Haci Bon i Haña Elogio!
1 “Nan tin un serenidad cu nan cu nunca mi a mira den ningun otro hende.” “Ta un placer di por tin e grupo aki.” Esakinan ta muestra dje hopi comentarionan positivo cu nos a ricibí di observadó despues dje congresonan di distrito di aña pasá, enfatisando e excelente reputacion cu nos tin como organisacion. (Pro. 27:2; 1 Cor. 4:9) Al final, ta na Jehova tal elogio ta bai. (Mat. 5:16) Awor nos tin nos dilanti un otro excelente oportunidad pa elogiá Dios na e Congreso di Distrito dje aña aki “Siñadónan dje Palabra di Dios.”
2 Segun cu bo ta coordiná bo esfuersonan cu esnan dje organisacion di congreso, tene na mente cu lunanan—tin biaha añanan—di preparacion ta necesario. Cientos di ruman ta dedicá hopi tempu pa organisá tur cos. Esaki ta incluí huur lugá, reuní ekipo i reclutá trahadó. E preparacion di antemano aki ta resultá den bendicionnan spiritual pa tur. Con nos por yuda?
3 Cada aña nos ta ricibí recordatorionan bondadoso relacioná cu conducta apropiado na congreso. Di con? Pasobra segun cu mundu su actitud, su forma di bisti i su comportacion ta bai atras, nos ta nenga di bai nan tras. Nos no kier daña nos excelente reputacion. (Efe. 2:2; 4:17) Laga nos tene e siguiente spiertamentunan na mente.
4 Haci Bon—Na e Sitio di Congreso: A ripará cu algun delegado ta nenga di cooperá cu e ushernan i ta asta papia cu nan den un forma no-cristian. Dor di keda sin sigui instruccion dje rumannan i parkeer caminda ley no ta permití, kran a bai cu auto di algun delegado. Un cos ta sigur, e actitud di ami-promé no ta identificá un persona como un hacidó di bon, ni e no ta trece elogio pa Jehova Dios. P’esei laga nos mustra amor, tene pacenshi i cooperá.—Gal. 5:22, 23, 25.
5 Ora cu porta di congreso habri 8’or di mainta, por mira algun ruman ta core i pusha otro pa obtené e “mihó” stulnan. E tipo di comportacion aki a resultá den lesion. I siendo cu a ser sugerí pa bini cu un almuerso liviano pa come merdia, no ta apropiado pa pone mesa riba parkeerplaats pa sirbi un cuminda grandi. Esaki lo duna e impresion cu ta picnic tin manera na eventonan deportivo.
6 Como sirbidónan di Jehova Dios, nos tin e oportunidad pa reflehá su personalidad den tur loke nos ta haci. Esaki ta incluí haci areglo pa congresonan caminda e nomber di Dios ta enbolbí i asistí na nan. Corda, “Dios no ta un Dios di desordu, sino di pas.” (1 Cor. 14:33) Pues anto, laga nos ta decididu pa yuda tur observadó dicerní e cualidad aki di Jehova for di loke nan ta mira den nos: nos conducta segun cu nos ta planea p’e Congreso di Distrito “Siñadónan dje Palabra di Dios” i asistí na dje. Nos ta spera cu observadónan sincero por realisá cu Jehova su multitudnan congregá ta organisá “decentemente i segun areglo.”—Sal. 68:26; 1 Cor. 14:40.
7 Haci Bon—Mediante Nos Bistí i Areglo Personal: Despues di un dje congresonan di aña pasá e redactor di un korant metropolitano grandi a skirbi: “Loke a sobresalí mas cu tur cos tabata e conducta di e Testigonan. Ta ki refrescante pa mira asina tantu hende comportá nan mes cu asina un dignidad i respet. Bistí den nan pañanan di mas bunita cientos di famia di diferente antecedente racial i étnico a drenta trankilamente den e stadion. Nan conducta tabata na contraste skerpi cu mayoria multitud cu ta para den rij pa drenta e stadion. De echo, en general Testigonan di Jehova ta un contraste grandi compará cu mayoria multitud. A bira masha normal pa mira hende comportá nan mes brutu den público. . . . Sí, e multitud di Testigonan ta refrescante.” Laga nos nunca permití nos bistí i areglo personal rebahá e ambiente spiritual dje congreso.—Fil. 1:10; 1 Tim. 2:9, 10.
8 Haci Bon—Na Bautismo: Candidatonan di bautismo lo kier trata e ocasion aki cu sumo dignidad. Dor di bisti trahe di baño modesto nan lo demostrá aprecio pa e santidad dje ocasion. Lo ta masha beneficioso pa conductornan di studio di Bijbel repasá e “Pregunta di Lector” den E Toren di Vigilancia di 1 di april 1995, cu nan studiantenan promé cu nan asistí na e congreso.
9 Nos areglo personal i conducta di debocion na Dios ta duna testimonio di nos creencianan cristian i ta hacié mas fácil pa hende di curason sincero reconocé e berdad. P’esei, laga nos “sigui haci bon” i haña elogio ora nos asistí na e Congreso di Distrito “Siñadónan dje Palabra di Dios.”—Rom. 13:3.