“Mantené un Kondukta Ekselente Meimei di Hende di e Nashonnan”

1. Dikon ta importante pa nos tin un bon kondukta durante nos próksimo kongresonan?

¹ Kada aña ku nos selebrá nos kongreso, nos ta hala atenshon di hende. P’esei ta importante pa mediante nos kondukta nos representá e Dios ku nos ta adorá na un manera apropiá. (Lev. 20:26) Hende tin ku mira na tantu nos bon manera komo nos aparensia ku nos realmente ta siguidónan di Kristu. Pero kon nos por ‘mantené nos kondukta ekselente meimei di hende di e nashonnan’ na nos próksimo kongreso di distrito òf internashonal i asina glorifiká nos Tata selestial?—1 Ped. 2:12.

2. Durante e kongreso, ki oportunidat nos tin pa demostrá e personalidat kristian?

² Demostrá e Personalidat Kristian: E amor ku nos tin pa otro i e manera ku nos ta trata “hende di pafó” ta kompletamente diferente for di e spiritu ku ta reina den e mundu akí. (Kol. 3:10; 4:5; 2 Tim. 3:1-5) P’esei ta importante pa nos ta bondadoso i tin pasenshi ku personal di hotèl i restorant, asta ora problema presentá. Tambe ta un muestra di bon manera pa laga tep, si esei ta e kustumber, pa esnan ku duna nos servisio.

3. Mayornan ta haña ki rekordatorio, i dikon?

³ Mayornan tin ku paga bon tinu na nan yunan na e fasilidatnan di kongreso, hotèl i restorant. (Pro. 29:15) E gerente di un restorant na un hotèl a bisa un pareha: “Nos ta apresiá boso komo Testigunan di Yehova. Boso famia i yunan tin bon manera i ta masha kortes. Nos personal ta papia bon di boso i nos lo a deseá pa boso bini tur wikènt.”

4. Dikon ora nos ta na e lugá di kongreso nos tin ku paga tinu na e manera ku nos ta bisti?

⁴ Bisti Apropiá: E paña ku nos ta bisti durante kongreso mester ta modesto i apropiá, i no mester imitá e moda ekstremo ku ta normal den mundu. (1 Tim. 2:9) Nos tin ku evitá di bisti demasiado kasual òf slòns ora nos ta “check in” òf “check out” na hotèl i durante nos tempu liber, tantu promé komo despues di e seshonnan. Asina nos lo sinti nos mes bon di tin nos badge di kongreso bistí i no tin nodi di sinti bèrgwensa pa duna testimonio ora e oportunidat presentá. Nos aparensia i bon kondukta durante e próksimo kongresonan no solamente lo atraé hende di kurason sinsero na e mensahe di Beibel ku ta salba bida, sino tambe lo e hasi Yehova kontentu.—Sof. 3:17.

Rekordatorionan pa Kongreso 2014

◼ Orario di Programa: Lo habri e portanan for di 12:00 p.m. Tur e tres dianan e músika di introdukshon lo kuminsá 1:20 p.m. Na e momento ei, nos tur mester tuma asiento pa asina e programa por kuminsá na un manera digno. Riba djabièrnè i djasabra e kantika i orashon di konklushon lo ta 8:55 p.m. i riba djadumingu 7:50 p.m.

◼ Kongreso Internashonal: Algun pais lo ta anfitrion di kongresonan internashonal. Ta bon pa nos tene kuenta ku e sukursalnan di e paisnan ei ta kalkulá a base di kantidat di asiento, lugá di parker i kamber di hotèl disponibel kuantu kongregashon i ruman di otro pais nan por invitá. Pues, si publikadónan ku no ta invitá basha bai na e kongresonan internashonal akí, esei por kousa un situashon kaótiko. Si sosodé ku bo no por bai na bo kongreso asigná, sinti bo liber pa skohe kualke otro kongreso, ménos esnan internashonal.

◼ Parkermentu: Tur kaminda ku e áreanan di parker ta kai bou di nos maneho, e lugánan di parker lo ta grátis i lo ser okupá segun e órden di yegada. Lugá di parker sa ta limitá, pues ta bon pa nos bai mas tantu posibel huntu den un outo en bes di kada ken bini ku su mes outo. Kòrda tambe ku na e lugánan di parker reservá pa hende ku tin un desabilidat ta vehíkulonan ku ta bini na remarke so tin mag di parker.

◼ Wardamentu di Asiento: Ora ku habri e portanan, por fabor no ranka sali kore manera ta pustamentu tin pa haña un área di sinta preferí. Komo kristian berdadero, nos ta wak bienestar di otro hende i esaki ta laga esnan ku ta mira alabá Yehova, esta, papia bon di dje. (Huan 13:34, 35; 1 Kor. 13:4, 5; 1 Ped. 2:12) Bo por warda asiento solamente pa esnan ku ta biba den kas ku bo i esnan ku ta bini den e mesun vehíkulo ku bo òf esnan ku bo ta studiando kuné aktualmente. A reservá asiento pa rumannan di edat i esnan enfermo. Komo ku e lugánan akí ta limitá, solamente un òf dos persona ku ta yuda e ruman di edat òf enfermo por sinta huntu kuné.

◼ Kuminda: En bes di bandoná e sitio di kongreso pa bai buska kuminda durante pousa, bini ku algu di kome. Bo por bini ku un djùk chikí ku por bai bou di bo asiento. No ta permití pa bini ku djùk grandi di piknik, ni nada di glas den e fasilidatnan di kongreso.

◼ Donashon: Nos por mustra apresio pa e organisashon i fasilidatnan di e kongreso mediante nos kontribushon boluntario pa e obra mundial na e kongreso. Esun ku ke hasi esei mediante chèk mester skirbié na nòmber di “Watch Tower.”

◼ Remedi: Si bo ta usa remedi, kòrda bini ku nan, ya ku esakinan lo no ta disponibel na e kongreso. Personanan diabétiko ku ta usa angua mester deshasí di esakinan na un manera responsabel, ya ku nan ta kai bou di desperdisio peligroso. No benta nan den ko’i sushi na e fasilidat di kongreso ni na hotèl.

◼ Medida di Prekoushon: Tene kuidou pa bo no slep òf kai. Tur aña ta sosodé aksidente pa motibu di sapatu inapropiá, spesialmente sapatu hilchi haltu. Pa prevení aksidente, ta bon pa bisti sapatu kómodo i modesto; esei lo yuda bo kana sin peliger riba trapi i áreanan di subida; asina lo bo evitá tambe ku bo sapatu ta pega den roster, etcetera.

◼ Hende Ku Tin Problema ku Oido: Lo transmití e programa riba un frekuensia FM. Pa bo por skucha e programa, lo bo tin ku trese un radio portátil i un earphone.

◼ Garoshi di Bebi i Stul: No trese garoshi di bebi ni stul grandi ku por stroba otro hende na e sitio di kongreso. Loke sí ta permití ta asiento di mucha, manera e tipo ku ta usa den outo, ku ta keda safe den un asiento banda di e mayor.

◼ Perfume: Mayoria di kongreso ta tuma lugá den edifisionan será ku ta dependé di sistema di ventilashon. P’esei, lo ta un muestra di konsiderashon di nos parti pa limitá uso di perfume i kolonia fuerte ku lo por kousa reakshon alérgiko serka esnan ku tin problema respiratorio òf otro problema paresido.—1 Kor. 10:24.

◼ Formulario Por Fabor Atendé (S-43): Usa un formulario Por Fabor Atendé pa duna informashon relashoná ku kualke persona ku mustra interes komo resultado di testimonio informal durante e kongreso. Por entregá formulario yená sea na e Departamento di Literatura òf na e sekretario di bo kongregashon ora bo ta bèk den bo kongregashon.

◼ Restorant: Si bo ta bai restorant den e área di kongreso, onra Yehova su nòmber mediante bo bon kondukta. Bisti na un manera ku ta klòp pa un kristian. Kòrda laga un tep adekuá si esei ta e kustumber lokal.

◼ Servisio di Boluntario: Si bo ke traha komo boluntario, mèldu na e Departamento di Servisio di Boluntario na e kongreso. Mucha bou di 16 aña ku ke yuda por hasi esaki, pero bou di guia di un mayor òf voogd òf un adulto aprobá pa un di nan.