel ora rumannan ta scucha cu bon atencion asina. Esei no solamente ta beneficiá nos i nos compañeronan di congreso, sino mas cu tur cos e ta glorificá nos Magnífico Instructor, Jehova Dios.—Isa. 30:20.