Mantené Conducta Excelente Cu Ta Glorificá Dios
1 Unda cu nos ta, nos conducta, bistí i areglo personal ta duna testimonio tocante nos i e Dios cu nos ta adorá. Esaki ta bira riparabel foral na reunionnan grandi dje pueblo di Dios, caminda hopi hende ta observá nos. Ora nos ta ehemplar, esei ta glorificá e nomber di Jehova. (1 Ped. 2:12) Pero, mal comportacion of accionnan desconsiderá di parti di djis un par di ruman por trece reproche riba e nomber di Dios i riba su pueblo. (Ecl. 9:18b) Teniendo na mente cu hende djafó ta husga nos organisacion i e Dios cu nos ta adorá a base di nos conducta, mester pone nos presta sumo atencion den “haci tur cos pa e gloria di Dios.”—1 Cor. 10:31.
2 Conducta Ehemplar na Hotel: Den mayoria caso, personal di hotel ta keda masha impresioná cu e ordu, bon manera i limpiesa di Testigonan di Jehova. Un manager papiando di famianan Testigo cu a keda na su hotel, a bisa: “E yunan di Testigonan di Jehova ta e mihó muchanan cu mi a yega di mira! Nan ta bisti manera dama i cabayero; nan ta respetuoso, cortes i cu bon manera; i nan no a causa ningun problema. Di berdad mester felicitá boso pa boso hóbennan. Nos a disfrutá di tin boso yunan aki.” Hende ta duna comentarionan asina cu smak pasobra esnan cu ta trata cu nos por mira e amor i respet cu ta existí entre e pueblo di Jehova.
3 Di otro banda, remarkenan di otro personal di hotel ta indicá cu ainda tin problema cu algun ruman cu ta negligente den nan conducta of cu ta abusá di facilidadnan di hotel. Esaki ta causa problema i crea crítica cu no mester existí. Tin manager ta keha cu mucha i tienernan ta haci bochincha i ta indisipliná, i ta usa pisina of otro facilidadnan di recreo sin supervision di nan mayornan.
4 Mayoria hotel tin regla cu nan ta verwagt pa huéspednan cumpli cuné. Tin ruman a kibra e reglanan aki relacioná cu nivel di bochincha of dor di cushiná den nan kamber. Managernan di hotel ta bisa nos cu, cushiná caminda no tin mag, ta un abusu comun di nan propiedad. Esei no solamente a daña cos den e kambernan, sino cu e holó tambe cu a keda atras a pone cu tabata imposibel pa huur e kambernan pa dianan of simannan despues. A ménos cu e hotel specíficamente ta permití pa cushiná den kamber, no mag haci esei.
5 Nos mester haci un esfuerso pa cooperá plenamente cu gerente. Nos sigur no kier laga un mal impresion atras dje pueblo di Jehova. Como cristian nos tin cu comportá nos mes onradamente na tur ocasion. Nos no mag bai cu laken of otro “suvenir” for di hotel, ya cu esei ta hortamentu; ni nos no mester ta desonesto den informá cuantu hende nos tin pensá di hinca den un kamber ora nos ta haci reservacion of ora di chek in.
6 Comportacion i Bistí Apropiado na Congreso: Sin importá e tipo di lugá cu ta usa, durante congreso mester consider’é como un Salon di Reino grandi. Bistí i areglo personal apropiado mester ta mes bisto cu ora nos ta asistí n’e reunionnan di nos congregacion local. Tantu durante como despues dje sesionnan di congreso, rumannan homber i muher mester evitá di bisti pañanan inmoderá of di moda extremo cu ta reflehá e spiritu di mundu i cu ta haci difícil pa hende reconocé nos como diferente den un sentido sano. Rumannan muher mester tene cuidou pa e estilo i largura di nan saya i bistínan ta apropiadamente modesto. (1 Tim. 2:9, 10) Sea cu nos ta asistí n’e congreso, ta keda na un hotel, ta come den un restaurant of ta haci compra den un tienda, nos mester reflehá semper cu nos ta minister di Dios, i no duna ningun motibu pa tropieso.—2 Cor. 6:3.
7 Lo tene bautismo diasabra mainta n’e congreso. E Toren di Vigilancia di 1 di april 1995, página 30, ta describí e actitud cu nos mester desplegá n’e ocasion ei. E revista ta bisa cu nos “mester trata bautismo cu e seriedad apropiado. E no ta un ocasion pa expresionnan emocional na bos haltu, ni pa haci fiesta of pa haci pret. Pero tampoco e ta un ocasion tristu of stijf.” Lo ta masha inapropiado pa esnan cu ta bai bautisá bisti trahenan di baño chikitu of sunú, sea ta hende homber of hende muher. Pues, tur hende mester reflehá tantu e seriedad como e goso di bautismo cristian.
8 Pedro ta recordá nos dje ‘clase di persona cu nos mester ta den actonan santu di conducta i echonan di debocion piadoso.’ (2 Ped. 3:11) Laga nos palabra i accionnan n’e Congreso di Distrito “Hacidónan dje Palabra di Dios” yuda observadónan di curason onrado siña conocé i adorá nos gran Dios, kende ta digno di tur onor i gloria.—1 Cor. 14:24, 25.