Sea Santu den Tur Boso Kondukta
1 Komo sirbidónan di e Dios santu, Yehova, nos ta hasi esfuerso pa ta santu den tur loke nos ta hasi. (1 Ped. 1:15, 16) Esaki ta nifiká ku nos ta hasi esfuerso pa tene nos na e normanan di Yehova den tur aspekto di nos bida. E aña aki e kongreso di distrito lo duna nos un oportunidat spesial pa desplegá nos kondukta santu.
2 Nos bon manera por duna un testimonio poderoso. Aña pasá un hóben Testigu, na un manera nèchi, a pidi un resepshonista di hotèl algu pa skirbi i despues a yam’é danki. Esaki a impreshoná e empleado, i nan a tend’é bisa: “Awendia niun kaminda bo no ta haña hóbennan ku bon manera asina.” P’esei, ta bon pa mayornan vigilá nan yunan pa hasi sigur ku nan kondukta ta trese alabansa pa Yehova.—Pro. 29:15.
3 Den Restorant: Un weter di un restorant den bisindario di un kongreso a remarká: “Testigunan ta diferente. Nan ta mustra rèspèt pa otro hende.” Un bon kondukta ta enserá tambe evitá di papia i hari asina duru ku bo ta molestiá otronan ku ta kome den e restorant. Tambe nos mester kòrda ku den hopi pais ta un kustumber di duna tep, dependiendo di e servisio. Asta ora nos ta kome i bebe, nos ta purba hasi tur kos p’e gloria di Dios.—1 Kor. 10:31.
4 Na Kongreso: Nos kondukta ekselente mester ta bisto foral na e sitio di kongreso. Por fabor, sigui instrukshon di e ùshernan tantu den parkeerplaats komo den e sala. (Heb. 13:17) Famianan mester sinta huntu en bes di laga nan yunan, inkluso tinernan, bai sinta den grupo di otro hóbennan. No tin mag di konektá ningun tipo di aparato di graba riba e sistema di koriente òf sistema di zonidu. I por usa e aparatonan aki solamente den un manera ku nan no ta molestiá otro hende. Si bo ke saka potrèt, no usa flèsh durante programa. Pager i telefon selular mester ta programá di tal forma ku nan no ta distraí otro hende. Si bo ta testigu di un aksidente den e lugá di kongreso, en bes di bèl 911, por fabor, informá un ùsher òf e Departamentu di E.H.B.O. Nan sa kon pa lokalisá e yudansa médiko nesesario.
5 Nos kondukta ta distinguí nos for di otro hende i ta glorifiká nos Dios. (1 Ped. 2:12) Na e kongreso, tur hende por mira kon Testigunan di Yehova ta komporta nan mes. P’esei, sea desididu pa ta santu den tur boso kondukta.
[Study Questions]
1. Dikon ta importante pa nos ta santu den tur nos kondukta?
2. Ki impreshon kondukta di hóbennan Testigu por tin riba otro hende?
3. Kon nos por mustra konsiderashon ku otro hende ora nos ta kome na restorant?
4. Kiko bon kondukta na e sitio di kongreso ta enserá?
5. Kon nos kondukta na kongreso ta glorifiká Dios?
[Box on page 5]
Desplegá un Kondukta Santu
◼ Vigilá bo yunan bon
◼ Tene konsiderashon ku otro hende