Sea un Ehèmpel den Bon Obra
1 Ora nos ta reuní na gran kantidat na kongresonan di distrito, e manera ku nos ta komportá nos mes i e manera ku nos ta trata otro hende ta bira spesialmente notabel pa mirónes. P’esei kada un di nos mester presta atenshon spesial na e spièrtamentu bíbliko: ‘Sea huisioso; den tur kos presentá bo mes komo un ehèmpel den bon obra.’ (Tito 2:6, 7) Kisas èkstra esfuerso ta nesesario pa ‘no buska nos mes interes personal so, ma buska tambe interes di otronan.’ (Fil. 2:4) Laga nos konsiderá un área den kua nos por apliká e animashon aki na nos binidero Kongreso di Distrito “Duna Gloria na Dios.”
2 Mayornan i Yunan: Den un mundu kaminda asina hopi hóben tin mal manera, nos yunan ta sobresalí komo diferente. Esaki ta trese alabansa na Yehova i su organisashon. Sin embargo, algun biaha a yega di surgi problema ora mayornan no a supervisá nan yunan manera mester ta. (Pro. 29:15) Mayornan no mester laga nan yunan pa nan kuenta na e sitio di kongreso.
3 Algun mayor a eksperensiá ku ta útil pa promé ku kongreso repasá ku nan yunan e klase di komportashon ku ta ser sperá di nan. (Efe. 6:4) Nan ta yuda nan yunan komprondé ku berdadero amor kristian “no ta komportá su mes indesente” ni “no ta buska su propio interes.” (1 Kor. 13:5) E kongreso di distrito ta un tempu ku nos ta apartá pa risibí edukashon for di Yehova. Anto tantu mucha komo hende grandi por mustra rèspèt pa e areglo aki mediante nan kondukta na e sitio di kongreso i tambe otro kaminda.—Isa. 54:13.
4 Nos bon kondukta por hasi hopi pa kontrarestá ideanan robes i atraé hende na adorashon berdadero. (Mat. 5:16; 1 Ped. 2:12) Mare tur esnan ku nos topa na nos kongreso di distrito por haña un testimonio faborabel mediante e manera ku nos ta komportá nos mes i na e manera ku nos ta trata nan. Di e forma aki lo nos ‘presentá nos mes komo un ehèmpel den bon obra’ i glorifiká Yehova.—Tito 2:7.
[Questions]
1. Pakiko nos mester ta spesialmente konsiente di nos kondukta na e kongreso di distrito?
2, 3. Kon yunan por trese alabansa na Yehova, i ki responsabilidat mayornan tin?
4. Ki efekto nos bon kondukta por tin riba otro hende?