Reuní Huntu pa Alabá Yehova
1 Yehova ta inigualabel den poder, inskudriñabel den sabiduria, perfekto den hustisia i e ta e personifikashon di amor. Komo Kreadó, Dunadó di Bida i Soberano Universal, e so ta digno di nos adorashon. (Sal. 36:9; Rev. 4:11; 15:3, 4) E Kongreso di Distrito di e aña aki “Duna Gloria na Dios” lo hasi nos mas determiná pa alab’é komo e úniko Dios berdadero.—Sal. 86:8-10.
2 Bon Planiamentu Ta Nesesario: Pa nos benefisiá plenamente di e bankete spiritual ku Yehova tin prepará pa nos, ta importante pa hasi bon planiamentu di antemano. (Efe. 5:15, 16) Bo a keda kla ku bo areglonan pa transportashon, i pa haña liber di trabou òf skol? No laga e asuntunan importante aki te na último momentu. Si bo tarda pa pidi liber, lo bo por pèrdè un parti di e okashon gososo aki. Nos tur mester ta presente na kada seshon.
3 Pone meta pa bo yega trempan na e kongreso tur dia. Esei lo duna bo chèns pa sinta promé ku e kantika di apertura i lo yuda bo tin e aktitut mental korekto pa risibí e instrukshon ku ta ser presentá. Tur dia porta lo habri 8:00 a.m. Por fabor no warda lugá pa ningun otro hende a ménos ku ta pa bo famia yegá i pa esnan ku a bin ku bo den outo.
4 Ta pidi tur hende pa trese algu leve pa kome en bes di sali bai i kumpra kuminda durante pouze di mèrdia. Bo koperashon ku e areglo aki ta kontribuí na un ambiente mas trankil i ta duna nos mas chèns pa asosiá ku nos kompañeronan di fe. (Sal. 133:1-3) Por fabor tene na mente ku no ta permití bòter di glas ni bebida alkohóliko na e fasilidatnan di kongreso.
5 Skucha i Siña: Esdras a prepará su kurason huntu ku orashon pa e risibí e palabra di Dios. (Esd. 7:10) El a inkliná su kurason na Yehova su siñansanan. (Pro. 2:2) Nos por kuminsá prepará nos kurason pa e kongreso asta promé ku nos sali for di kas dor di meditá riba e tema di e kongreso i papia riba dje ku nos famia.
6 Den un ouditorio grandi, por tin hopi kos pa mira i zonidu ku ta kita nos atenshon. E distraishonnan ei fásilmente por stroba nos di konsentrá riba loke e oradó ta bisa. Si esei sosodé, nos ta pèrdè informashon balioso. E sugerensianan den e kuadro riba e página aki por yuda nos konsentrá mihó.
7 Mustra Konsiderashon pa Otro Hende: Ta permití uso di kámara i vidiokámara durante programa, pero pa evitá di stroba otro hende, usa nan solamente na bo asiento. Telefon selular i pager mester ta programá di tal manera ku nan no ta stroba otro hende. No tin mag di konektá ningun ekipo personal riba e sistema di koriente di e kongreso ni riba e sistema di zonidu.
8 Sin duda nos ta anhelá pa e dia yega pa kaba pa nos reuní huntu pa alabá Yehova! Laga nos ta determiná pa glorifik’é dor di ta presente na kada seshon, dor di skucha atentamente i dor di apliká loke nos siña.—Deu. 31:12.
[Questions]
1. Kiko ta e tema di e kongreso, i dikon Yehova ta digno di nos alabansa?
2, 3. Di ki manera bon planiamentu ta duna nos chèns pa benefisiá plenamente?
4. Dikon ta ser pidí pa nos tur trese algu leve di kome na kongreso?
5. Kon nos por kuminsá prepará nos kurason pa e kongreso?
6. Kiko por yuda nos keda konsentrá riba e programa? (Mira kuadro.)
7, 8. Kon nos por mustra konsiderashon pa otro hende?
[Box on page 3]
Skucha na Kongreso
▪ Meditá riba e temanan di e diskursonan
▪ Buska e tekstonan
▪ Hasi anotashon breve
▪ Anotá puntonan spesífiko pa apliká
▪ Repasá loke bo siña